វេទិកាសភាអាស៊ី- ប៉ាស៊ីហ្វិក (APPF) លើកទី២៧ ដែលមានរយៈពេល៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែមករា ឆ្នាំ២០១៩ នៅក្រុងសៀមរាប បានបិទបញ្ចប់ហើយ កាលពីល្ងាចថ្ងៃទី១៦ មករា ឆ្នាំ ២០១៩ ហើយវេទិកាលើកទី២៨ នឹងផ្ដើមធ្វើនៅប្រទេសអូស្ត្រាលី នាឆ្នាំ២០២០ ។
សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានប្រគល់ទង់ APPF ឲ្យទៅសភាអូស្ត្រាលី ដើម្បីជាសញ្ញាប្រកាសថា សភាកម្ពុជា បានចប់អាណត្តិធ្វើជាប្រធានដឹកនាំ នៃវេទិកាសភាថ្នាក់តំបន់លើកទី២៧ នេះហើយ។
លោក ស្កុត រីយេន ប្រធានព្រឹទ្ធសភាប្រទេសអូស្ត្រាលី បានបង្ហាញជំហរបន្តលើកកម្ពស់យន្តការសភា ក្នុងការបង្កើនកិច្ចសហប្រតិបត្តិការជាមួយបណ្តាប្រទេសនានានៅក្នុងតំបន់ និងពិភពលោក ដើម្បីនាំមកនូវសុខសន្តិភាព និងការអភិវឌ្ឍដោយនិរន្តរភាព។
គួរបញ្ជាក់ថា វេទិកាសភាអាស៊ី-ប៉ាស៊ីហ្វិក លើកទី២៧ ដែលទើបបញ្ចប់នេះ មានតំណាងប្រទេសចូលរួមចំនួន២១ ក្នុងចំណោមប្រទេសចំនួន២៧ ដែលជាសមាជិកពេញសិទ្ធ ហើយប្រទេសកម្ពុជាបានចូលជាសមាជិកនៃវេទិកានេះ កាលពីឆ្នាំ១៩៩៥ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
