កិច្ចប្រជុំវេទិកាសភាអាស៊ី-ប៉ាស៊ីហ្វិកលើកទី២៧ ហៅកាត់ថា APPF បានបើកកិច្ចប្រជុំគណៈកម្មការប្រតិបត្តិហើយ នៅព្រឹកថ្ងៃទី១៤ ខែមករា ឆ្នាំ២០១៩នេះ នៅក្រុងសៀមរាប ក្រោមអធិបតីភាពសម្តេចអគ្គមហាពញាចក្រីហេង សំរិន ប្រធានរដ្ឋសភាកម្ពុជា។
ឯកឧត្តម ឈាង វុនសមាជិករដ្ឋសភាកម្ពុជា ទទួល បន្ទុកកិច្ចការឃោសនាការ ព័ត៌មាន និងកិច្ចសហប្រតិបត្តិអន្តរជាតិបានមានប្រសាសន៍ថា កិច្ចប្រជុំនេះ គឺជាការត្រៀមមុននឹងឈានទៅបើកកិច្ចប្រជុំជាផ្លូវការនៅថ្ងៃទី១៥ខែមករាស្អែកនេះ ដើម្បីពិភាក្សាលើប្រធានបទសំខាន់ៗដែលមានប្រយោជន៍ក្នុងតំបន់ និងលើពិភពលោក។
វេទិកានេះ ធ្វើឡើងក្រោមមូលបទស្តីពី «ពង្រឹងភាពជាដៃគូសភា ដើម្បី សន្តិភាព សន្តិសុខនិងការអភិវឌ្ឍប្រកបដោយចីរភាព» សំដៅពង្រឹងកិច្ចសហប្រតិបត្តិ ការរបស់សភា ក្នុងការប្រើប្រាស់ប្រព័ន្ធព័ត៌មានវិទ្យាប្រកបដោយការទទួលខុសត្រូវ ដើម្បីវឌ្ឍនភាពសង្គម។
ព័ត៌មានជាតិ ថ្មីៗ
ឯកឧត្តមឈាង វុន បានឲ្យដឹងថា កិច្ចប្រជុំនេះ មានប្រទេសជាសមាជិកចំនួន២១ប្រទេស បូករួមទាំងកម្ពុជាក្នុងនោះមាន ប្រទេសចិន អូស្ត្រាលី ឡាវ សហព័ន្ធរុស្ស៊ី ម៉ាឡេស៊ី ឥណ្ឌូនេស៊ី ហ្វីលីពីន ម៉ុងហ្គោលី ណូវ៉ែលហ្សឺឡង់ ម៉ិចស៊ីកូ ជប៉ុន ថៃ កូរ៉េខាងត្បូង ឈីលី ប៉ាពួញូហ្គីនៀ និងប្រទេសសិង្ហបូរីជាដើម។
ឯកឧត្តមបញ្ជាក់ថា ប្រទេសជាមាជិកទាំងអស់បានបញ្ជូនសេចក្តីព្រាង សេចក្តីសម្រេច ពាក់ព័ន្ធនឹងវិស័យ នយោបាយ សេដ្ឋកិច្ច ពាណិជ្ជកម្ម សង្គមកិច្ច និងការកសាងទំនុកចិត្តទៅក្នុងកិច្ចប្រជុំរួចរាល់ហើយ ដើម្បីជម្រុញបន្ថែមនូវការថែរក្សាការពារ សន្តិភាព សន្តិសុខ និងការអភិវឌ្ឍប្រកបដោយចីរភាពនៅក្នុងតំបន់ ការប្រយុទ្ធប្រឆាំងភេរវកម្ម និងឧក្រិដ្ឋកម្មឆ្លងដែននៅក្នុងតំបន់ រួមនិងការលើកកម្ពស់សមភាពយេនឌ័រក្នុងវិស័យសភា។
កិច្ចប្រជុំសភាថ្នាក់តំបន់នេះ ប្រារព្ធឡើងចាប់ពីថ្ងៃទី១៤ ដល់ទី១៧ខែមករា ឆ្នាំ២០១៩នៅលើទឹកដីអង្គរខេត្តសៀមរាប ដោយមានការអញ្ជើញចូលរួមពីបណ្តាថ្នាក់ដឹកនាំសភាមកពីបណ្តាប្រទេសជាសមាជិកចំនួន២១ នៅក្នុងតំបន់ អាស៊ីប៉ាស៊ីហ្វិក។
ក្នុងនោះ ពិធីបើកកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក លើកទី២៧ ជាផ្លូវការ នឹងប្រារព្ធធ្វើនៅព្រឹកថ្ងៃទី១៥ ខែមករា ក្រោមការស្វាគមន៍ដោយព្រះរាជសាររបស់ ព្រះករុណា ព្រះបាទ សម្ដេចព្រះបរមនាថ នរោត្ដមសីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រមទាំងមានការចូលរួមថ្លែងសន្ទរកថា គន្លឹះពីថ្នាក់ដឹកនាំស្ថាប័នកំពូលៗ របស់កម្ពុជាមានដូចជា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងតំណាងសភាប្រទេសជាសមាជិក នៃវេទិកាសភាអាស៊ី-ប៉ាស៊ីហ្វិច មុនពេលសម្ដេចអគ្គមហាពញាចក្រី ហេង សំរិន ប្រធានរដ្ឋសភា និងជាប្រធានវេទិកាសភាអាស៊ី-ប៉ាស៊ីហ្វិក លើកទី២៧ ប្រកាសបើកជាផ្លូវការ។
គួររំលឹកដែរថា វេទិកាAPPF ត្រូវបានបង្កើតឡើងនៅទីក្រុងតូក្យូ ប្រទេសជប៉ុន ក្នុងឆ្នាំ១៩៩៣ ហើយ បច្ចុប្បន្ន មានសមាជិកពេញសិទ្ធិចំនួន២៧ប្រទេស។ ចំណែកសភាកម្ពុជាបាន ចូលជា សមាជិកពេញសិទ្ធិ នៃវេទិកាសភានេះ កាលពីឆ្នាំ១៩៩៥ ដើម្បីចូលរួម ស្វែងរកសុខសន្តិភាព វិបុលភាព និងការអភិវឌ្ឍក្នុងតំបន់ និងពិភពលោក៕
រូបថត និងអត្ថបទ: លោក ជា ស្រស់
សម្រួលអត្ថបទ : លោក សេង ផល្លី
