ថ្លែងក្នុងកិច្ចប្រជុំសមាជិកសភាស្ដ្រី នៃវេទិកាសភាអាស៊ី-ប៉ាស៊ីហ្វិក ក្រោមប្រធានបទ លើកកម្ពស់សមភាពយេនឌ័រ ដើម្បីការអភិវឌ្ឍ ដែលប្រារព្ធធ្វើឡើងនៅខេត្តសៀមរាប កាលពីរសៀលថ្ងៃទី១៤ ខែមករា ឆ្នាំ២០១៩ ម្សិលមិញនេះ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានមានប្រសាសន៍ថា គេមិនអាចសម្រេចបាននូវសន្ដិភាព និងការអភិវឌ្ឍប្រកបដោយចីរភាពបានទេ ប្រសិនបើគេមិនមានអភិក្រម បរិយាប័ន្ន និងប្រសិទ្ធភាព ដើម្បីលើកតម្កើងសមភាពយេនឌ័រ និងការផ្តល់ភាពអង់អាចដល់ស្ដ្រី និងក្មេងស្រី ព្រោះថា បើយោងតាមរបាយការណ៍របស់អង្គការសហប្រជាជាតិ ស្ដីពីគោលដៅអភិវឌ្ឍន៍ប្រកបដោយចីរភាពគោលដៅទី៥ បានបង្ហាញថា វិសមភាពយេនឌ័របានបន្ដរារាំងស្ដ្រី និងក្មេងស្រី ក្នុងការទទួលសិទ្ធិជាមូលដ្ឋានរបស់ខ្លួន ជាមួយនឹងកាលានុវត្តន៍ភាពនានាដែលឆ្លើយតបនឹងសេចក្តីត្រូវការ និងដំណោះស្រាយសម្រាប់គុណប្រយោជន៍ដល់ស្ដ្រី ។
សម្ដេចពញាចក្រី ហេង សំរិន មានប្រសាសន៍ទៀតថា ការលើកកម្ពស់សមភាពយេនឌ័រ បានរួមចំណែកឱ្យសម្រេចបាននូវសន្ដិភាព និងការអភិវឌ្ឍ ជាពិសេសការផ្តល់ភាពអង់អាចផ្នែកសេដ្ឋកិច្ចដល់ស្ត្រី គឺជាកត្ដាសំខាន់ក្នុងការជំរុញការអភិវឌ្ឍប្រកបដោយចីរភាព និងបរិយាប័ន្ន ព្រោះថា ការវិនិយោគលើបញ្ហាសុខភាព ការអប់រំ ការបណ្ដុះបណ្តាលវិជ្ជាជីវៈ ការចូលរួមក្នុងវិស័យសេដ្ឋកិច្ច ការគ្រប់គ្រងចំណូល ការក្លាយជាម្ចាស់ធុរកិច្ចដោយខ្លួនឯង គឺជាការទទួលប្រយោជន៍សម្រាប់សង្គមជាតិទាំងមូល មិនមែនតែស្ដ្រី និងក្មេងស្រីនោះទេ ដូច្នេះ យើងត្រូវបង្កើនការយកចិត្តទុកដាក់លើកកម្ពស់សមភាពយេនឌ័រ ជាពិសេសការអប់រំមូលដ្ឋានសម្រាប់ក្មេងស្រីដែលរស់នៅតំបន់ដាច់ស្រយាលងាយរងគ្រោះនៅក្នុងតំបន់អាស៊ីប៉ាហ្វិច និងសកលលោក ហើយរាល់ប្រពន្ធ័គាំពារសង្គមទាំងអស់ គួរបង្កើនមូលនិធិ និងយកចិត្តទុកដាក់សម្រាប់ស្ត្រីនិងក្មេងស្រី និងជាពិសេសជនដែលរងគ្រោះដោយប្រធានស័ក្តិ ។
គួររម្លឹកថា កិច្ចប្រជុំសមាជិកសភាស្ដ្រី បានផ្តួចផ្តើមនិងប្រជុំជាលើកដំបូងនៅប្រទេសកាណាដា នាឆ្នាំ២០១៦ លើកទី២នៅប្រទេស ហ្វីជី ក្នុងឆ្នាំ២០១៧ និងលើកទី៣ នៅប្រទេសវៀតណាម ក្នុងឆ្នាំ២០១៨ ហើយបានធ្វើវិសោធនកម្ម អនុម័តឱ្យកិច្ចប្រជុំសមាជិកស្ដ្រីជាផ្លូវការរបស់ APPF ដូចគណៈកម្មការផ្សេងៗទៀត ។
កិច្ចប្រជុំនេះ ជាព្រឹត្តិការណ៍ដ៏មានសារសំខាន់ ដែលផ្តោតការយកចិត្តទុកដាក់ខ្ពស់របស់ APPF លើការលើកកម្ពស់សមភាពយេនឌ័រ និងការផ្តល់ភាពអង់អាចដល់ស្ដ្រី និងក្មេងស្រី ដែលជាគោលការណ៍មួយឈានទៅសម្រេចការអភិវឌ្ឍប្រកបដោយចីរភាព៕
អត្ថបទ និង រូបថត ៖ លោក ម៉ាត់ អារីហ្វីន និង លោក ជា ស្រស់
កែសម្រួលអត្ថបទ ៖ លោក លីវ សាន្ត
