នៅមិនដល់២ថ្ងៃទៀតទេ ខេត្តសៀមរាប នឹងរៀបចំព្រឹត្តិការណ៍ដ៏ធំរបស់ខ្លួន គឺខួបអនុស្សាវរីយ៍លើកទី៤០ឆ្នាំនៃទិវាជ័យជំនះ៧មករា ៧មករា ១៩៧៩ – ៧មករា ២០១៩។
នៅថ្ងៃទី១០ ខែមករា ខាងមុខនេះ ខេត្តសៀមរាប នឹងមានក្បូនព្យុហយាត្រាដ៏ធំមួយ ដែលរដ្ឋបាលខេត្តសៀមរាប រំពឹងថានឹងមានមនុស្សចូលរួមប្រមាណជាង១ម៉ឺននាក់។
ដើម្បីធ្វើឲ្យពិធីអបអរទិវាជ័យជំនះ៧មករា របស់ខេត្តសៀមរាប ប្រព្រឹត្តទៅដោយរលូន និងជោគជ័យ នៅព្រឹកថ្ងៃទី០៨ខែមករាឆ្នាំ២០១៩ លោកឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្តសៀមរាប បានបើកកិច្ចប្រជុំបូកសរុបការងារប្រចាំសប្តាហ៍ និងផ្សព្វផ្សាយផែនការការពារ ដល់អស់លោក លោកស្រី ឧត្តមសេនីយ៏ ស្នងការរង លោកនាយ នាយរងការិយាល័យជំនាញ លោកអធិការនគរបាលក្រុងស្រុកទាំង១២ និងនាយប៉ុស្តិ៍នគរបាលរដ្ឋបាលចំនួន ៤ចំណុះអធិការក្រុងសៀមរាប សម្រាប់ធ្វើការផ្សព្វផ្សាយ ដល់កងកំលាំងរបស់យើងត្រូវបង្កើន ការយកចិត្តទុកដាក់ ក្នុងការល្បាតត្រួតពិនិត្យអាវុធជាតិផ្ទុះ តាមដានត្រួតពិនិត្យ វិភាគ វាយតម្លៃ នូវរាល់សភាពការណ៍់ និងឧបាយកលនានាដែលប៉ុនប៉ងបំផ្លិចបំផ្លាញ ឬការបង្កចលាចលធ្វើឲ្យបាត់សណ្តាប់ធ្នាប់ ហើយត្រូវមានវិធានការម្ចាស់ការ ដើម្បីបង្ការទប់ស្កាត់បទល្មើស និងដោះស្រាយឲ្យបានទាន់ពេលវេលា និងមានប្រសិទ្ធភាព។
លោកឧត្តមសេនីយ៍ទោ ទិត្យ ណារ៉ុង បន្ថែមទៀតថា ក្នុងនោះការអនុវត្តគោលនយោបាយភូមិឃុំមានសុវត្ថិភាពលក្ខណៈ៩យ៉ាងនៅមូលដ្ឋាន ក៏ត្រូវតែធ្វើការផ្សព្វផ្សាយឲ្យបានទូលំទូលាយ ចៀសវាងអំពើចោរកម្ម បទល្មើសនានា ដែលបង្កអសន្តិសុខ ដល់ប្រជាពលរដ្ឋ នៅតាមមូលដ្ឋានក្នុងថ្ងៃប្រារព្ធពិធី។
រូបថត និងអត្ថបទ: លោក ថាច់ ពិសុទ្ធ
សម្រួលអត្ថបទ : លោក សេង ផល្លី
