កាលពីរសៀលថ្ងៃទី២០ ខែមករា ឆ្នាំ២០១៩នេះ លោកស្រី គឹម សុគុន្ធា ចៅក្រមសាលាដំបូងខេត្តសៀមរាប សម្រេចចេញដីការឃុំខ្លួនឈ្មោះ ស៊ិន នុយ ភេទប្រុស អាយុ៣១ឆ្នាំ រស់នៅភូមិតាស្នែ ឃុំដូនកែវ ស្រុកពួក មានមុខរបរកម្មករដាក់ពន្ធនាគារបណ្តោះអាសន្ន ពីបទហិង្សាប្រព្រឹត្តដោយសហពន្ធ័ ឬ អនីតិសង្វាសជន។
សមត្ថកិច្ចខេត្តសៀមរាប បានឲ្យដឹងថា មូលហេតុដែលនាំឲ្យមានការឃុំខ្លួនបុរសរូបនោះ គឺកាលពីថ្ងៃទី១៩ ខែមករា ឆ្នាំ២០១៩នេះ ឈ្មោះស៊ិន នុយ បានផឹកស្រាស្រវឹងរករឿងវាយប្រពន្ធឈ្មោះ កែវ ឡុក អាយុ២៩ឆ្នាំ និងដុតបំផ្លាញផ្ទះខ្លួនឯង ដែលទំហំ៥ម៉ែត្រគុណនឹង៧ម៉ែត្រ ជញ្ជាំងស្លឹកត្នោត ក្រាលក្តារ ប្រក់ស័ង្កសី បណ្តាលឲ្យឆេះទាំងផ្ទះ ទាំងទ្រព្យសម្បត្តិអស់ទាំងស្រុង ។
សមត្ថកិច្ចខេត្តសៀមរាប បានឲ្យដឹងទៀតថា បន្ទាប់ពីប្រើអំពើហឹង្សា និងដុតបំផ្លាញទ្រព្យសម្បត្តិរបស់ខ្លួនឆេះខ្ទេចខ្ទីអស់ តំណាងអយ្យការអមសាលាដំបូងខេត្តសៀមរាប បានបញ្ជាឲ្យសមត្ថកិច្ចចាប់ខ្លួនជនបង្កយកមកចាត់ការតាមច្បាប់ ហើយនៅថ្ងៃទី២០ ខែមករា ឆ្នាំ២០១៩នេះ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បានធ្វើការនាំខ្លួនជនបង្កបញ្ជូនមកសាលាដំបូងខេត្ត ហើយក៏ត្រូវបានចៅក្រមសម្រេចឃុំខ្លួនបណ្តោះអាសន្នតែម្តង ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
