លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ក្នុងមួយឆ្នាំសិក្សា ២០១៧-២០១៨ ន្លងទៅនេះ ក៏ដូចជាបណ្តាឆ្នាំកន្លងមក វិស័យអប់រំនៅទូទាំងខេត្តសៀមរាប ទទួលបាននូវការរីកចម្រើនជាបន្តបន្ទាប់ ក្នុងកម្រិតមួយគួរឲ្យកត់សម្គាល់ ព្រោះថា មានអគារសិក្សារាប់សិបខ្នងត្រូវបានកសាងថ្មី និង ជួសជុលថែរក្សា ក្នុងនោះគឺមានអគារសិក្សាដ៏ច្រើន ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមទាំងអគារសិក្សារបស់ក្រសួងអប់រំ , អគារសិក្សារបស់សប្បុរសជន បាននឹងកំពុងពង្រឹងធានាការរៀនសូត្ររបស់កុមារ និង យុវជននៅគ្រប់ទីកន្លែង ដែលបាននឹងកំពុងបង្កើនផ្តល់សេវាអប់រំដល់កុមារតូចៗ អត្រាចូលរៀនរបស់កុមារបានកើនឡើងរហូតដល់៩៨ភាគរយនៅទូទាំងខេត្ត អត្រាឡើងថ្នាក់កើនដល់ជិត៩០ភាគរយនៅសាលាកម្រឹតមធ្យមសិក្សា , អត្រាត្រួតថ្នាក់និងបោះបង់ការសិក្សាត្រូវបានកាត់បន្ថយ ហើយអត្រាឆ្លងភូមិសិក្សាបានកើនឡើងជាលំដាប់ ជាពិសេសសិស្សស្រី ។
លោក ពិន ប្រាកដ មានប្រសាសន៍ទៀតថា បើទោះជាយ៉ាងណា ក៏ត្រូវតែបន្តធានាឲ្យបានការចូលរៀនរបស់កុមារទាំងអស់គ្នា ប្រកបដោយសមធម៌ បរិយាប័ន្ន និងមានគុណភាព ឆ្លើយតបនឹងកាតព្វកិច្ចសិក្សា ដែលមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា និង និន្នាការអន្តរជាតិ ក្នុងដំណាក់កាលសាកលភាវូបនីយកម្ម ព្រោះថា សាលារៀនជាច្រើនបាននឹងកំពុងក្លាយជាសួនសិក្សាជាទីមេត្រីរបស់កុមារ និង ជាគំរូដល់សហគមន៍ ហើយការផ្សារភ្ជាប់រវាងសាលារៀន និង សហគមន៍ កាន់តែបានជិតស្និតបន្ថែមទៀត តាមរយៈនៃការធ្វើសមាហរណកម្មជាបណ្តើរៗ ការងារអប់រំទៅនឹងផែនការអភិវឌ្ឍឃុំ/សង្កាត់ ដែលធ្វើឲ្យសាលាត្រូវបានក្លាយជារបស់សហគមន៍ ដោយសហគមន៍ និង ដើម្បីសហគមន៍ ៕
លោក ពិន ប្រាកដ មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងពិធីបិទសន្និបាតបូកសរុប វាយតម្លៃការងារអប់រំ យុវជន និងកីឡាខេត្តសៀមរាប ឆ្នាំសិក្សា ២០១៧-២០១៨ និង លើកទិសដៅអនុវត្តបន្ត ឆ្នាំសិក្សា ២០១៨-២០១៩ នៅសាលាគរុកោសល្យ និងវិក្រឹតការខេត្ត នារសៀលថ្ងៃទី៣០ ខែមករា ឆ្នាំ២០១៩នេះ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
