ក្នុងឱកាសមកបំពេញទស្សនកិច្ចផ្លូវការនៅខេត្តសៀមរាប ចាប់ពីថ្ងៃទី២៧ ដល់ថ្ងៃទី២៨ មករា ឆ្នាំ២០១៩នោះ ថ្ងៃនេះ
ឯកឧត្តម ឡ ស៊ូកាង រដ្ឋមន្ត្រីក្រសួងវប្បធម៌ និងទេសចរណ៍នៃសាធារណរដ្ឋប្រជាមានិតចិន រួមជាមួយនឹងគណៈប្រតិភូ បានធ្វើទស្សនកិច្ចទៅកាន់ប្រាសាទមួយចំនួនក្នុងរមណីយដ្ឋានអង្គរ ពិសេសទៅកាន់ប្រាសាទដែលស្ថិតក្នុងគម្រោងសហប្រតិបត្តិការរវាងអាជ្ញាធរជាតិអប្សរា និងបណ្ឌិតសភាសម្រាប់បេតិកភណ្ឌវប្បធម៌ចិន ហៅកាត់ថា CSA។
ក្នុងដំណើរទស្សនកិច្ចនេះ ឯកឧត្តម ឡ ស៊ូកាង បានចាប់អារម្មណ៍ខ្លាំងទៅនឹងសំណង់ប្រាសាទបុរាណខ្មែរ ដែលមានក្បូរក្បាច់រចនាល្អឥតខ្ចោះ ស័ក្ដិសមជាសម្បតិ្តបេតិកភណ្ឌពិភពលោក ជាពិសេសទាក់ទងនឹងការងារអភិរក្ស និងជួសជុលប្រាសាទវិញ ឯកឧត្តមលើកឡើងថា វាមិនមែនជាការងាររបស់កម្ពុជាតែម្នាក់ឯងទេ គឺជាកាតព្វកិច្ចរបស់ពិភពលោកទាំងមូល ក្នុងនោះចិនរីករាយក្នុងការរួមចំណែកជួយលើការងារនេះផងដែរ។
អមដំណើរក្នុងទស្សនកិច្ចរបស់រដ្ឋមន្ត្រីក្រសួងវប្បធម៌ និងទេសចរណ៍ចិននេះដែរ គឺមានវត្តមានឯកឧត្តមបណ្ឌិត ស៊ុ ម៉ាប់ អគ្គនាយកអាជ្ញាធរជាតិអប្សរា , ឯកឧត្តម ហង់ ពៅ អគ្គនាយកអាជ្ញាធរជាតិព្រះវិហារ , ប្រធានមន្ទីរទេសចរណ៍ខេត្ត សៀមរាប រួមជាមួយនឹងថ្នាក់ដឹកនាំ និងមន្ត្រីពាក់ព័ន្ធសរុបប្រមាណ ២០រូប ។
ព័ត៌មានជាតិ ថ្មីៗ
គួរបញ្ជាក់ថា រដ្ឋមន្ត្រីក្រសួងវប្បធម៌ និងទេសចរណ៍ នឹងបន្តដំណើរទស្សនកិច្ចទៅកាន់រាជធានីភ្នំពេញនៅថ្ងៃទី២៩ ដើម្បីជួបពិភាក្សាការងារជាមួយរដ្ឋមន្ត្រីក្រសួងទេសចរណ៍ និងស្ថាប័នពាក់ព័ន្ធមួយចំនួនទៀត។ ក្នុងនោះដែរ ឯកឧត្តមគ្រោងនឹងចូលរួមជាអធិបតីភាពក្នុងទិវាឆ្នាំទេសចរណ៍ និងវប្បធម៌ចិន-កម្ពុជាដំបូង ដែលធ្វើឡើងនៅសាលចតុមុខ មុននឹងធ្វើដំណើរត្រឡប់ទៅប្រទេសមាតុភូមិវិញ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
