អាជ្ញាធរជាតិអប្សរា សហការជាមួយរាជរដ្ឋាភិបាលបារាំងក្រោមគម្រោង PAAGERA（ប៉ាជឺរ៉ា） បានសាកល្បង នូវគម្រោងប្រព័ន្ធចម្រោះទឹកកខ្វក់ចេញពីបង្គន់ខ្នាតតូចមួយកន្លែង ដើម្បីកាត់បន្ថយទឹកកខ្វក់ជ្រាបចូលក្រោមដី មានទីតាំងនៅភូមិរហាល សង្គាត់នគរធំ ក្រុងសៀមរាបនៃរមណីយដ្ឋានអង្គរ។
លោក ឡៃ ប៉ូទី បុគ្គលិកបច្ចេកទេស នៃនាយកដ្ឋានគ្រប់គ្រងទឹក នៃអាជ្ញាធរជាតិអប្សរា បានលើកឡើងថាគម្រោងនេះគឺជាប្រព័ន្ធសុវុឌ្ឍិកម្មទឹក ដែលស្តុកទឹកកខ្វក់ ដែលបង្ហូរចេញពីបង្គន់របស់ប្រជាជន ទៅចម្រោះដោយប្រព័ន្ធស្វ័យប្រវត្តិមួយ មុននឹងបញ្ចេញទៅកាន់ប្រព័ន្ធលូធំ។ ក្នុងជំហានសាកល្បង គម្រោងនេះបានធ្វើការតភ្ជាប់ប្រព័ន្ធចម្រោះជាបណ្តាញតាមបង្គន់អនាម័យរបស់ប្រជាជនចំនួន២៨ខ្នងផ្ទះ ដោយប្រើពេលចំនួនបីខែ និងគ្រោងបញ្ចប់នៅចុងខែមករា ឬដើមខែ កុម្ភៈ ឆ្នាំ២០១៩ខាងមុខ។ ប្រព័ន្ធចម្រោះទឹកនេះ ត្រូវបានអនុវត្តក្នុងបំណងលើកកម្ពស់សុខុមាលភាព អនាម័យរបស់ប្រជាជន ក្នុងតំបន់រមណីយដ្ឋានអង្គរ និងកាត់បន្ថយទឹកកខ្វក់ជ្រាបចូលក្រោមដី។
អ្នកស្រី ទេព ព្រឿន ជាអ្នកភូមិ ទទួលបានការតបណ្តាញចម្រោះទឹកកខ្វក់ បានលើកឡើងថា បង្គន់អនាម័យរបស់គាត់បានកសាងឡើងជាង១០ឆ្នាំមុន តែពុំដែលបានរៀបចំឲ្យមានប្រព័ន្ធចម្រោះនោះទេ ដូច្នេះទឹកកខ្វក់ និងមេរោគគឺមាននៅជុំវិញទីនោះ។ អ្នកស្រីបានថ្លែងអំណរគុណដល់អាជ្ញាធរជាតិអប្សរាដែលបានយកចិត្តទុកដាក់លើសុខភាពប្រជាជន ជាពិសេសការបណ្តុះបណ្តាលដល់ប្រជាជនឲ្យចេះរស់នៅស្អាត និងមានអនាម័យ ដើម្បីកាត់បន្ថយនូវប្រភពមេរោគ និងជំងឺទាំងឡាយដែលអាចកើតមាន។
សូមបញ្ជាក់ថា អាជ្ញាធរជាតិអប្សរាតែងតែយកចិត្តទុកដាក់ដោះស្រាយទុក្ខលំបាករបស់បងប្អូនរស់នៅក្នុងតំបន់រមណីយដ្ឋានអង្គរដូចជា អនុញ្ញាតឱ្យមានការជួសជុលកែលម្អផ្ទះ បង្គន់អនាម័យ និងកសាងផ្លូវថ្នល់ ស្ពាន ព្រមទាំងហេដ្ឋារចនាសម្ព័នរូបវន្តចាំបាច់ផ្សេងៗដើម្បីលើកកម្ពស់ស្ថានភាពរស់នៅឲ្យកាន់តែល្អប្រសើនិងមានចំណូលកាន់តែខ្ពស់៕
គួរបញ្ជាក់ថា ដើម្បីលើកកម្ពស់ស្ថានភាពរស់នៅ របស់ប្រជាជន ក្នុងតំបន់រមណីយដ្ឋានអង្គរ អាជ្ញាធរជាតិអប្សរាតែតែងលើកគម្រោងជាច្រើនដូចជាកសាងផ្លូវថ្នល់ ស្ពាន ហេដ្ឋារចនាសម្ព័នរូបវ័ន្តចាំបាច់ផ្សេងៗ ជាពិសេសអនុញ្ញាតឲ្យមានការជួសជុលកែលម្អផ្ទះ ដើម្បីលើកកម្ពស់ស្ថានភាពរស់នៅឲ្យកាន់តែល្អប្រសើ និងមានចំណូលកាន់តែខ្ពស់៕
និយមន័យ (ប្រព័ន្ធសុវុឌ្ឍិកម្មទឹក: ប្រព័ន្ធចម្រោះទឹកឲ្យប្រសើរឡើង។)
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
