ក្នុងជួបពិភាក្សាការងារជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភាជាតិកម្ពុជា នៅសណ្ឋាគារ សុខាសៀមរាប នាព្រឹកថ្ងៃទី១៦ ខែមករា ឆ្នាំ២០១៩នេះ លោកជំទាវ អុលហ្គា យេពីហ្វាណូវ៉ា (Olga Epifanova) អនុប្រធានសភាឌូម៉ា សហព័ន្ធសហព័ន្ធរុស្ស៊ី បានថ្លែងអំណរគុណរដ្ឋសភាកម្ពុជា ដែលបានជ្រើសរើស លោកជំទាវធ្វើជាសហប្រធានដឹកនាំកិច្ចប្រជុំសមាជិកសភាស្ត្រី APPF ដ៏មានសារៈសំខាន់ ពិសេសខ្លឹមសារកិច្ចប្រជុំសមាជិកសភាស្ត្រីAPPF មានសារៈសំខាន់ណាស់ក្នុងការពង្រឹងតួនាទីស្ត្រីក្នុងការចូលរួមចំណែកកសាងសុខសន្តិភាពនៅក្នុងសង្គមជាតិ ហើយនៅក្នុងដំណើរបំពេញទស្សនកិច្ចនៅម្ពុជានាពេលនេះ គណៈប្រតិភូសភាឌូម៉ា សហព័ន្ធសហព័ន្ធរុស្ស៊ី ក៏បានជួបពិភាក្សាការងារជាមួយសមាជិកស្ត្រីរដ្ឋសភាកម្ពុជាផងដែរ ដើម្បីពង្រឹកពង្រីកកិច្ចសហប្រតិបត្តិការជាមួយគ្នាឲ្យកាន់តែរឹងមាំថែមទៀត ដូច្នេះតាមរយៈនេះ សុំស្នើសម្តេចប្រធានរដ្ឋសភាកម្ពុជា ជួយជំរុញទំនាក់ទំនងរវាងប្រជាជននៃប្រទេសទាំងពីរកាន់តែរឹងមាំឡើង ពិសេសទំនាក់ក្នុងស្រទាប់យុវជននៃប្រទេសទាំងពីរ ។
ជាការឆ្លើយតប សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានសម្តែងក្តីសោមនស្ស រីករាយជាទីបំផុត ដែលលោកជំទាវ អុលហ្គា យេពីហ្វាណូវ៉ាបានដឹកនាំគណៈប្រតិភូជាន់ខ្ពស់ មកបំពេញទស្សនកិច្ចនៅកម្ពុជា និងចូលរួមកិច្ចប្រជុំ APPF លើកទី២៧ ហើយវត្តមានរបស់សភាឌូម៉ារុស្ស៊ីនៅពេលនេះ បានរួមចំណែកដល់ការបន្តរឹតបន្តឹងទំនាក់ទំនង ចំណងមិត្តភាពជាប្រពៃណី និងកិច្ចសហប្រតិបត្តិការ រវាងប្រទេសយទាំងពីរ ជាពិសេសរវាងស្ថាប័ននីតិប្បញ្ញត្តិ កម្ពុជា-សហព័ន្ធរុស្ស៊ី ឲ្យកាន់តែរឹងមាំ និងជិតស្និទ្ធ ព្រោះប្រទេសរុស្ស៊ី ជាមិត្តចាស់ ជាមិត្តល្អ និងជាអ្នកជិតខាងល្អរបស់កម្ពុជា នៅគ្រប់ កាលៈទេសៈ ខណៈដែលរុស្ស៊ីបានជួយគាំទ្រកម្ពុជា ចាប់ពីទសវត្សឆ្នាំ១៩៨០មកដល់បច្ចុប្បន្ននេះ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
