ជំនួបពិភាក្សា សម្តែងការគួរសមនៅសាលាខេត្តសៀមរាប នាព្រឹកថ្ងៃទី ២៩ ខែ មករា ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាលខេត្ត សៀមរាប បានអនុញ្ញាតឲ្យលោកស្រី ហាលី អាលីន អគ្គនាយិកាបវរកញ្ញា ភពផែនដី លើពិភពលោក និង សហការី ចូលជួបពិភាក្សា និង សម្តែងការគួរសម ។
តាមការបញ្ជាក់របស់លោកស្រី ហាលី អាលីន បានឲ្យដឹងពីគោលបំណងរបស់ប្រតិភូ ក្នុងការចូលជួបពិភាក្សានាពេលនោះ គឺ ដើម្បីសុំការជួយគាំទ្រពីគណៈអភិបាលខេត្តសៀមរាប ពីសកម្មភាពរបស់បវរកញ្ញាភពផែនដី លើពិភពលោក ដែលធ្វើការប្រកួតជ្រើស រើសបវរកញ្ញាភពផែនដី នាថ្ងៃខាងមុខនេះ នៅមជ្ឈមណ្ឌលកោះពេជ្រ រាជធានីភ្នំពេញ នាថ្ងៃទី០២ ខែមិនា ឆ្នាំ២០១៩នេះ ។
លោក ស្រីក៏បានលើកផងដែរ អំពីខ្លឹមសារនៃប្រធានបទ ក្នុងការប្រកួតបវរកញ្ញាភពផែនដីនេះ ដែលមានបវរកញ្ញាមកពីបណ្តាប្រទេស ចំនួន ៥២ មកចូលរួម ដោយផ្តោតទៅលើបរិស្ថានលើភពផែនដី និង ការបង្ហាញអំពីវប្បធម៌ ប្រពៃណីតាមបណ្តាប្រទេសនីមួយៗផងដែរ ។ លោកស្រីក៏បានគូសបញ្ជាក់ថា នេះជាលើកទី១ហើយ ក្នុងការប្រកួតបវរកញ្ញាភពផែនដី ហើយជាកិត្តិយសសម្រាប់ព្រះរាជាណាចក្រ កម្ពុជា ក្នុងការបង្ហាញអំពីអរីយធម៌ វប្បធម៌ ប្រពៃណីរបស់ខ្មែរយើង និង ផ្សព្វផ្សាយទៅលើពិភពលោក ឲ្យកាន់តែមានភាពល្បីល្បាញ ថែមទៀត ។
ក្នុងនោះដែរលោកស្រី ក៏បានលើកនូវសំណូមពរមួយចំនួន ដល់ឯកឧត្តមអភិបាលខេត្ត នៅក្រោយពេលការប្រកួត បវរ កញ្ញានៅឯរាជធានីភ្នំពេញ ក្រុមបវរកញ្ញាគ្រប់បណ្តាប្រទេសទាំងនោះ និង ឆ្ពោះមកខេត្តសៀមរាប ដើម្បីទស្សនាសម្បត្តិវប្បធម៌កម្ពុជា នៅតាមប្រាង្គប្រាសាទនានាសំខាន់ប្រាសាទអង្គរវត្ត ។
ក្នុងនោះដែរឯកឧត្តម ទៀ សីហា ក៏បានធ្វើការសាទរចំពោះកម្មវិធី និង សកម្មភាពដែលលោកស្រីអគ្គនាយិកាបវរកញ្ញា ភពផែនដី ដែលមានបំណងក្នុងការផ្សព្វផ្សាយអំពីអរីយធម៌ វប្បធម៌ ប្រពៃណីជាតិខ្មែរនៅលើឆាកអន្តរជាតិ ។ ម្យ៉ាងទៀតសកម្មភាព ទាំងនេះក៏ជាការលើកស្ទួយដល់ស្ត្រីខ្មែរ ដែលជាប្រជាជាតិមួយមានចរិកទន់ភ្លន់ សុភាពរាបសារ ប្រកបទៅភាពញញឹមស្រស់ស្រាយ តាមក្បាច់រចនាដែលបុព្វបុរសដូនតាខ្មែរយើង បានចារឹកនៅតាមជញ្ជាំងថ្មប្រាង្គប្រាសាទ ។
