អណ្ដូតទឹកស្អាត ប្រភេទអណ្ដូងស្នប់អាហ្វ្រីដេស៍ ចំនួន២ ត្រូវបានប្រគលជូនប្រជាពលរដ្ឋ នៅសហគមន៍ ភូមិត្រាវបាក់ (ជប់ស្មាច់) ឃុំតាយ៉ែក ស្រុកសូទ្រនិគមខេត្តសៀមរាបដោយអនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប។
នៅព្រឹកថ្ងៃទី២១ ខែមករា ឆ្នាំ២០១៩ លោកជំទាវបណ្ឌិត គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានមានប្រសាសន៍ថាទឹកស្អាតគឺជាអាហារូបត្ថម្ភដ៏សំខាន់មួយ សម្រាប់ទ្រទ្រង់ជីវិតមនុស្សប្រចាំថ្ងៃ បច្ចុប្បន្នយើងក៏ពុំចាំបាច់បារម្ភពីការខ្វះខាតទឹកសម្រាប់ប្រាស់ ដូច្នេះបងប្អូន ណែនាំឲ្យកូនចៅ ត្រូវពិសាទឹកស្អាត និងទឹកដាំពុះ។
លោកជំទាវ ក៏បានពាំនាំ ការសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា – មិនទុកនរណាម្នាក់ចោល” ។
ព័ត៌មានជាតិ ថ្មីៗ
លោកជំទាវ ក៏បានផ្ដាំផ្ញើដល់បងប្អូនប្រជាពលរដ្ឋថា រដូវនេះជារដូវប្រាំង ត្រូវចេះប្រុងប្រយ័ត្នចំពោះ ភ្លើងផ្សែង និងសុខភាព ពិសេសកូនចៅតូចៗ បើឃើញថាមិនស្រួលត្រូវប្រញាប់បញ្ជូនទៅមណ្ឌលសុខភាពដែលនៅជិតបំផុត និងចងចាំពាក្យស្លោក “ការប្រើប្រាស់ទឹកស្អាត និងមានអនាម័យ នាំឱ្យគ្រួសារមានសុខភាពល្អ និងមានសុភមង្គល” ។
សូមបញ្ជាក់ថា៖ អណ្ដូងទឹកស្អាតនេះជាអណ្ដូងទី ៣៤ និង៣៥ របស់សាខាកាកបាទក្រហមកម្ពុជា ខេត្តសៀមរាប ហើយក៏ជាអណ្ដូងស្នប់ទឹកស្អាតប្រភេទអាហ្វ្រីដេស៍ទី ១១ និងទី១២ ដែរ ក្រោមជំនួយឧបត្ថម្ភរបស់សប្បុរសជនចិន ឈ្មោះ លីវ មីង ហឺ (LIAO MINHUA) និង ហូង វៃ ណាម (HUANG WEINAM )។
អត្ថបទ និង រូបថត ៖ កាកបាទក្រហម
កែសម្រួលអត្ថបទ ៖ លោក សេង ផល្លី
