តាមរយៈសារាចរណ៍ណែនាំ របស់រាជរដ្ឋាភិបាល ចុះថ្ងៃទី១៧ ខែមករា ឆ្នាំ២០១៩ បានណែនាំឲ្យប្រជាកសិករគួររក្សាទឹកទុក និងធ្វើស្រែប្រាំងតែម្ដងប៉ុណ្ណោះ ដោយជំនួសមកវិញនូវដំណាំរួមផ្សំមកវិញ។ ជាក់ស្ដែងនៅដើមឆ្នាំ២០១៩នេះ ផ្ទៃដីធ្វើស្រែប្រមាណ២ម៉ឺនហិចតា ក្នុងស្រុកក្រុងចំនួន៦ នៃខេត្តសៀមរាប រួមមាន ស្រុកសូទ្រនិគម ស្រុកក្រឡាញ់ ស្រុកប្រាសាទបាគង ស្រុកជីក្រែង ស្រុកពួក ក្រុងសៀមរាប ត្រូវបានមន្ទីរធនធានទឹក កំពុងបូមទឹកជួយសង្គ្រោះ។
ក្នុងសារាចរណ៍ដដែលនេះ ក៏បានណែនាំឲ្យអាជ្ញាធរពាក់ព័ន្ធគ្រប់លំដាប់ថ្នាក់ត្រូវរក្សាទឹកទុកនៅតាមមូលដ្ឋាន និងត្រៀមលក្ខណៈជួយសង្គ្រោះប្រជាពលរដ្ឋឲ្យបានទាន់ពេលវេលា។
នៅថ្ងៃទី២៣ ខែមករា ឆ្នាំ២០១៩ លោក នួន គ្រឺស្នា ប្រធានមន្ទីរធនធានទឹក និងឧត្តុនិយម បានមានប្រសាសន៍ថា បច្ចុប្បន្ន ប្រព័ន្ធស្រោចស្រព ក្នុងស្រុកក្រុងទាំង១២ នៃខេត្តសៀមរាប ទាំងអស់មាន ១៥០ប្រព័ន្ធ ក្នុងនោះប្រព័ន្ធធំមាន ៦ប្រព័ន្ធ មធ្យម ៩៧ប្រព័ន្ធ និងតូចមាន ៤៧ប្រព័ន្ធ ដែលស្រោចស្រពបានលើផ្ទៃដីដាំស្រូវ ប្រហែល ៦៥ភាគរយ នៅទូទាំងខេត្ត។
លោក នួន គ្រឺស្នា បានអះអាងថា តាមរយៈការព្យាករណ៍របស់ក្រសួងធនធានទឹក និងឧត្តុនិយមថាខេត្តសៀមរាបនឹងប៉ះពាល់ការខ្វះទឹកប្រើប្រាស់នៅរដូវប្រាំងហើយមន្ទីរបានជូនដំណឹងទៅតាមមូលដ្ឋានតាំងពីខែវិច្ឆិកាឆ្នាំ២០១៨មកម្ល៉េះ។
លោក នួន គ្រឹស្នា បានបន្ថែមថា កាលពីឆ្នាំ២០១៨ ផ្ទៃដីដាំដុះស្រូវប្រាំងមួយចំនួននៅក្នុងខេត្តសៀមរាប ក៏បានជួបប្រទះនឹងការខ្វះខាតទឹកផងដែរ ដូច្នេះមន្ទីរធនធានទឹក និងឧត្តុនិយម បានត្រៀមលក្ខណៈរួចជាស្រេច ដើម្បីយកមកជួយសង្គ្រោះប្រជាពលរដ្ឋនៅតាមមូលដ្ឋាន។
លោកបានបញ្ជាក់ថា ស្រុកដែលប្រឈមនឹងការខ្វះខាតទឹកខ្លាំង សម្រាប់បង្កបង្កើនផលស្រូវប្រាំង មានស្រុកក្រឡាញ់ ស្រុកពួក ស្រុកសូទ្រនិគម និងស្រុកជីក្រែង។ ហើយនៅដើមឆ្នាំ២០១៩នេះ មន្ទីរធនធានទឹក និងឧត្តុនិយម បានធ្វើការជួយសង្គ្រោះផ្ទៃដីដាំដុះស្រូវដោយ៖
• នៅស្រុកក្រឡាញ់ មន្ត្រីជំនាញរបស់មន្ទីរ បានបូមទឹកពីស្ទឹងស្រែង យកមកទុកក្នុងអាងរក្សាទឹក សម្រាប់ជួយក្នុងឃុំសំបួរ ដែលឃុំនេះ ក៏ធ្លាប់បានជួបបញ្ហាខ្វះទឹកប្រើប្រាស់ដែរកាលពីឆ្នាំ២០១៨។
