ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប បានមានប្រសាសន៍ថា អណ្តូងទឹកស្អាតចំនួន២០អណ្តូង ជាអំណោយរបស់សប្បុរសជន នៃសមាគមអាស៊ីក្យូកុកឹក ប្រទេសជប៉ុន ដែលផ្តល់ជូនប្រជាពលរដ្ឋ នៅក្នុងភូមិរលួសខាងលិច ឃុំរលួស ស្រុកប្រាសាទបាគង នាពេលនេះ គឺពិតជាមានសារៈសំខាន់ណាស់ នៅក្នុងការលើកកម្ពស់ជីវភាពរស់នៅប្រចាំថ្ងៃរបស់ប្រជាពលរដ្ឋយើង ជាពិសេសបានជួយដោះស្រាយនូវបញ្ហាកង្វះទឹកស្អាតប្រើប្រាស់ នៅតាមតំបន់ជនបទបានមួយចំណែកផងដែរ ។
លោក អាគីម៉ូតុ ប្រធានក្រុមប្រតិភូរបស់សមាគមអាស៊ីក្យូកុកឹក ប្រទេសជប៉ុន បានឲ្យដឹងថា មកដល់បច្ចុប្បន្ននេះ សមាគមរបស់លោក បានជួយជាអណ្តូងស្នប់ទឹកស្អាតជូនដល់ប្រជាជនក្នុងខេត្តសៀមរាប បានចំនួន៣៧៤អណ្តូងហើយ ហើយបើទោះបីជាអណ្តូងទឹកស្អាតទាំងនេះ មានចំនួនតិចតួចក៏ពិតមែន ប៉ុន្តែលោកសង្ឃឹមថា វានឹងជួយកាត់បន្ថយការលំបាករបស់ពលរដ្ឋកម្ពុជាបានច្រើន និងជួយលើកកម្ពស់សុខមាលភាពរបស់ប្រជាជនកម្ពុជាផងដែរ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
