កាលពីរសៀលថ្ងៃទី៣០ ខែមករា ឆ្នាំ២០១៩ម្សិលមិញនេះ នៅសាលាខេត្តសៀមរាប លោកស្រី យូ សុភា អភិបាលរងខេត្ត តំណាងឲ្យរដ្ឋបាលខេត្តសៀមរាប និង លោក សេបាស្យៀន ម៉ារ៉ូ នាយកប្រតិបត្តិអង្គការហ្វ្រេន អ៊ីនធើណាសិនណល ប្រចាំប្រទេសកម្ពុជា បានចុះហត្ថលេខាលើអនុស្សរណៈនៃការយោគយល់គ្នាមួយ ដើម្បីឲ្យរដ្ឋបាលខេត្តសៀមរាប និង អង្គការហ្វ្រេនអ៊ីនធើណាសិនណល កាន់តែសហការគ្នាយ៉ាងជិតស្និទ្ធ ព្រមទាំងការធ្វើផែនការអនុវត្ត និង ត្រួតពិនិត្យដែលពាក់ព័ន្ធទៅនឹងកុមារ ខណៈដែលកម្មវិធីកល្យាណមិត្ត នឹងធ្វើសមាហរណកម្មកុមារ និងយុវវ័យ ចាប់ពីអាយុ០ ដល់ ២៤ឆ្នាំ ដែលរស់នៅតាមចិញ្ចើមផ្លូវ , គំនរសំរាម ឲ្យទៅក្នុងសង្គមឡើងវិញ និង ធ្វើការការពារកុមារ ផ្តល់ទីជំរក និង ការអប់រំបណ្តុះបណ្តាលវិជ្ជាជីវៈ ព្រមទាំងការពារសុវត្ថិភាពកុមារ និង កិច្ចគាំពារការធ្វើសមាហរណកម្មទៅកាន់សាលារៀនឡើងវិញ និង សមាហរណកម្មទៅកាន់គ្រួសារផងដែរ ។
អនុស្សរណៈនៃការយោគយល់គ្នានេះ ភាគីទាំងពីរ ក៏បានធ្វើការឯកភាពក្នុងកិច្ចសហប្រតិបត្តិការជាមួយគ្នា ទៅតាមផ្នែកចំនួន៣ ដែលមាន ២៨ចំណុច មានសុពលភាពរយៈពេល ៣ឆ្នាំ ទើបភាគីទាំងពីរធ្វើការពិនិត្យឡើងវិញ ដែលមានកម្មវិធីសំខាន់ៗ គឺចុះធ្វើការនៅតាមចិញ្ចើមថ្នល់ និង សហគមន៍ , ផ្តល់ការស្នាក់នៅបណ្តោះអាសន្ន , ធ្វើសមាហរណកម្មទៅនឹងសាលារៀនឡើងវិញ , បណ្តុះបណ្តាលវិជ្ជាជីវៈ , ការធ្វើសមាហរណកម្មទៅនឹងសង្គមគ្រួសារឡើងវិញ , ជួយដល់កុមារ និង យុវជនឲ្យផ្តាច់សារធាតុញៀន , ការអប់រំបំណិនជីវិត និង សុវត្ថិភាពកុមារជាដើម ។
លោកស្រី យូ សុភា មានប្រសាសន៍ថា ខេត្តសៀមរាបជាតំបន់ទេសចរណ៍ បានធ្វើឲ្យមានការហូរចូលរបស់ប្រជាជនពនេចរមកពីបណ្តាខេត្តនានា ដែលបានធ្វើឲ្យប៉ះពាល់ដល់សណ្តាប់ធ្នាប់សាធារណៈ ទីប្រជុំជន និង រមណីយដ្ឋានទេសចរណ៍ ព្រមទាំងបង្កនូវភាពអាណាធិបតេយ្យទៀតផង ដែលបញ្ហាទាំងនេះ អាជ្ញាធរខេត្ត តែបានធ្វើជាច្រើនលើក ច្រើនសារ គឺទទួលបានលទ្ធផលទាំងវិជ្ជមានផង និងអវិជ្ជមានផង ។
សេបាស្យៀន ម៉ារ៉ូ នាយកប្រតិបត្តិអង្គការហ្វ្រេន អ៊ីនធើណាសិនណល មានប្រសាសន៍ថា អង្គការហ្វ្រេនអ៊ីនធើណាសិនណល កល្យាលមិត្ត បានមកកាន់ខេត្តសៀមរាប នាឆ្នាំ២០០៥ ហើយបានធ្វើការងារជាមួយកុមាររងគ្រោះ កុមារអាណាថា កុមារដើរដេកតាមចញ្ចើមផ្លូវ កុមាររស់នៅតាមគំនរសំរាម និង រើសសំរាម ព្រមទាំងកុមារដើរសុំទាន និង កុមារប្រកបរបរផ្លូវភេទជាដើម ខណៈដែលគម្រោងរបស់អង្គការ ដោយផ្តោតឆ្ពោះទៅលើការកសាងអនាគត និង ជួយជីវិតកុមារ យុវជន ព្រមទាំងធ្វើការអប់រំ បណ្តុះបណ្តាល និង ការពារសុវត្ថិភាពកុមារ និង កិច្ចគាំពារ ការធ្វើសមារណកម្មទៅកាន់សាលារៀនឡើងវិញ និង សមារណកម្មទៅកាន់គ្រួសារទៀតផង ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
