កាលពីពេលថ្មីៗកន្លងទៅនេះ ឯកឧត្តម Dmitry Kobylkin រដ្ឋមន្ត្រីក្រសួងធនធានធម្មជាតិ និងបរិស្ថាន នៃសហព័ន្ធរុស្ស៊ី បានមកបំពេញទស្សនកិច្ចស្វែងយល់ពីសក្តានុពលទេសចរណ៍ធម្មជាតិនៅក្នុងតំបន់រមណីយដ្ឋានអង្គរ រួមមានប្រាសាទបាយ័ន , ព្រលានជល់ដំរី , ប្រាសាទតាព្រហ្ម , ស្រះស្រង់ , ទំនប់បារាំង , អាងបារាយណ៍ទឹកថ្លា និងប្រាសាទអង្គរវត្ត ដែលអមដំណើរដោយឯកឧត្តម អ៊ាង សុផល្លែត រដ្ឋលេខាធិការ និងជាតំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន , ឯកឧត្តម សុខ គាង អនុរដ្ឋលេខាធិការក្រសួងបរិស្ថាន , តំណាងគណៈអភិបាលខេត្តសៀមរាប អាជ្ញាធរអប្សរា និងមន្ត្រីពាក់ព័ន្ធមួយចំនួន ។
ឯកឧត្តម Dmitry Kobylkin បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការការពារ និងអភិរក្សសម្បត្តិបេតិកភណ្ឌវប្បធម៌ ធម្មជាតិ និងជាសម្បត្តិបេតិកភណ្ឌមនុស្សជាតិតំបន់អង្គរ ពិសេសឯកឧត្តមបានកោតសរសើរ និង ស្ញប់ស្ញែងដល់បុព្វបុរសខ្មែរ ដែលបានកសាងប្រព័ន្ធគ្រប់គ្រងទឹកបានល្អតាំងពីសតវត្សទី១១ រហូតដល់សព្វថ្ងៃ។
សូមបញ្ជាក់ថា ទស្សនកិច្ចរបស់ ឯកឧត្តម Dmitry Kobylkin នៅតំបន់អង្គរ ខេត្តសៀមរាប រៀបចំឡើងបន្ទាប់ពីឯកឧត្តមបានអញ្ជើញចូលរួមជាសហប្រធានជាមួយឯកឧត្តម ប្រាក់ សុខុន រដ្ឋមន្ត្រីកាបរទេសនៃព្រះរាជាណាចក្រកម្ពុជា នៃកិច្ចប្រជុំនៃគណៈកម្មការអន្តររដ្ឋាភិបាលកម្ពុជា-រុស្ស៊ី ស្តីពីកិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស នៅរាជធានីភ្នំពេញ ដែលបានបញ្ចប់ដោយផ្លែផ្កាកាលពីថ្ងៃទី២៥ ខែមករា ឆ្នាំ២០១៩ ដោយបានពិនិត្យ និងពិភាក្សាលើការវិវឌ្ឍដែលសម្រេចបានពីសម័យប្រជុំលើកទី១០ នៃគណៈកម្មការអន្តររដ្ឋាភិបាល កាលពីថ្ងៃទី២៣ ខែសីហា ឆ្នាំ២០១៧កន្លទៅ ព្រមទាំងបានកំណត់នូវមាគ៌ាថ្មីសម្រាប់សកម្មភាពជាក់លាក់ ដើម្បីលើកកំពស់ភាពជាដៃគូ និងការប្រើប្រាស់សក្តានុពលសម្រាប់វិស័យកិច្ចសហប្រតិបត្តិការថ្មីៗ។
ក្នុងឱកាសនៃកិច្ចប្រជុំនេះដែរ ភាគីទាំង២ ក៏បានពិនិត្យលើវឌ្ឍនភាពនៃភាពជាដៃគូរលើការសហប្រតិបត្តិលើគម្រោងជួសជុល និងអភិរក្សសម្បត្តិបេតិកភណ្ឌពិភពលោក ប្រាសាទព្រះវិហារផងដែរ។
ក្នុងដំណើរទស្សន:កិច្ច នៅព្រះរាជាណាចក្រកម្ពុជា ចាប់ពីថ្ងៃទី២៤ ដល់ថ្ងៃទី២៦ ខែមករា ឆ្នាំ២០១៩ ឯកឧត្តម Dmitry Kobylkin រដ្ឋមន្ត្រីបរិស្ថាននៃប្រទេសរុស្សី បានទទួលការអនុញ្ញាតចូលជួបសម្តែងការគួរសមជាមួយសម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបន្ទាប់មកជួបពិភាក្សាការងារជាមួយ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដើម្បីផ្សារភ្ជាប់ទំនាក់ទំនងមិត្តភាព និងកិច្ចសហប្រតិបត្តិការជាប្រវត្តិសាស្ត្រក្នុងវិស័យបរិស្ថាន រវាងប្រទេសទាំពីរកម្ពុជា-រុស្ស៊ី ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
