អ្នកស្រី អូនី ហ៊ីហ្វឺម៉ី គ្រូបង្រៀនភាសាជប៉ុន នៃសមាគមគ្រូបង្រៀនភាសាជប៉ុនអង្គរវត្ត បានមានប្រសាសន៍ថា នៅកម្ពុជា បើនិយាយពីកន្លែងរៀនភាសាជប៉ុនមាននៅតែសៀមរាបនិងរាជធានីភ្នំពេញ ហើយនៅរាជធានីភ្នំពេញ កម្មវិធីប្រឡងមានច្រើនបែបយ៉ាង និងមានភាពប្រកួតប្រជែងយ៉ាងសម្បូរបែប ដូចជាកម្មវិធីសំណួរចម្លើយ កម្មវិធីចំរៀងជាដើម ប៉ុន្តែនៅខេត្តសៀមរាបមានការលំបាក ប្រសិនបើចង់ប្រឡងទាល់តែទៅភ្នំពេញ ដូច្នេះដោយសារបញ្ហាបែបនេះទើបសម្រេចឱ្យមានការប្រឡងនៅខេត្តសៀមរាប ដើម្បីឱ្យអ្នកកំពុងរៀនភាសាជប៉ុនមានការប្រឡងប្រកួតប្រជែងក្រោមការឧបត្ថម្ភគាំទ្រពីស្ថានទូតជប៉ុនប្រចាំនៅកម្ពុជា ។
អ្នកស្រី អូនី ហ៊ីហ្វឺម៉ី បញ្ជាក់ឱ្យដឹងទៀតថា ការប្រឡងនាពេលនេះ គឺជាការប្រឡងវាស់សមត្ថភាពភាសាជប៉ុន មិនមែនប្រឡងថ្លែងសុន្ទរកថានោះទេ ដោយសារខេត្តសៀមរាប មានអ្នកសិក្សាភាសាជប៉ុនច្រើន និងអាយុខុសៗគ្នា មានអ្នកខ្លះជាសិស្សបឋម ខ្លះជាអ្នកធ្វើការ ខណៈសិស្សបឋមមិនអាចធ្វើការថ្លែងសុន្ទរកថាបានល្អនោះទេ ហើយអ្នកធ្វើការក៏មិនមានពេលទន្ទេញដែរ ហេតុនេះទើបសម្រេចឱ្យមានការប្រឡងបែបអំណាន អំណានជាបុគ្គល អំណានជាក្រុម និងការសម្តែងរឿងខ្លីជាដើម។
អ្នកស្រី អូនី ហ៊ីហ្វឺម៉ី បានរំលឹកថា សមាគមគ្រូបង្រៀនភាសាជប៉ុនអង្គរវត្តនេះ បានបង្កើតឡើងនៅខែកុម្ភៈឆ្នាំ២០០៧ ក្រោមគោលបំណងផ្លាស់ប្តូរបទពិសោធន៍បង្រៀនឱ្យកាន់តែល្អ និងមានការប្រាស្រ័យទាក់ទងគ្នាទៅវិញទៅមក ហើយសព្វថ្ងៃមានកន្លែងបង្រៀនភាសាជប៉ុនជាច្រើន ដូចជាសាលាថែរក្សាស្នាមញញឹមកុមារ , គ្រឹះស្ថានអប់រំវប្បធម៌ជប៉ុនអន្តរជាតិ , សាលាតាគឹមិ , សាលាហាតុហ្គោល , សាលាហាយ៉ាកាវ៉ា , សាលាមិស្ហឹមិ , សកលវិទ្យាល័យមេគង្គកម្ពុជា និង អង្គការក្រៅរដ្ឋាភិបាលបេះដូងមាស ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
