បន្ទាប់ពី ជំនួបចរចារ ២លើករួចមក កម្មករ សំអាតបរិស្ថានក្នុងរមណីយដ្ឋានអង្គរ នៃក្រុមហ៊ុន វីហ្គ្រីន បានសម្រេចទទួល ការដំឡើងប្រាក់ខែ ពីភាគីក្រុមហ៊ុន ក្នុងកម្រិតមួយ ដែលភាគីទាំងសងខាងបានព្រមព្រៀងគ្នា។
ដោយជួបការលំបាក ក្នុងជីវភាពប្រចាំថ្ងៃ កម្មករ សំអាតបរិស្ថានក្នុងរមណីយដ្ឋានអង្គរ នៃក្រុមហ៊ុន វីហ្គ្រីន ជាង ៥០០នាក់ ក្នុង៨០ភាគរយជាស្ត្រីនោះ បានធ្វើការតវ៉ាសុំតម្លើងប្រាក់ខែ នៅថ្ងៃទី៦ ខែមករា ឆ្នាំ២០១៩ ដោយពួកគាត់អះអាងថា ប្រាក់ខែរបស់ពួកគាត់ត្រឹម ៨០ដុល្លារ ពុំអាចធ្វើឲ្យជីវភាពគ្រួសាររបស់ពួកគាត់មានភាពល្អប្រសើរឡើយ។
ដោយពុំទាន់ទទួលបានដំណោះស្រាយ នៅថ្ងៃទី៧ ខែមករា ឆ្នាំ២០១៩ តំណាងកម្មករ សហជីព ក្រុមហ៊ុន រួមនិងអាជ្ញាធរ បានធ្វើជួបពិភាក្សាគ្នាជាលើកទី២ រហូតទទួលបានដំណោះស្រាយរួមមួយ ដោយភាគីក្រុមហ៊ុនយល់ព្រមដំឡើងប្រាក់ខែចំនួន ១៥ដុល្លារ បន្ថែមពីលើប្រាក់ខែបច្ចុប្បន្ន ជូនដល់បុគ្គលិកទាំងអស់ របស់ក្រុមហ៊ុន វីហ្គ្រីនប្រមាណជាង ៥០០នាក់។
ក្នុងនាមអ្នកសម្របសម្រួលក្នុងការតវ៉ានេះ លោក ហួត សុធី ស្នងការរង នៃស្នងការដ្ឋាននគរបាលខេត្តសៀមរាប បានប្រាប់អ្នកសារព័ត៌មាន នៃមន្ទីរព័ត៌មានខេត្តសៀមរាប នៅរសៀលថ្ងៃទី៧ ខែមករា ឆ្នាំ២០១៩នេះថា ភាគីទាំងអស់បានយល់ព្រម និងយោគយល់ចំពោះការដំឡើងប្រាក់ខែខាងលើ។
ស្នងការរង បានពន្យល់ថា៖« ដោយសារក្រុមហ៊ុន វីហ្គ្រីន ទើបនឹងដេញថ្លៃប្រមូលសំរាមបាននៅដើមឆ្នាំ២០១៩នេះ ហើយភ្លាមៗនោះ ក៏មានការតវ៉ាសុំដំឡើងប្រាក់ខែកើតឡើង ខាងក្រុមហ៊ុនក៏ពិបាកដែរ ដូច្នេះទើបខាងក្រុមហ៊ុនសុំការយោគយល់ ហើយសន្យាថាបើឆ្នាំក្រោយ បើដេញថ្លៃបានបន្តទៀត ក្រុមហ៊ុននឹងដំឡើងខ្ពស់ជាងនេះ អាចពី២០ ទៅ២៥ដុល្លារ តាមការចចារជាក់ស្ដែង ហើយចំពោះប្រាក់ខែគ្រោងនឹងដំឡើងនេះ គឺក្រុមហ៊ុនគិតចាប់ពីខែមករាឆ្នាំ២០១៩ នេះទៅតែម្ដង។
គួរបញ្ជាក់ថា ក្រុមហ៊ុន វីហ្គ្រីន ជាក្រុមហ៊ុនឯកជន ដែលគ្រប់គ្រងការប្រមូលសំរាមតាមតំបន់ប្រាសាទ និងតំបន់សំខាន់ៗមួយចំនួនក្នុងខេត្តសៀមរាប។ ក្រុមហ៊ុននេះមានកម្មករជាង ៥០០នាក់ ហើយប្រាក់ខែ ដែលពួកគេទទួលបាន ចន្លោះពី ៨០ទៅជាង ២០០ដុល្លារ ទៅតាមពេលវេលា និងមុខតំណែងរៀងៗខ្លួន៕
រូបថត និងអត្ថបទ: លោក ម៉ាត់ អារីហ្វីន
សម្រួលអត្ថបទ : លោក សេង ផល្លី
