ក្បាលដីចំនួន ៤៥៥៣ ស្ថិតនៅក្នុងភូមិចំនួន២ ត្រូវបានធ្វើការបិទប្រកាសជាសាធារណៈនូវឯកសារនៃការវិនិច្ឆ័យក្បាលដី ក្នុងបរិវេណវត្តប្រាសាទត្រាំនាគ ក្នុងសង្កាត់ស្លក្រាម ក្រុងសៀមរាប នាព្រឹកថ្ងៃទី២៨ ខែធ្នូ ឆ្នាំ២០១៨។
លោក ប៊ូជុំ សម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានមានប្រសាសន៍ថា ការបិទផ្សាយនេះ គឺដើម្បីឲ្យបងប្អូនប្រជាពលរដ្ឋទាំងអស់ ដែលបានចុះបញ្ជីដីធ្លីក្នុងភូមិទាំងពីរខាងលើ បានពិនិត្យផ្ទៀងផ្ទាត់មើលទិន្នន័យ ឈ្មោះ សាវតា ទំហំដី ប្រភេទទ្រព្យ ទីតាំងដី រូបរាងដី របស់ពួកគាត់។
លោកបន្ថែមថា ការប្រកាសនេះ ជាឱកាសចុងក្រោយ សម្រាប់អ្នកពាក់ព័ន្ធទាំងអស់មានសិទ្ធិកែតម្រូវ ឬជំទាស់តវ៉ាបាន ក្នុងករណីដែលពិនិត្យឃើញថា មានកំហុសឆ្គង។ ចំពោះការបិទផ្សាយនេះ មានរយៈពេល១៥ថ្ងៃ ចាប់ពីថ្ងៃទី២៨ ខែធ្នូ ឆ្នាំ២០១៨ ដល់ថ្ងៃទី១១ ខែមករា ឆ្នាំ២០១៩ ដោយមិនគិតថ្ងៃឈប់សម្រាកឡើយ។
សូមបញ្ជាក់ថា ប្រសិនបើមានករណីកែតម្រូវ ឬតវ៉ាផ្សេង ប្រជាពលរដ្ឋ សូមជួបជាមួយមន្ត្រីជំនាញ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ដែលស្ថិតនៅបរិវេណវត្តប្រាសាទត្រាំនាគ ក្នុងសង្កាត់ស្លក្រាម ក្រុងសៀមរាប រហូតដល់ថ្ងៃទី១១ ខែមករា ឆ្នាំ២០១៩។
ការបិទប្រកាសជាសាធារណៈនូវឯកសារនៃការវិនិច្ឆ័យក្បាលដីនេះ ធ្វើឡើងតាមរយៈសេចក្ដីជូនដំណឹងរបស់រដ្ឋបាលខេត្តសៀមរាប កាលពីថ្ងៃទី២៦ ខែធ្នូ ឆ្នាំ២០១៨ ដើម្បីអញ្ជើញប្រជាពលរដ្ឋ ស្ថិតនៅក្នុងភូមិ ចុងកៅស៊ូ និងភូមិធ្លកអណ្តូង ក្នុងសង្កាត់ស្លក្រាម ក្រុងសៀមរាប ធ្វើការពិនិត្យផ្ទៀងផ្ទាត់មើលទិន្នន័យ ដើម្បីធានានូវសុក្រឹតភាព ក្នុងការចេញវិញ្ញាបនប័ត្រសម្គាល់ម្ចាស់អចលនវត្ថុឬប័ណ្ណកម្មសិទ្ធិដីធ្លី។
អត្ថបទ និង រូបថត : លោក ជា ស្រស់
កែសម្រួលអត្ថបទ : លោក សេង ផល្លី
