ឯកឧត្តម ទៀ សីហា អភិបាលខេត្តសៀមរាប បានមាន ប្រសាសន៍ថា រយៈកាលកន្លងមក សមាគមចុងភៅកម្ពុជាបានបង្ហាញនូភាពដ៏ប៉ិនប្រសព្វរបស់ខ្លួន តាមរយៈការចូលរួមយ៉ាងសកម្ម ក្នុងលើកស្ទួយពីប្រពៃណី វប្បធម៌ជាតិ ទាំងនៅក្នុងតំបន់ និង ឆាកអន្តរជាតិ សម្រាប់ការចម្អិនអាហារ ព្រោះបញ្ហានេះ គឺជាកត្តាចម្បងដើម្បីបម្រើដល់ភ្ញៀវទេសចរណ៍ជាតិ អន្តរជាតិ ដោយផ្តោតសំខាន់ទៅបញ្ហាអនាម័យ សុវត្ថិភាពចំណីអាហារ ព្រមទាំងគុណភាព ដើម្បីបំពេញតម្រូវការចាំបាច់របស់ភ្ញៀវ បានធ្វើឲ្យកម្ពុជា កាន់តែមានភាពល្បីល្បាញ ។
ឯកឧត្តម ទៀ សីហា មានប្រសាសន៍យ៉ាងដូច្នេះ ក្នុងឱកាសជួបសំណេះសំណាលជាមួយសមាគមចុងភៅកម្ពុជា ដឹកនាំដោយលោក ឡុង ប៉ូរ៉ា ប្រធានសមាគម នៅសាលាខេត្តសៀមរាប កាលពីរសៀលថ្ងៃទី២២ ខែមករា ឆ្នាំ២០១៩ ។
ឯកឧត្តម ទៀ សីហា មានប្រសាសន៍ទៀតថា ម្ហូបអាហារ គឺជាសិល្បៈមួយប្រកបទៅដោយវិជ្ជាជីវៈកម្រិតខ្ពស់ នៃការយល់ដឹងរបស់ចុងភៅម្នាក់ៗ ដែលធ្វើទៅតាមមុខជំនាញរបស់ខ្លួន ដោយទទួលខុសត្រូវខ្ពស់ ដូច្នេះតាមរយៈនេះ សូមឲ្យសមាគមចុងភៅកម្ពុជា គួររួមសហការគ្នា ជាមួយអ្នក សារព័ត៌មានក្នុងស្រុក និង ក្រៅស្រុក ដើម្បីធ្វើការផ្សព្វផ្សាយបង្ហាញនូវស្នាដៃរបស់កូនខ្មែរយើង ព្រោះខេត្តសៀមរាបយើង គឺជាមជ្ឈមណ្ឌលប្រមូលផ្តុំទៅដោយភ្ញៀវទេសចរណ៍ ចូលមកពីគ្រប់មជ្ឈដ្ឋាននៅលើពិភពលោក ឲ្យកាន់តែស្គាល់ ច្បាប់អំពីវប្បធម៌ នៃសិល្បៈក្នុងការចម្អិនម្ហូបអាហាររបស់ចុងភៅកម្ពុជា ៕
អត្ថបទ និង រូបថត : លោក គឿន វេត
កែសម្រួលអត្ថបទ : លោក លីវ សាន្ត
