សមត្ថកិច្ចនគរបាលខេត្តសៀមរាប បានឲ្យដឹងថា ជនជាតិរុស្ស៊ីម្នាក់ មានឈ្មោះ ROMANOVALEKSANDR ភេទប្រុស កើតថ្ងៃទី១៨ ខែតុលា ឆ្នាំ១៩៧៦ កាន់លិខិតឆ្លងដែន លេខ៧៥៩៣៣៦២៣២ ជាភ្ញៀវទេសចរណ៍ ចូលមកព្រះរាជាណាចក្រកម្ពុជាថ្ងៃទី១៥ ខែមករា ឆ្នាំ២០១៩ តាមច្រកព្រំដែនអន្តរជាតិប៉ោយប៉ែត តាមរយៈក្រុមហ៊ុនទេសចរណ៍VELES AMAZING ស្នាក់នៅបន្ទប់លេខ៣០១ នៃសណ្ឋាគារ MARVELBOUTIQUE ស្ថិតនៅភូមិជន្លង់ សង្កាត់សាលាកំរើក ក្រុងសៀមរាប បានស្លាប់នៅមន្ទីរពេទ្យបង្អែកខេត្តសៀមរាប នាវេលាម៉ោងប្រហែល ២១នាទី ថ្ងៃទី១៥ ខែ មករា ឆ្នាំ ២០១៩ ។
សមត្ថកិច្ចនគរបាលបានឲ្យដឹងទៀតថា តាមការសាកសួរបំភ្លឺពីប្រពន្ធបានឲ្យដឹងថា នៅវេលាម៉ោង២០និង៣០នាទី ប្តីគាត់ បាននាំគាត់មកងូតទឹកអាងហែលលេងបានប្រហែលជា២៥នាទី រួចឡើងមកអង្គុយលើកៅអីមាត់ស្រះជិតគ្នាហើយបានប្រហែលជា៥នាទី ប្តីរបស់គាត់បានធ្លាក់ដួលពីលើកៅអីដោយមិនដឹងខ្លួន ប្រហែលម៉ោង២១នាទី ហើយបានដឹកតាមម៉ូតូយកមកសង្គ្រោះនៅមន្ទីរពេទ្យបង្អែកខេត្តសៀមរាប ពេលទៅដល់ក្រុមគ្រូពេទ្យបានជួយសង្គ្រោះបឋមនឹងបានបញ្ជាក់ថាជនរងគ្រោះបានស្លាប់ហើយ ។
សមត្ថកិច្ចនគរបាលបានឲ្យដឹងបន្ថែមទៀតថា តាមការពិនិត្យសាកសពនៅលើខ្លួនសពពុំមានស្នាកស្នាមអ្វីដែលគួរឲ្យកត់សំគាល់ឡើយ ហើយការសន្និដ្ឋានពីលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្ត ក៏បានឲ្យដឹងថា សពស្លាប់ដោយសារដាច់សសឈាមក្នុងខួរក្បាល ហើយខណៈពេលនេះ សពបានយកទៅរក្សាទុកនៅមន្ទីពេទ្យមិត្តភាពខ្មែរ សូវៀត នារាជធានីភ្នំពេញ ដើម្បីរង់ចាំក្រុមគ្រួសារមកទទួលយក ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