ក្នុងនោះដែរឯកឧត្តមក៏បានធ្វើការគាំទ្រ ផងដែរ ទៅលើប្រធានបទ អំពីបរិស្ថានភពផែនដី ដោយបច្ចុប្បន្ននេះការបម្រែបម្រួលអាកាសធាតុនៅលើភពផែនដី បានកំពុងចោទ ជាបញ្ហាចំបង ដោយប្រទេស តំបន់មួយចំនួនបានទទួលរងដោយគ្រោះធម្មជាតិ គឺបណ្តាមកពីការបំពុលបរិស្ថាននេះឯង ។
ដូច្នេះ បញ្ហាបរិស្ថាន នេះ នៅខេត្តសៀមរាប ដែលជាខេត្តប្រមូលផ្តុំទៅដោយភ្ញៀវទេសចរណ៍គ្រប់ជាតិសាសន៍ ចូលមកទស្សនាកម្សាន្ត ហើយអាជ្ញាធរខេត្ត ក្រុង ស្រុក ក្រៅពីការងារសន្តិសុខ បានផ្តោតសំខាន់ចំពោះបរិស្ថាន នៅតាមសាធារណៈ និង ទីប្រជុំជនជាដើម ។
ម្យ៉ាងទៀតក្នុងដំណើរមកកាន់ខេត្តនេះ ក៏សូមឲ្យប្រតិភូបវរកញ្ញាភពផែនដី បង្កើននូវអនុស្សាវរីយ៍មួយនៅខេត្តសៀមរាប ដោយរៀបចំពិធីដាំកូនឈើ ដែលក្រោមការឧបត្ថម្ភកូនឈើរបស់មន្ទីរបរិស្ថានខេត្ត ។
ឯកឧត្តម អភិបាលខេត្តក៏បានជម្រាបទៅដល់ប្រតិភូ ចំពោះការអញ្ជើញមកទស្សនាកម្សាន្តនៅតាមប្រាង្គប្រាសាទ និង មានការបង្ហោះ ទ្រូនថតពីលើអាកាសនៅតំបន់អង្គរនោះ គឺផុតដែនសមត្ថកិច្ចរបស់អាជ្ញាធរខេត្តហើយ គឺសូមឲ្យមានការទំនាក់ទំនងជាមួយអាជ្ញាធរ ជាតិអប្សរា ។
ចំពោះលើការងារសន្តិសុខ សណ្តាប់ធ្នាប់ គឺជាភារកិច្ចរបស់ខេត្តដែលត្រូវយកចិត្តទុកដាក់ នៅគ្រប់ទីកន្លែងដែលក្រុម ប្រតិភូទៅទស្សនាកម្សាន្ត ។ ក្នុងនោះដែរឯកឧត្តម ក៏បានគាំទ្រផងដែរ គ្រប់សកម្មភាព បវរកញ្ញាភពផែនដី ដែលបានធ្វើឡើង ដើម្បីផ្តល់ផលប្រយោជន៍ដល់សង្គមជាតិ សំខាន់ក្រោយពេលដែលក្រុមប្រតិភូបវរកញ្ញាពិភពផែនដី បាននិវត្តន៍ទៅកាន់មាតុប្រទេសរបស់ ខ្លួនវិញ ពិតជាធ្វើការផ្សព្វផ្សាយដល់ប្រជាពលរដ្ឋរបស់ខ្លួន អំពីសម្បត្តិវប្បធម៌ជាតិយើង ហើយកត្តាសំខាន់នោះ នឹងធ្វើការទាក់ទាញ ដល់ភ្ញៀវទេសចរណ៍ បានចូលមកកម្ពុជា សំខាន់គឺខេត្តប្រវត្តិសាស្ត្រសៀមរាប ឲ្យកាន់តែមានការកើនឡើងផងដែរ ៕
អត្តបទ៖ម៉ី សុខារិទ្ធ
