ការងារស្ម័គ្រចិត្ត បង្ហាញពីការចេះជួយយកអាសារគ្នា និងលើកកម្ពស់គុណតម្លៃរបស់មនុស្ស ដើម្បីធ្វើឲ្យប្រជាពលរដ្ឋកម្ពុជា ចូលរួមការងារស្ម័គ្រចិត្តឲ្យបានកាន់តែច្រើន យុវជនគឺជាចលករដ៏សំខាន់ក្នុងកិច្ចកានេះ។
នៅព្រឹកថ្ងៃទី ២៧ ខែធ្នូ ឆ្នាំ២០១៨ សាខាកាកបាទក្រហមកម្ពុជា ខេត្តសៀមរាប បានរៀបចំពិធីបំពាក់កន្សែងយុវជនកាកបាទក្រហមកម្ពុជា ចំនួន ១០០នាក់ ដែលមកពីវិទ្យាល័យ ហ៊ុន សែន សៀមរាប និងវិទ្យាល័យ ហ៊ុន សែន វត្តស្វាយ។
មានប្រសាសន៍ក្នុងឱកាសនោះ លោកជំទាវបណ្ឌិត គួយ ណាលីន អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប បានលើកឡើងថា៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ក៏ដូចជាសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា បានចាត់ទុកយុវជនជាធនធានគន្លឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព។ នៅគ្រប់សម័យកាល គ្រប់សង្គម យុវជនជាកម្លាំងស្រួចដែលមានកម្លាំងកាយ-កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ ការលំបាកនានា ពិសេសយុវជនគឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត។
លោកជំទាវបណ្ឌិត បានបញ្ជាក់ថា កាកបាទក្រហមកម្ពុជា បានទទួលស្គាល់ថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “យុវជនកំពុងនាំគ្នាធ្វើកម្មភាព យុវជនជាភ្នាក់ងារនៃការផ្លាស់ប្តូរឥរិយាបថក្នុងសង្គម” ។
ទន្ទឹមនឹង ការប្រគល់ជូន នូវតួនាទីភារកិច្ចដល់ប្អូនៗ ដែលទើបបំពាក់កន្សែងថ្មីនាពេលនេះ លោកជំទាវបណ្ឌិត គួយ ណាលីន ក៍បានផ្តាំផ្ញើដល់យុវជនកាកបាទក្រហមកម្ពុជា គ្រប់ស្រទាប់យុវវ័យថា ក្មួយៗ គឺជាទំពាំងស្នងឫស្សី ជាអ្នកបន្តវេនក្នុងសកម្មភាពមនុស្សធម៌ របស់កាកបាទក្រហមកម្ពុជា ត្រូវគោរពវិន័យសាលា ខិតខំរៀនសូត្រឲ្យបានពូកែ ធ្វើជាគំរូល្អគ្រប់សកម្មភាពក្នុងស្រទាប់យុវវ័យ ជៀសឲ្យឆ្ងាយពីគ្រឿងញៀន ចូលរួមគោរពច្បាប់ចរាចរណ៍ ដើម្បីរួមចំណែកកាត់បន្ថយ អត្រាគ្រោះថ្នាក់ ស្លាប់ របួស និងពិការដោយសារគ្រោះថ្នាក់ចរាចរណ៍៕
អត្ថបទ និង រូបថត : លោក គឿន វេត និង ទ្រា ពន្លឺ
កែសម្រួលអត្ថបទ : លោក សេង ផល្លី
