សម្រាប់សកម្មភាពសំខាន់ៗ នៅក្នុងគម្រោង ដែលបានអនុវត្តក្នុងឆ្នាំ២០១៧-២០១៨ រួមមាន៖
• ផ្នែកបន្លែសុវត្ថិភាព : កសិករបានអនុវត្តតាមបច្ចេកទេសកសិកម្មល្អ (GAP) ដែលមានខ្នាតតូច និងខ្នាតធំចំនួន១៦២គ្រួសារ លើផ្ទៃដីចំនួន២២១,៤០ ហិកតា បានដាំបន្លែចំនួន ៣៦មុខ ដាំបានពី ៣ ទៅ៤ដងក្នុងមួយឆ្នាំ ហើយទទួលបានបរិមាណផលបន្លែសុវត្ថិភាពចំនួន ១,៤៣២,៥០តោន នៅក្នុងស្រុកចំនួន៣ ស្រុកអង្គរធំ ប្រាសាទបាគង និងសូទ្រនិគម។
• ផ្នែក ដំណាំស្រូវ : បានអនុវត្តស្រុកចំនួន ៤ស្រុក មាន ជីក្រែង ពួក ប្រាសាទបាគង និងបន្ទាយស្រី ដែលមានកសិករចំនួន៧៧៦ គ្រួសារ ផ្ទៃដីចំនួន១,៣១៩ហិកតា ក្នុងនោះ ស្រូវចំណីចំនួន១,២៨២ហិកតា បរិមាណផល ៣,៤៦០តោន ស្រូវពូជផ្ទៃដី ៣៧ហិកតា បរិមាណផល ១១០ តោន។
• ផ្នែក សហគមន៍អភិវឌ្ឍន៍កសិកម្ម : បានចងក្រុមបន្លែ១២ ក្រុម មានកសិករ ១៦២គ្រួសារ សហគមន៍បន្លែចំនួន៣ សហគមន៍ មានសមាជិក ៩៨ គ្រួសារទទួលបានប្រាក់ឧបត្ថម្ភធនចំនួន ២៩០,៨០០,០០០រៀល គ្រួសារដែលជាសមាជិកនីមួយៗ ទទួលថវិកា ចាប់ពីពី១,៦០០,០០០ ដល់ ១,៩៥០,០០០រៀល)។សហគមន៍ផលិតស្រូវ ១៤សហគមន៍ ទទួលបានប្រាក់ឧបត្ថម្ភធន ទិញពូជស្រូវសរុបចំនួន ២៦៣,៣៦០,០០០ រៀល (២,០០០ រៀល/គ,ក្រ)
• ផ្នែក ទីផ្សារផលិតផលកសិកម្ម : គម្រោងបានផ្សារភ្ជាប់រវាងអ្នកប្រមូលទិញ និងអាជីវករលក់ដុំ លក់រាយចំនួន ៣៦នាក់ បានទិញដោយផ្ទាល់នៅឯចំការនិងនាំយកមកលក់នៅទីផ្សារចំនួន៩ផ្សារ រួមមានផ្សារសាមគ្គី ផ្សារដំដែក ផ្សាររលួស ផ្សារអង្គ្រង ផ្សារដើមក្រឡាញ់ ផ្សារចាស់ ផ្សារស្រះស្រង់ ផ្សារព្រះដាក់ និងផ្សារស្រុកស្ទោង។
លោកប្រធាន មន្ទីរកសិកម្មខេត្ត បានបន្ថែមទៀតថា ជាមួយនឹងទទួលបច្ចេកវិទ្យាដាំដុះថ្មីៗ កសិករក៏តែងតែជួបប្រទះ នូវបញ្ហាប្រឈមមួយចំនួន ដូចជាកត្តារាំងស្ងួត ខ្វះទឹកនៅរដូវប្រាំង មានជំនន់ទឹកភ្លៀងលិចនៅរដូវវស្សា មានកត្តាសត្វល្អិតចង្រៃបំផ្លាញលើដំណាំ តែកត្តាទាំងនេះមិនបានធ្វើឲ្យកសិករក្នុងខេត្តរាថយនោះឡើយ ផ្ទុយទៅវិញប្រជាកសិករបានសហការជាមួយ អ្នកបច្ចេកទេស ខិតខំទប់ទល់និងព្យាយាមដាំដុះ កែលម្អជាបន្តបន្ទាប់ រហូតទទួលបានលទ្ធផល។
សូមបញ្ចាក់ដែរថា៖ នៅថ្ងៃទី០២ ខែមករា ឆ្នាំ២០១៩ មន្ទីរកសិកម្ម រុក្ខាប្រមាញ់ និងនេសាទខេត្ត បានប្រគល់សម្ភារៈកសិកម្មដល់កសិករ ក្នុងគម្រោងជម្រុញផលិតកម្មស្បៀងឆ្នាំ២០១៧-២០១៨។ សម្ភារៈកសិកម្មចែកជូនកសិករនាពេលនោះមានដូចជា៖ ម៉ាស៊ីនស្ទូងស្រូវខ្នាតតូច ១គ្រឿង ផ្តល់ឲ្យសហគមន៍ផលិតពូជស្រូវជីក្រែងសាមគ្គី ជីគីមី ៣២,២៥០គ.ក្រ ផ្តល់ជូនកសិករចំនួន ២១៥គ្រួសារ ដោយមួយគ្រួសារៗ ទទួលបាន១៥០គ.ក្រ និងប្រព័ន្ធស្រោចស្រពបាចសាច ០៥មុខផ្តល់ជូនកសិករចំនួន ៥០គ្រួសារ ក្នុងគម្រោងរបស់មន្ទីរកសិកម្ម រុក្ខាប្រមាញ់ និងនេសាទខេត្ត សៀមរាប។
រូបថត និងអត្ថបទ: លោក យូ វង្ស
សម្រួលអត្ថបទ : លោក សេង ផល្លី
