អគារសិក្សាថ្មីមួយខ្នងមាន៣បន្ទប់ សង់ឡើងអំពីស៊ីម៉ង់និងឥដ្ឋ ដំបូលប្រក់ក្បឿង មានទទឹងប្រវែង៨ម៉ែត្រ និងបណ្តោយប្រវែង២៤ម៉ែត្រ ស្ថិតនៅក្នុងសាលាបឋមសិក្សាតាព័រ ឃុំពង្រក្រោម ស្រុកជីក្រែង ចំណាយថវិកាអស់ចំនួន៣៤.៨០០ដុល្លារអាម៉េរិក ដែលជាអំណោយសប្បុរសធម៌របស់ឧបាសិកា សុខ ឈាង មាតាបង្កើតរបស់ឯកឧត្តម គួច ចំរើន អភិបាលខេត្តកំពង់ចាម និង ក្រុមគ្រួសារ ត្រូវបានសម្ពោធដាក់ឱ្យដំណើរការដាក់ឱ្យប្រើប្រាស់ កាលពីថ្ងៃទី១៦ខែមករាឆ្នាំ២០១៩ ក្រោមអធិបតីភាពឯកឧត្តម គួច ចំរើន អភិបាលខេត្តកំពង់ចាម និង លោក ពិន ប្រាកដ អភិបាលរងខេត្តសៀមរាប និងជាតំណាងឯកឧត្ដម ទៀ សីហា អភិបាលខេត្តសៀមរាប ។
មានប្រសាសន៍ក្នុងឱកាសនោះ លោក ពិនប្រាកដ អភិបាលរងខេត្តសៀមរាប បានសម្ដែងនូវការកោតសរសើរ និងវាយតម្លៃខ្ពស់ចំពោះឧបាសិកា សុខ ឈាង ព្រមទាំងបុត្រាបុត្រី ចៅប្រុសចៅស្រី ដែលបានបរិច្ចាគនូវទ្រព្យសម្បត្តិផ្ទាល់ខ្លួន ក្នុងការកសាងសមិទ្ធផលនានាក្នុងសាលាបឋមសិក្សាតាព័រនេះ ហើយតាមរយៈនៃអគារសិក្សាថ្មីនេះ នឹងបានជួយសម្រួលដល់ការសិក្សារៀនសូត្ររបស់សិស្សានុសិស្ស និងលោកគ្រូអ្នកគ្រូ ក្នុងការបណ្តុះបណ្តាលកុមារ និងយុវជនជំនាន់ក្រោយឱ្យក្លាយជាទំពាំងស្នងឬស្សីដ៏រឹងមាំ និងជាសសរទ្រូងរបស់ប្រទេសជាតិនាពេលអនាគត ។
ក្នុងនាមម្ចាស់អំណោយនិងក្នុងនាមក្រុមគ្រួសារ ឯកឧត្តម គួច ចំរើន អភិបាលខេត្តកំពង់ចាម បានមានប្រសាសន៍ថាស្រុកជីក្រែងជាស្រុកកំណើតរបស់ឯកឧត្តមតែម្តង ហើយប្រជាជនក្នុងស្រុកនេះ ក៍ដូចជាប្រជាជនកម្ពុជាទូទាំងប្រទេស កាលពីសម័យប៉ុលពត សុទ្ឋតែត្រូវបានទទួលរងនូវទុក្ខសោក លំបាកវេទនាពុំអាចនឹងគណនាបាន ដោយបង្ខំឱ្យធ្វើការជាទំងន់ បង្អត់អាហារ កាប់សម្លាប់ខ្មែរស្លូតត្រង់ ក្រុមគ្រួសារ ឯកឧត្តម ក៏ត្រូវរងទារុណកម្ម ព្រាត់និរាស្ត បាត់បង់ញាតិសន្តាន អ្វីដែលមិនអាចបំភ្លេចបានគឺ លោកឪពុកបង្កើតរបស់ឯកឧត្តម ត្រូវខ្មែរក្រហមសម្លាប់ រហូតមកដល់សព្វថ្ងៃ ពុំមានកូនចៅណាដឹងថាគាត់ត្រូវគេសម្លាប់នៅទីណាឡើយ។
ឯកឧត្តម គួច ចំរើន មានប្រសាសន៍ទៀតថា ក្រោយថ្ងៃរំដោះ៧មករា១៩៧៩ យើងបានចាប់ផ្ដើមកសាងប្រទេសជាតិពីបាតដៃទទេ ពីការខ្វះខាតសព្វបែបយ៉ាងរួមទាំងមូលដ្ឋានគ្រឹះនៃវិស័យអប់រំផងដែរ ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បាននាំមកនូវមោទនភាពសម្រាប់ប្រជាជាតិទាំងមូល លេចចេញនូវសមិទ្ធិផលជាច្រើនស្ទើរស្មានដល់ ដែលសមិទ្ឋផលទាំងអស់នេះ បានកើតចេញពីគោលនយោបាយ ឈ្នះ-ឈ្នះ របស់សម្ដេច ដែលបានធ្វើឱ្យមាតុភូមិរបស់យើងទទួលបានការបង្រួបបង្រួម ផ្សៈផ្សារជាតិ សន្ដិភាពពេញបរិបូណ៌ ដែលនេះជាមូលដ្ឋានគ្រឹះ សម្រាប់ជំរុញការអភិវឌ្ឍសេដ្ឋកិច្ចសង្គមលើគ្រប់វិស័យជាបន្ដបន្ទាប់ រាជរដ្ឋាភិបាលកម្ពុជា ពីនីតិកាល១ ទៅនីតិកាល១ បានដាក់ចេញនូវគោលនយោបាយយុទ្ធសាស្ដ្រចតុកោណ នៅគ្រប់ដំណាក់កាល ពិសេសដំណាក់កាលទី៤ ដើម្បីធានានូវការអភិវឌ្ឍសេដ្ឋកិច្ចសង្គម លើគ្រប់វិស័យក្នុង ដំណាក់កាល ដែលប្រទេសជាតិទើបបានទទួលបានសន្ដិភាពពេញលេញលើផ្ទៃប្រទេស។
ឯកឧត្តម គួច ចំរើន មានប្រសាសន៍បន្ថែមទៀតថា ការកសាងអគារសិក្សាថ្មីនេះ នឹងបានជួយដល់កុមារនៅមូលដ្ឋាននេះ មានលទ្ធភាពទទួលបានការអប់រំដូចៗគ្នា ទៅនឹងកុមារនៅទីក្រុងផងដែរ សំដៅលើកកម្ពស់សិទ្ធិកុមារ សីលធម៌សង្គម និងការជួយគ្នាទៅវិញទៅមក ដើម្បីអនាគតដ៏ប្រពៃ នៃកុមារ។គ្រួសារនិងសង្គមជាតិរីកចម្រើនទៅបានគឺពឹងលើកុមារនិងយុវជនជាទ្រព្យសម្បត្តិនិងជាក្តីសង្ឃឹមរបស់ប្រទេសជាតិទៅអនាគត ប៉ុន្តែសំខាន់ សូមឲ្យសិស្សានុសិស្សទាំងអស់ ត្រូវយកចិត្តទុកដាក់ខិតខំរៀនសូត្រ ស្តាប់ដំបូន្មានម្តាយឪពុក ដើម្បីបង្កើនគុណភាពធនធានមនុស្សរួមគ្នាកាត់បន្ថយភាពក្រីក្រនៅមូលដ្ឋាន និងជាពិសេសថែរក្សាសាលារៀនយើងឱ្យបានស្ថិតស្ថេរគង់វង្សតកូនចៅទៅអនាគត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
