បន្ទាប់ពីសិក្សាអំពីអរិយខ្មែររយៈពេល ៦ខែ ដោយសាស្ត្រាចារ្យខ្មែរនៅសហរដ្ឋអាមេរិច និស្សិតនៃសាកលវិទ្យាល័យ របស់សហរដ្ឋអាមេរិកចំនួន ៩រូប បានចុះធ្វើទស្សនកិច្ចសិក្សានៅប្រទេសកម្ពុជា រយៈពេល១៨ថ្ងៃ។
ទស្សនកិច្ចនេះធ្វើឡើងចាប់ពីថ្ងៃទី១ ដល់ថ្ងៃទី ១៨ មករា ឆ្នាំ២០១៩ ដែលធ្វើឡើងនៅតំបន់រមណីយដ្ឋានអង្គរ ប្រាសាទសម្បូរព្រៃគុក និងចុងក្រោយនៅរាជធានីភ្នំពេញ។ កម្មវិធីទស្សនកិច្ចសិក្សានេះ គឺជាគម្រោងកិច្ចសហប្រតិបត្តិការរវាងអាជ្ញាធរជាតិអប្សរា និងសាកលវិទ្យាល័យ ខូណែល និងមានការសម្របសម្រួលមួយផ្នែកពីមជ្ឈមណ្ឌលខេមរសិក្សា។
និស្សិតដែលចូលរួមទស្សនកិច្ចសិក្សានៅពេលនេះមានចំនួន៩នាក់ ដែលសិក្សាលើជំនាញផ្សេងគ្នា ដូចជាផ្នែកប្រវត្តិសាស្ដ្រ សិល្បៈ ទឹក របាំ រូបវិទ្យា ពលរដ្ឋវិទ្យាជាដើម ដែលពួកគេកំពុងសិក្សានៅឆ្នាំទី៣ និងទី៤។ ដំណើរទស្សនកិច្ចសិក្សានៅខេត្តសៀមរាបនេះដែរ ក្រុមនិស្សិតទាំងអស់នេះ នឹងចុះកម្មសិក្សានៅរោងសិប្បកម្មអាទីសង់អង្គរ តាមប្រាសាទមួយចំនួនមានប្រាសាទអង្គរវត្ត បាយ័ន តាព្រហ្ម បន្ទាយស្រី និងក្បាលស្ពានជាដើម។
លោកបណ្ឌិត អ៊ា ដារិទ្ធ តំណាងអាជ្ញាធរជាតិអប្សរាចូលរួមទស្សនកិច្ចសិក្សារបស់ក្រុមនិស្សិតខាងលើបានឲ្យដឹងថា នេះជាកិច្ចសហប្រតិបត្តិការថ្មីរវាងអាជ្ញាធរជាតិអប្សរា និងសាកលវិទ្យាល័យ ខូណែល ដែលបានបន្ដពីកិច្ចសហការមុន បន្ទាប់ពីលោកបានទៅបង្រៀននៅសាកលវិទ្យាល័យនេះរយៈពេល ៦ខែ។
លោកបានបញ្ជាក់ថា អំឡុងពេលលោកទៅបង្រៀននៅសហរដ្ឋអាមេរិក និស្សិតអន្ដរជាតិ បានចាប់អារម្មណ៍នឹងអរិយធម៌ខ្មែរ រួមមាន រឿងទឹក សិល្បៈ និងនយោបាយនៃប្រទេសអាស៊ីអាគ្នេយ៍ រួមនិងកុលាលភាជន៍ដែលជាឯកទេសចម្បងរបស់លោកបណ្ឌិតផងដែរ។
អ្នកដឹកនាំនិស្សិតធ្វើទស្សនកិច្ច សាស្ដ្រាចារ្យ កាយ៉ា ម៉ាកហ្គូវ៉ាន់ នៃសាកលវិទ្យាល័យ ខូណែល បានបញ្ជាក់ថា ការជ្រើសរើសយកកម្ពុជាជាគោលដៅនៃទស្សនកិច្ចសិក្សានេះ គឺធ្វើឡើងដើម្បីប្រៀបធៀបអរិយធម៌ខ្មែរ និងឥណ្ឌូនេស៊ី ហើយការសិក្សាកន្លងមក បានបង្ហាញថាអរិយធម៌នៃប្រទេសទាំង២នេះ រងឥទ្ធិពលពីឥណ្ឌាដូចគ្នា គឺមានភាពប្រហាក់ប្រហែលគ្នាច្រើនទាំងផ្នែកសិល្បៈ និងអរិយធម៌។
លោកគ្រូ អ្នកគ្រូ ដែលដឹកនាំនិស្សិតទស្សនកិច្ចសិក្សាខាងលើ រំពឹងថា ក្រោយបញ្ចប់ទស្សនខាងលើនិស្សិតទាំងអស់នឹងបានយល់បន្ថែមទាក់ទងនឹងប្រវត្តិសាស្ដ្រ ប្រាសាទ សិល្បៈ ទំនៀមទម្លាប់ប្រពៃណីខ្មែរ និងការគ្រប់គ្រងបេតិកភណ្ឌនានារបស់កម្ពុជា៕
រូបថត និងអត្ថបទ: លោក ម៉ាត់ អារីហ្វីន
សម្រួលអត្ថបទ : លោក សេង ផល្លី
