ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០១៨និងទិសដៅអនុវត្តឆ្នាំ២០១៩ របស់មន្ទីរកសិកម្មរុក្ខាប្រមាញ់និងនេសាទខេត្តសៀមរាប កាលពីពេលថ្មីៗកន្លងទៅនេះ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានមានប្រសាសន៍ថា ក្នុងខណៈពេលដែលសហភាពអឺរ៉ុប បានសម្រេចយកពន្ឋលើអង្កររបស់កម្ពុជាសម្រាប់ការនាំចូលទៅកាន់ទីផ្សារក្នុងបណ្ដាប្រទេសនៃសហគមអ៊ឺរ៉ុបនោះ សូមកុំមានការភ្ញាក់ផ្អើលចំពោះបញ្ហានេះ ព្រោះនេះជាការប្រព្រឹត្តទៅធម្មតារបស់បណ្តាប្រទេសនីមួយៗ ប្រសិនបើជាមើលឃើញទៅថា ប្រទេសនោះមានការរីចម្រើនអាចឈានទៅដល់ការយកពន្ឋទៅហើយ គឺត្រូវតែយក ។
ឯកឧត្តមរដ្ឋមន្ត្រី មានប្រសាសន៍ទៀតថា បច្ចុប្បន្ននេះ ក្នុងក្រខ័ណ្ឌមួយប្រទេសកម្ពុជាយើងមានកម្រិតជីវភាព ដូច GDP ក្នុងមនុស្សម្នាក់ក្រោម១.០០០ដុល្លារអាម៉េរិក គឺធនាគារអភិវឌ្ឍអាស៊ី , ធនាគារពិភពលោក ក៏ដូចជាធនាគារដទៃទៀត គឺគេអនុគ្រោះឱ្យយើងខ្ចីលុយគេ ដោយមិនគិតការប្រាក់ ឬក៏យកការប្រាក់តិចមែនទែន គឺប្រមាណ ០,១ភាគរយ ប៉ុន្តែបើឡើងខ្ពស់ជាង១.០០០ដុល្លារអាម៉េរិក គេត្រូវតែយកការប្រាក់ជាលក្ខណៈពាណិជ្ជកម្ម ហេតុនេះ ទាមទារឱ្យយើងបង្កើនការអភិវឌ្ឍបន្ថែមទៀត ធ្វើយ៉ាងនាឱ្យតម្លៃដើមនៃផលិតផលរបស់យើងស្ថិតនៅក្នុងកម្រិតមួយប្រកួតប្រជែងបាននាពេលខាងមុខ ដើម្បីឆ្លើយតបទៅនឹងសេចក្តីត្រូវការរបស់យើង ។
ឯកឧត្តម វេង សាខុន មានប្រសាសន៍បន្ថែមទៀតថា តាមរយៈនៃការខិតខំប្រឹងប្រែងរបស់ប្រមុខរាជរដ្ឋាភិបាល ដែលមានសម្ដេចតេជោ ហ៊ុន សែន ជាប្រមុខដឹកនាំ យើងបានឈានបណ្តើរៗរហូតដល់ឆ្នាំ១៩៩៩ យើងផលិតស្បៀងបានប្រមាណជា៤លានតោន ដែលអាចដោះស្រាយស្បៀងជូនប្រជាជនបានទាំងស្រុង ជាពិសេសទន្ទឹមនឹងការដាក់ឱ្យអនុវត្តគោលនយោបាយឈ្នះ ឈ្នះរបស់សម្តេចតេជោ យើងឈានទៅដល់ការផលិតស្បៀងលើសសេចក្តីត្រូវការនៅចាប់ពីអំឡុងឆ្នាំ២០០៩មក ស្របគ្នាទៅនឹងគោលនយោបាយរបស់រាជរដ្ឋាភិបាលក្នុងការនាំអង្ករចេញ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