• នៅស្រុកពួក ឃុំល្វា ការបង្កបង្កើនផលផ្ទៃដីធ្វើស្រែ បានកើនឡើងលើសពីឆ្នាំមុន ប្រហែលដប់ដង ៤០០-៥០០ហិចតា ដែលធ្វើឲ្យជួបបញ្ហា ដូចនេះ មន្ទីរធនធានទឹក និងឧត្តុនិយម បានសហការជាមួយអាជ្ញាធរជាតិអប្សរា បូមទឹកពីផ្នែកខាងលើស្ទឹងសៀមរាប សង្គ្រោះផ្ទៃដីធ្វើស្រែបានប្រមាណ ៧០ភាគរយហើយ និងកំពុងបន្តបូមជួយសង្គ្រោះបន្តទៀត។
• នៅស្រុកសូទ្រនិគម ដោយសារឆ្នាំនេះទឹកទន្លេឆាប់ស្រក មន្ទីរបានបូមទឹកពីព្រែកកំពង់ឃ្លាំង ក្នុងឃុំដានរុន រក្សាទុកក្នុងអាងទឹកមួយ តាមការសន្និដ្ឋានរបស់មន្ត្រីជំនាញ នៅពេលខាងមុខ ឃុំចំនួនពីរ គឺឃុំគៀនសង្កែ និង ដានរុន អាចប៉ះពាល់ ផ្ទៃដីកសិកម្មប្រហែល ៧០០ហិចតា។
• នៅស្រុកជីក្រែង មន្ត្រីជំនាញបានសង្កេតឃើញថា ស្ទឹងជីក្រែងចាប់ផ្ដើមស្រកចុះជាបណ្ដើរៗ ដូច្នេះដើម្បីទប់ស្កាត់ការខ្វះខាតទឹក មន្ត្រីជំនាញបានបូមទឹកជាដំណាក់ៗ យកមករក្សាទុកក្នុងអាងនៅផ្នែកខាងលើ ដើម្បីងាយស្រូលដល់ប្រជាពលរដ្ឋផ្នែកខាងក្រោម បង្ហូរចូលស្រែ។
ឆ្លើយតបនឹង នឹងការជួយសង្គ្រោះនេះ ប្រជាពលរដ្ឋនៅឃុំក្រឡាញ់ ស្រុកក្រឡាញ់ ក៏បានលើកឡើងដែរថា ថ្វីត្បិតតែមានទឹកនៅក្នុងអាង ប៉ុន្តែប្រជាកសិករនៅផ្នែកខាងក្រោមពុំមានទឹកគ្រប់គ្រាន់សម្រាប់បូមបញ្ចូលស្រែទេ ដោយសារ ប្រជាកសិករនៅផ្នែកខាងលើភាគច្រើន បូមច្រើនពេក ធ្វើឲ្យផ្នែកខាងក្រោមខ្វះទឹក និងបណ្ដាលឲ្យស្រូវស្កក-ងាប់ មួយវិញទៀត ដោយសារទឹកមិនគ្រប់គ្រាន់ការដាំដុះស្រូវប្រាំង ក៏ត្រូវអូសបន្លាយរហូតដល់ខែវស្សា ទើបមានទឹកសម្រាប់ដាំដុះ។ ពួកគាត់សំណូមពរដល់អាជ្ញាធរជួយអន្តរាគមន៍ ជួយរក្សាទឹកជូនប្រជាកសិករនៅផ្នែកខាងក្រោមផង។
តាមការឲ្យដឹងពីប្រធានមន្ទីរធនធានទឹក និង ឧត្តុនិយម និង មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប នៅក្នុងខែមករានេះ ក្រុមមន្ត្រីជំនាញរបស់មន្ទីរនីមួយៗ នឹងបន្តចុះពិនិត្យស្ថានភាពនៅតាមស្រុកចំនួនបួននេះ រួមមាន ស្រុកក្រឡាញ់ ស្រុកពួក ស្រុកសូទ្រនិគម និងស្រុកជីក្រែង ដើម្បីធ្វើការវាយតម្លៃ និងបង្កើនកម្លាំងជួយសង្គ្រោះបន្ថែមទៀត។
អត្ថបទ៖ សេង ផល្លី
