គណៈប្រតិភូមកពីប្រទេសកាណាដា ដឹកនាំដោយឯកឧត្តម Geng Tan សមាជិករដ្ឋសភានៃរដ្ឋ Ontario បានមកជួបពិភាក្សាការងារជាមួយថ្នាក់ដឹកនាំនៃអាជ្ញាធរជាតិអប្សរា ដឹកនាំដោយឯកឧត្តម សុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ នៅស្នាក់ការអាជ្ញាធរជាតិអប្សរា កាលពីរសៀលថ្ងៃទី១៧ ខែមករា ឆ្នាំ២០១៩ ម្សិលមិញនេះ ដើម្បីពិភាក្សាលើកិច្ចសហប្រតិបត្តិការមួយចំនួនទៅថ្ងៃអនាគត ជាពិសេសចង់ឱ្យមានកិច្ចសហការផ្នែកអប់រំបេតិកភណ្ឌ និងចង់ឱ្យមានទំនាក់ទំនងកាន់តែជិតស្និទ្ធរវាងក្រសួងបេតិកភណ្ឌកាណាដា និងក្រសួងវប្បធម៌ និងវិចិត្រសិល្បៈទៅថ្ងៃអនាគតផងដែរ ។
ក្នុងមតិស្វាគមន៍ដល់គណៈប្រតិភូកាណាដា ឯកឧត្តម សុខ សង្វារ បានរ៉ាយរ៉ាប់ពីកាលប្រវត្តិសំខាន់ៗនៃរមណីយដ្ឋានអង្គរ ក៏ដូចជាការងាររបស់អាជ្ញាធរជាតិអប្សរាលើការងារអភិរក្ស និងអភិវឌ្ឍន៍រមណីយដ្ឋានអង្គរ តាំងពីពេលដែលអង្គរជាសម្បត្តិបេតិកភណ្ឌពិភពលោកប្រឈមនឹងគ្រោះថ្នាក់ក្នុងឆ្នាំ១៩៩២ រហូតរមណីយដ្ឋាននេះរួចផុតពីបេតិកភណ្ឌដែលប្រឈមនឹងគ្រោះថ្នាក់ក្នុងឆ្នាំ២០០៤ ពិសេសបានធ្វើបទបង្ហាញអំពីការអភិរក្សប្រាសាទ ការអភិវឌ្ឍក្នុងវិស័យទេសចរណ៍ និងគម្រោងអភិវឌ្ឍន៍ភូមិធម្មជាតិរុនតាឯក ។
បន្ទាប់ពីបានស្តាប់បទបង្ហាញដែលបញ្ជាក់អំពីភាពរស់នៃរមណីយដ្ឋានអង្គរ តាមរយៈកិច្ចប្រតិបត្តិជំនឿសាសនារបស់អ្នកស្រុកអង្គរយ៉ាងខ្ជាប់ខ្ជួនសព្វថ្ងៃនេះរួចមក ឯកឧត្តម Geng Tan បានមានប្រសាសន៍ថា រមណីយដ្ឋានអង្គរជាតំបន់ពុទ្ធសាសនា ដ៏ធំមួយ ហើយរមណីយដ្ឋានអង្គរនឹងមានសក្តានុពលកាន់តែខ្លាំងក្នុងការស្រូបទាញទេសចរ បើរៀបចំឲ្យទៅជាផ្នែកមួយនៃតំបន់ធម្មយាត្រារបស់ពុទ្ធសាសនិកជនជុំវិញពិភពលោក ។
បើតាមប្រសាសន៍របស់ឯកឧត្តម ឈួរ ឆាត កុងស៊ុលកិត្ដិយសព្រះរាជាណាចក្រកម្ពុជា ប្រចាំរដ្ឋ Ontario ឯកឧត្ដមចង់ឱ្យមានទំនាក់ទំនងជិតស្និទ្ធរវាងអាជ្ញាធរជាតិអប្សរា និងកាណាដា ពិសេសគម្រោងអភិវឌ្ឍន៍ភូមិធម្មជាតិរុនតាឯក និងទីភ្នាក់ងារអភិវឌ្ឍន៍អន្តរជាតិកាណាដា ហៅកាត់ថា CIDA ដើម្បីបន្ដអភិវឌ្ឍន៍តំបន់នេះឱ្យកាន់តែប្រសើរទៅមុខទៀត ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
