ថ្លែងក្នុងឱកាសសំណេះសំណាល និងប្រគល់សម្ភារៈកសិកម្មដល់កសិករ លោកអភិបាលរងខេត្តសៀមរាប បានបញ្ជាក់ថា បន្លែសុវត្ថិភាពក្នុងខេត្តសៀមរាប មិនទាន់ឆ្លើយទៅនឹងតម្រូវការចំណីអាហាររបស់ប្រជាពលរដ្ឋ និងភ្ញៀវទេសចរណ៍ក្នុងខេត្តសៀមរាបនៅឡើយទេ។
តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានអោយដឹងថា ការផលិតបន្លែសុវត្ថិភាពក្នុងខេត្តសៀមរាប ស្ថិតនៅក្នុងគម្រោងជម្រុញផលិតកម្មស្បៀងឆ្នាំ២០១៧-២០១៨ ឆ្នាំទី២ ហើយដំណាក់កាលទី១នេះ នឹងបញ្ចប់នៅ៦ខែខាងមុខទៀត។
លទ្ធផលនៃគម្រោងនេះ បានជម្រុញ និងគាំទ្រឲ្យកសិករនៅក្នុងស្រុកចំនួន៣ ស្រុកអង្គរធំ ប្រាសាទបាគង និងសូទ្រនិគម ចូលរួមផលិតបន្លែសុវត្ថិភាព ដោយបានអនុវត្តតាមបច្ចេកទេសកសិកម្មសុវត្ថិភាព និងតាមបែបវិទ្យាសាស្ត្រ ដែលមានខ្នាតតូច និងធំចំនួន១៦២គ្រួសារ លើផ្ទៃដីចំនួន ២២១,៤០ ហិកតា ក្នុងនោះ បាន និងកំពុងដាំបន្លែចំនួន ៣៦មុខ ហើយទទួលបានបរិមាណផលបន្លែសុវត្ថិភាពចំនួន ១,៤៣២.៥០តោន ។
ផ្នែកសហគមន៍អភិវឌ្ឍន៍កសិកម្ម បានបង្កើតសហគមន៍បន្លែចំនួន ០៣សហគមន៍ មានសមាជិក ៩៨ គ្រួសារ ស្ថិតនៅក្នុង ស្រុកអង្គរធំ ប្រាសាទបាគង និងសូទ្រនិគមទទួល សហគមន៍បន្លែទាំងបីនេះ បានប្រាក់ឧបត្ថម្ភធនចំនួន ២៩០,៨០០,០០០រៀល ដោយមួយគ្រួសារទទួលបានថវិកាចាប់ពី១,៦០០,០០០ ដល់១,៩៥០,០០០រៀល។ ក្រៅពីសហគមន៍បន្លែ ផ្នែកសហគមន៍អភិវឌ្ឍន៍កសិកម្ម ក៏បានចងក្រុមបន្លែចំនួន ១២ក្រុមបន្ថែមទៀត ដែលមានសមាជិក ១៦២គ្រួសារផងដែរ។
តាមរបាយការណ៍ដដែល ការដាំបន្លែសុវត្ថិភាពនេះ ក្នុងមួយខែ កសិករអាចដាំបានពី ៣ ទៅ៤ លើកក្នុងមួយរដូវ ហើយប្រាក់ចំណូលទទួលបានពី ៧០ម៉ឺនរៀល ទៅ ៨០ម៉ឺនរៀលក្នុងមួយខែ។
នៅខាងមុខមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបនាឱកាសនោះ លោក ពិន ប្រាកដ អភិបាលរងខេត្តសៀមរាប បានបង្ហាញថា ខេត្តសៀមរាប មានតម្រូវការខ្ពស់ណាស់ ក្នុងមួយថ្ងៃៗ ទៅលើផលិតផលបន្លែ ពិសេសនោះ គឺបន្លែសុវត្ថិភាព ដែលផ្គត់ផ្គង់ដល់ភ្ញៀវទេសចរណ៍ បើកសិករនៅខេត្តសៀមរាបយើង ខិតខំដាំដុះ និងគោរពតាមបច្ចេកទេសសុវត្ថិភាពបាន ចាប់ពីឥឡូវនេះទៅ៖
• ទីមួយ យើងអាចកាត់បន្ថយបាន នូវការនាំចូលបន្លែពីខាងក្រៅ
• ទីពីរ អាចបង្កើនបាននូវប្រាក់ចំណូលគ្រួសារបន្ថែម
• ទី៣ អាចជួយដល់សុខភាពសាធារណៈជនទូទៅ ពិសេសភ្ញៀវទេសចរ
• ទីបួន អាចកាត់បន្ថយចំណាកស្រុក
ទាំងនេះជាកិច្ចការ ដែលរាជរដ្ឋាភិបាល ក៏ដូចជាអាជ្ញាធរខេត្ត បាននឹងកំពុងយកចិត្តទុកដាក់ខ្ពស់បំផុត ស្របគ្នាទៅនឹងគោលដៅអភិវឌ្ឍខេត្ត ដែលបានកំណត់ថា ទៅថ្ងៃអនាគត ផលិតកម្មកសិកម្ម នៅខេត្តសៀមរាបយើង គឺប្រកបទៅដោយបរិមាណ និងគុណភាព សុវត្ថិភាព អាចផ្គត់ផ្គង់បានតាមតម្រូវការទីផ្សារ ។
អភិបាលរងខេត្តសៀមរាប បានបន្ថែមទៀតថា ក្នុងនាមអាជ្ញាធរខេត្ត សូមគាំទ្រ និងស្នើដល់មន្ទីរកសិកម្ម រុក្ខាប្រមាញ់ និងនេសាទខេត្ត ខិតខំជម្រុញបន្តទៀត ដោយបង្កើនបានកាន់តែច្រើនលើចំនួនកសិករ ចំនួនផ្ទៃដីដាំដុះបង្កើនបរិមាណផល បន្លែឲ្យបានច្រើន នៅឆ្នាំបន្តបន្ទាប់ ព្រោះថា តម្រូវការរបស់អ្នកប្រាស់ ពីមួយថ្ងៃទៅមួយថ្ងៃ កាន់តែមានការកើនឡើងជាលំដាប់។
រូបថត : លោក អ៊ិន សីហរិទ្ធ
អត្ថបទ : លោក សេង ផល្លី
