នៅថ្ងៃទី២៥ ខែមករា ឆ្នាំ២០១៩ ផ្សារម៉ាក្រូខេត្តសៀមរាប នឹងបើកសម្ពោធជាផ្លូវការ បន្ទាប់ពីបានបើកដំណើរការផ្សារម៉ាក្រូទី១របស់ខ្លួន នៅរាជធានីភ្នំពេញ កាលពីចុងឆ្នាំ២០១៧កន្លងទៅ នេះបើតាមប្រសាសន៍លោក Thomas Hammer នាយកប្រតិបត្តិផ្នែកអភិវឌ្ឍពាណិជ្ជកម្មអន្តរជាតិនៃក្រុមហ៊ុន Siam Makro Public Company Limited នៅក្នុងសន្និសីទសន្និសីទសារព័ត៌មានមួយ ដែលប្រារព្ធនៅក្នុងផ្សាម៉ាក្រូសាខាខេត្តសៀមរាប កាលពីថ្ងៃទី២៣ ខែមករា ឆ្នាំ២០១៩។
លោក Thomas Hammer បានឲ្យដឹងនៅក្នុងសន្និសីទនោះថា ផ្សារម៉ាក្រូ គឺជាផ្សារវិនិយោគទុនរួមគ្នា រវាងក្រុមហ៊ុន Siam Makro Public Company Limited និងដៃគូពាណិជ្ជកម្មក្នុងប្រទេសកម្ពុជា ។ ការពង្រីកខ្លួនរបស់ផ្សារម៉ាក្រូ មកកាន់ទឹកដីអង្គរ-សៀមរាប គឺដោយការសម្លឹងឃើញសក្តានុពលនៃកំណើនសេដ្ឋកិច្ចល្អ ទាំងក្នុងវិស័យទេចរណ៍និងសេវាកម្ម ហើយការបើកដំណើរការផ្សារម៉ាក្រូសាខាខេត្តសៀមរាប ដែលជាសាខាទី២របស់ផ្សារម៉ាក្រូនៅកម្ពុជា គឺវាស្របពេលផងដែរ នៃគម្រប់ខួបទី៣០ នៃកិច្ចដំណើរការផ្សារម៉ាក្រូនៅប្រទេសថៃ ។
នាយកប្រតិបត្តិរូបនេះ បានឲ្យដឹងបន្ថែមថា ៖ ផ្សាម៉ាក្រូសាខានៅខេត្តសៀមរាប ស្ថិតនៅជាប់នឹងផ្លូវជាតិលេខ៦ ភូមិគោកត្នោត ឃុំកណ្តែក នៃស្រុកប្រាសាទបាគង មិនឆ្ងាយប៉ុន្មានពីក្រុងសៀមរាបនោះទេ ។ ក្រុមហ៊ុន មានគម្រោង៥ឆ្នាំរបស់ខ្លួន ដើម្បីពង្រីកសាខារបស់ខ្លួនឲ្យបានចំនួន៩សាខា នៅក្នុងប្រទេសកម្ពុជា ដែលនឹងជួយបង្កើតឱកាសការងារដល់ប្រជាពលរដ្ឋកម្ពុជា យ៉ាងតិចប្រមាណជា ២ ០០០ កន្លែង ។ បច្ចុប្បន្ននេះ ផ្សារម៉ាក្រូទាំង២សាខានៅកម្ពុជា មានបុគ្គលិកបំរើការប្រមាណជាង ៥០០នាក់ ក្នុងខេត្តសៀមរាប មានបុគ្គលិកប្រមាណជា ២០០នាក់ ហើយ ៩៨% ជាបុគ្គលិកជនជាតិខ្មែរ ។
តាមការលើកឡើងរបស់ លោក យុត្ថាភូមិ ចំរើនសុខ (Yuthapoom Jarernsuk) នាយកគ្រប់គ្រងផ្សារម៉ាក្រូនៅកម្ពុជា នៅក្នុងសន្និសីទសារព័ត៌មាននោះ៖ ខេត្តសៀមរាប ត្រូវបានជ្រើសរើស សម្រាប់បើកសាខាទី២ របស់ផ្សារម៉ាក្រូ គឺដោយសារភាពលេចធ្លោនៃកំណើនភ្ញៀវទេសចរជារៀងរាល់ឆ្នាំ ហើយផ្សារម៉ាក្រូសង្ឃឹមថា នឹងបានផ្តល់សេវាកម្ម ផ្គត់ផ្គង់ទំនិញ ដល់អតិថិជនផ្នែកសណ្ឋាគារ ភោជនីយដ្ឋាន និងផ្នែកសេវាកម្មអាជីវកម្មម្ហូបអាហារ បានល្អឥតខ្ចោះតាមតម្រូវការ ។
លោកបន្តឲ្យដឹងទៀតថា លើសពីនេះ ផ្សាម៉ាក្រូ ក៏នឹងផ្តល់ការប្រឹក្សាដល់អាជីវករលក់រាយ ដើម្បីបង្កើនសមត្ថភាពប្រកួតប្រជែង តាមរយៈនៃការក្លាយជាសមាជិក របស់ ម៉ាក្រូមិត្តសម្លាញ់ចាប់ហួយផងដែរ ៕
អត្ថបទ និងរូបភាព លោក ងិន គឹមឡេង
កែសម្រួលដោយ លោក សេង ផល្លី
