ស្ត្រីមេម៉ាយទីទ័លក្រ វ័យ៥៩ឆ្នាំ ទទួលផ្ទះមនុស្សធម៌ ពិលោកជំទាវបណ្ឌិត គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ស្ថិតនៅភូមិអូរតាពុត ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
កាលរសៀលថ្ងៃទី ២២ ខែមករា ឆ្នាំ២០១៨ ក្នុងឱកាសប្រគល់ផ្ទះមនុស្សធម៌ទី៦៤ លោក ម៉ក់ ប្រុស អភិបាលស្រុកសូទ្រនិគម និង ជាប្រធានអនុសាខា និង លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្ត បានឲ្យដឹងថា អ្នកមីង ពៅ ខុន មានកូនប្រុស និងកូនប្រសារ ព្រមទាំងចៅនៅក្នុងបន្ទុក ដែលនាំឲ្យជីវភាពមានការលំបាក បច្ចុប្បន្នគាត់មានមុខរបរជាអ្នកធ្វើប្រហុកលក់បន្ដិចបន្ដូច គ្រាន់បានថវិកាទ្រទ្រង់ជីវភាពគ្រួសារ។ នៅរដូវប្រាំងគឺគ្រួសារគាត់រស់ក្នុងនៅខ្ទមស្លឹក ហើយនៅរដូវទឹកឡើង គាត់យកទូកធ្វើជាទីជម្រករស់នៅប្រចាំថ្ងៃ និងមានការលំបាកវេទនា នៅពេលជួបនូវព្យុះភ្លៀងខ្យល់ម្ដងៗ ។
ដោយមើលឃើញអំពីស្ថានភាពបែបនេះ គណៈកម្មាធិការសាខាកាកបាទក្រហមកម្ពុជាខេត្ត សម្រេច សាងសង់ផ្ទះទំហំ ៥ម៉ែត្រ x ៦ម៉ែត្រ ធ្វើពីឈើ ប្រក់ស័ង្កសីភ្លីធំ ក្រាលក្ដារ ជញ្ជាំងក្ដារ កម្ពស់៤ ម៉ែត្រ ស្ថិតនៅជាប់បឹងទន្លេសាប ជូនអ្នកមីង ឲ្យមានលំនៅដ្ឋានស្នាក់នៅអចិន្ត្រៃយ៍ មិនលំបាកចល័តចុះឡើងដូចពេលមុនឡើយ ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកជំទាវបណ្ឌិត គួយ ណាលីន ឃឹម ប៊ុនសុង បានបញ្ជាក់ថា ក្នុងនាមប្រធានកាកបាទក្រហមកម្ពុជា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែខ្វាយខ្វល់ពីសុខទុក្ខប្រជាពលរដ្ឋទាំងអស់ ដោយមិនប្រកាន់វណ្ណៈ ពណ៌សម្បុរ ជំនឿ សាសនា ឬនិន្នាការនយោបាយណាមួយឡើយ ក្នុងនោះ ឯកឧត្តមបណ្ឌិត ឃឹម ប៊ុនសុង ប្រធាន គណៈកម្មាធិការសាខា ក៏បានយកចិត្តទុកដាក់ដោះស្រាយទុក្ខលំបាករបស់ប្រជាពលរដ្ឋក្នុងខេត្តសៀមរាបជារឿយៗផងដែរ ។
លោកជំទាវ បានសំណូមពរដល់គ្រួសារអ្នកមីង ត្រូវចេះថែរក្សាលំនៅដ្ឋានថ្មី និង សុខភាពរបស់ខ្លួន ព្រមទាំងធ្វើការដាំដុះដំណាំរួមផ្សំ ក្នុងការទ្រទ្រង់ជីវភាពក្នុងក្រុមគ្រួសារផងដែរ ។ លោកជំទាវក៏បាន ធ្វើការក្រើនរំលឹកផងដែរថា ក្នុងរដូវក្តៅនេះ ត្រូវមានការថែរក្សានូវសុខភាព សំខាន់ចំពោះបញ្ហាភ្លើងផ្សែង ដោយពេលនេះជារដូវប្រាំង ដែលធ្វើឲ្យមានការហួតហែង និង ងាយរងនូវគ្រោះមហន្តរាយផ្សេងៗ។ ម្យ៉ាងទៀតតាមសេចក្តីប្រកាសរបស់រាជរដ្ឋាភិបាលកម្ពុជា សូមឲ្យបងប្អូនមានការប្រុងប្រយ័ត្ននៅពេលខាងមុខ ដែលធ្វើឲ្យតំបន់មួយចំនួនខ្វះខាតទឹកប្រើប្រាស់ ដូច្នេះសូមបងប្អូនត្រូវចេះប្រើប្រាស់ទឹកនៅក្នុងមូលដ្ឋានខ្លួន សំខាន់ចំពោះអ្នកធ្វើស្រែប្រាំង ត្រូវចេះថែរក្សាទឹកទុកសម្រាប់ប្រើប្រាស់ប្រចាំថ្ងៃ នៅតាមបឹង ត្រពាំង ស្រះជាដើម ។
ក្នុងនោះលោកជំទាវ ក៏បានសង្កត់ធ្ងន់ចំពោះ បញ្ហាសុខភាពមាតា ទារក និង ស្ត្រីមានផ្ទៃពោះ ក៏ដូចប្រជាពលរដ្ឋទូទៅ ត្រូវបងប្អូនមានការប្រុងប្រយ័ត្នខ្ពស់ អំពីសុខភាព ដោយងាយទទួលរងជម្ងឺផ្សេងៗ តែបើមានជម្ងឺត្រូវប្រញាប់នាំកូនចៅ ទៅកាន់មណ្ឌលសុខភាព ដែលនៅជិតបងប្អូនក្នុងការសង្គ្រោះអាយុជីវិត និង ត្រូវហូបស្អាត ផឹកស្អាត មានអនាម័យល្អ ក្នុងការកាត់បន្ថយការចំណាយថវិកាក្នុងក្រុមគ្រួសារទៀតផង ។
ក្រៅពីផ្ទះមនុស្សធម៌នេះ លោកជំទាវបណ្ឌិត គួយ ណាលីន ឃឹមប៊ុនសុង ក៏បាននាំយកអំណោយចាំបាច់មួយចំនួនសម្រាប់គេហដ្ឋានថ្មីរួមមាន -មុង១ -ភួយ១ -សារុង១ -ក្រមា១ -កន្ទេល១ -អង្ករ៥០គីឡូក្រាម -មី១កេស -ត្រីខ១យួរ ទឹកត្រី១យួរ សម្ភារៈផ្ទះបាយមួយចំនួន និង ថវិកា២០ម៉ឺនរៀល ។ សម្រាប់លោកតា លោកយាយ ដែលអញ្ជើញចូលរួម ម្នាក់ៗទទួលបានសារុង១ និងថវិកា១ម៉ឺនរៀល ផងដែរ ៕
អត្ថបទ និង រូបថត : លោក គឿន វេត
កែសម្រួលអត្ថបទ : លោក សេង ផល្លី
