នៅថ្ងៃទី៣០ ខែមករា ឆ្នាំ២០១៩នេះ កម្លាំងនគរបាលការិយាល័យគ្រប់គ្រង់អាវុធគ្រឿងផ្ទុះនិងជាតិពុល នៃស្នងការដ្ឋាននគរបាលខេត្ត សហការជាមួយកម្លាំងការិយាល័យសណ្តាប់ធ្នាប់ក្រុង និងកម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម បានចុះត្រួតពិនិត្យការដាក់តាំងលក់នូវផាវកាំជ្រួចនិងគ្រឿងផ្ទុះគ្រប់ប្រភេទ នៅទីផ្សារចំនួន៣ក្នុងក្រុងសៀមរាប រួមមានមានផ្សារលើធំថ្មី , ផ្សារសាមគ្គី និង ផ្សារពោធិលង្ការ ដោយបានអប់រំ និង ណែនាំដល់អាជីវករទាំងអស់ បានយល់ដឹងអំពីផលប៉ះពាល់ និងគ្រោះថ្នាក់ដែលបណ្តាលមកពីរំសេវ ផាវ កាំជ្រួច និងគ្រឿងផ្ទុះគ្រប់ប្រភេទ ដើម្បីបញ្ចៀសនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ ក្នុងឱកាសបុណ្យចូលឆ្នាំថ្មីប្រពៃណីបងប្អូនជនជាតិចិនវៀតណាម ។
គួរបញ្ជាក់ផងដែរថា កាលពីថ្ងៃទី២៩ ខែមករា ឆ្នាំ២០១៩ ម្សិលមិញនេះ គណៈបញ្ជាការឯកភាព នៃរដ្ឋបាលក្រុងសៀមរាប ក៏បានចេញនូវបទបញ្ជាមួយ ហាមមិនឲ្យមានការដុតផាវ កាំជ្រូច ឬបង្កសំឡេងផ្ទុះ លេងល្បែងស៊ីសងគ្រប់ប្រភេទ និងការ ដុតក្រដាសនៅលើចិញ្ចើមផ្លូវ ឬទ្រូងផ្លូវសាធារណៈ ក្នុងឱកាសបុណ្យចូលឆ្នាំ ថ្មីប្រពៃណីជនជាតិចិន និងវៀតណាម ដែលនឹងប្រព្រឹត្តទៅនាពេលខាងមុខនេះ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
