ឯកឧត្តម ទៀ សីហា អភិបាលខេត្តសៀមរាប បានប្រកាសគាំទ្រដល់សកម្មភាពនៃគម្រោងលាភ និង សមាសភាពអ្នកសម្របសម្រួល ព្រមទាំងធ្វើការជំរុញ និង ធ្វើកិច្ចសហការ ដើម្បីជាផលប្រយោជន៍ដល់សង្គមជាតិ និង ប្រជាជនកម្ពុជា សំខាន់ប្រជាជនខេត្តសៀមរាប ក្នុងការលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋទៅអនាគត ពីព្រោះកិច្ចការងារគម្រោងលាភនេះ ខេត្តសៀមរាបមានអភិបាលរងខេត្តមួយទទួលបន្ទុក ហើយក៏បានអនុវត្តនាពេលកន្លងមកផងដែរ ។
ឯកឧត្តម ទៀ សីហា បានប្រកាសយ៉ាងដូច្នេះ បន្ទាប់ពីបានជួបពិភាក្សាជាមួយប្រតិភូគម្រោងលាភ ដឹកនាំដោយឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានសម្របសម្រួលគម្រោងលាភអមដោយមន្ត្រីធនាគារពិភពលោកចូលរួមផងដែរ កាលពីរសៀលថ្ងៃទី៣០ ខែមករា ឆ្នាំ២០១៩ ម្សិលមិញនេះ នៅសាលាខេត្តសៀមរាប ។
មានប្រសាសន៍ក្នុងឱកាសជួបជាមួយឯកឧត្តម ទៀ សីហា កាលពីម្សិលមិញនេះ ឯកឧត្តម ងី ច័ន្ទ្រផល បានបញ្ជាក់ថា គម្រោងនេះគឺ បានធ្វើប្រតិបត្តិការជាយូរមកហើយ ក្នុងគោលដៅជួយដល់ប្រជាពលរដ្ឋងាយរងគ្រោះ ដោយផ្តល់នូវជាពូជកសិកម្មដល់ពួកគាត់ , ការធ្វើផ្លូវនៅតាមមូលដ្ឋាន សំខាន់ធ្វើឲ្យបងប្អូនប្រជាពលរដ្ឋចេះជួយខ្លួនឯង ហើយយើងក៏ មានមន្ត្រីសម្របសម្រួលជាអ្នកផ្តល់នូវបច្ចេកទេស ហើយគម្រោងនេះ ក៏មិនមែនជាគម្រោងអភិវឌ្ឍន៍មូលដ្ឋានដូចមុននោះឡើយ គឺជាគម្រោងមួយផ្តល់សមត្ថភាពដល់សហគមន៍ ឲ្យពួកគាត់ចេះជួយខ្លួនឯង ព្រមទាំងធ្វើការចងក្រងជាក្រុម និង ធ្វើការពង្រឹងសមត្ថភាពថ្នាក់ខេត្ត ថ្នាក់ស្រុក ឃុំ ទៀតផង ។
ឯកឧត្តម ងី ច័ន្ទ្រផល បានបញ្ជាក់ទៀតថា ដើម្បីឲ្យគម្រោងនេះទទួលបានជោគជ័យ ស្នើសុំឯកឧត្តមអភិបាលខេត្ត ជួយធ្វើការជំរុញដល់សកម្មភាពការងារគម្រោងនេះ រួមទាំងទទួលស្គាល់សមាសភាព និង កិច្ចសហការជាមួយមន្ត្រីគម្រោង ព្រោះថាគម្រោង ក៏បានធ្វើការជ្រើសរើសមន្ត្រី សម្របសម្រួលថ្នាក់ស្រុក ហើយថ្នាក់ឃុំក៏មានអ្នកសម្របសម្រួលថ្នាក់ឃុំ ដើម្បីជ្រើសរើសធ្វើការជាមួយគ្នា ដូច្នេះសង្ឃឹមថា ឆ្នាំនេះគម្រោងយើង បានដំណើរការទៅបានលឿន បើទោះបីនៅមិនទាន់ទទួលបានលទ្ធផលក៏ពិតមែន ហើយចំពោះការងារបច្ចេកទេស គឺមានមន្ត្រីធនាគារពិភពលោក និង ចុះមកធ្វើការពិនិត្យ សហការ ក្នុងរយៈពេល៣ខែម្តង ៕
អត្ថបទ និង រូបថត ៖ លោក ម៉ី សុខារឹទ្ធ
កែសម្រួលអត្ថបទ ៖ លោក លីវ សាន្ត
