យោងតាមរបាយការណ៍សេដ្ឋកិច្ចពិភពលោក ដែលចេញផ្សាយកាលពីពេលថ្មីៗនេះបានបង្ហាញថា គម្លាតយេនឌ័រសាកលរបស់ប្រទេសកម្ពុជា បានឈរនៅចំណាត់ថ្នាក់លេខរៀងទី៩៣ ក្នុងចំណោមប្រទេស១៤៩ គឺមានភាពល្អប្រសើរ ខណៈឆ្នាំ២០១៧ ប្រទេសកម្ពុជាឈរនៅលេខរៀងទី៩៩ ក្នុងចំណោមប្រទេស១៤៤។
ការកើនឡើងចំណាត់ថ្នាក់ល្អនេះ ត្រូវបានថ្នាក់ដឹកនាំក្រសួងកិច្ចការនារី ចាត់ទុកថា ជាសមិទ្ធិផលដែលកើតឡើងពីនយោបាយឈ្នះៗ របស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោហ៊ុនសែន។
រដ្ឋលេខាធិការក្រសួងកិច្ចការនារី លោកជំទាវ ឃឹម ចំរើន បានមានប្រសាសន៍នៅក្នុងកិច្ចប្រជុំប្រចាំឆ្នាំ ក្រុមការងារបញ្ជ្រាបយេនឌ័រក្រសួង-ស្ថាប័ន ដែលធ្វើឡើង កាលពីព្រឹកថ្ងៃទី២៥ ខែធ្នូ ឆ្នាំ២០១៨ នៅក្រុងសៀមរាប ថា នយោបាយឈ្នះៗ របស់រាជរដ្ឋាភិបាលកម្ពុជា បានជម្រុញឲ្យគម្លាតយេនឌ័រ រវាងបុរស និងស្ត្រី កំពុងបម្រើការនៅតាមក្រសួងស្ថាប័ននានាកាន់តែខិតជិតគ្នា។ ជាពិសេសសម្រាប់អណត្តិទី៦នេះ សមាសភាពស្ត្រី ដែលមានសមត្ថភាពហើយទទួលបានការទុកចិត្តពីរាជរដ្ឋាភិបាល បានទទួលនូវកាតែងតាំងឲ្យទទួលមុខតំណែងតាំងពីថ្នាក់ជាតិរហូតដល់ថ្នាក់ក្រោមជាតិមានការកើនឡើងគួរឲ្យកត់សម្គាល់។
លោកជំទាវគឹម ស៊ីផាត់ រដ្ឋលេខាធិការក្រសួងកិច្ចការនារី ទទួលបន្ទុកសមភាពយេនឌ័រ ក៏បានលើកឡើងផងដែរថា គ្រប់អណត្តិរបស់រាជរដ្ឋាភិបាលម្ពុជា តែងតែផ្តោតនូវការយកចិត្តទុកដាក់លើការលើកកម្ពស់សមភាពយេនឌ័រ និងការពង្រឹងភាពអង់អាចដល់ស្ត្រី ហើយក៏មានសមិទ្ធិផលជាច្រើនបានបង្ហាញ និងបញ្ជាក់នូវវឌ្ឍនភាព ទាំងកម្រិតជាតិ តំបន់ និងសកលលោក។
លោកជំទាវ បន្តថា ជាងនេះទៅទៀតបើយើងពិនិត្យមើលច្បាប់ គោលនយោបាយ និងបទដ្ឋាននានាជាច្រើនបាន និងកំពុងតែយកចិត្តទុកដាក់គិតគូរ ឲ្យតម្លៃ និងទទួលស្គាល់យ៉ាងច្បាស់នូវសារៈសំខាន់ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី ដោយបានចាត់ទុកថា ស្ត្រីជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គមជាតិ៕
អត្ថបទ និង រូបថត : លោក ជា ស្រស់
