បន្ទាប់ពី លោកជំទាវ ឈឹម ពៅសុកាន់ឌី ទទួលបានការតែងតាំង ពីព្រះមហាក្សត្រ នៃព្រះរាជាណាចក្រកម្ពុជា ជាអគ្គនាយិកាថ្មី នៃអគ្គនាយកដ្ឋានវិទ្យុជាតិកម្ពុជា ជំនួស ឯកឧត្តម ទន់ សារ៉ាត ដែលបានចូលនិវត្តន៏ នៅថ្ងៃទី៣០ ខែ មករា ឆ្នាំ ២០១៩ លោកជំទាវ ត្រូវ ប្រកាសចូលកាន់តំណែងជាផ្លូវការ ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន។
នៅក្នុងឱកាសនោះ ឯកឧត្តម លី វ៉ានហុង ប្រតិភូរាជរដ្ឋាភិបាលកម្ពុជា ទទួល បន្ទុកជា អគ្គ នាយក រដ្ឋបាល និងហិរញ្ញវត្ថុ នៃក្រសួងព័ត៌មាន បានអាននូវ ព្រះរាជក្រឹត្យ របស់ ព្រះមហា ក្សត្រ នៃព្រះរាជាណាចក្រកម្ពុជា ក្នុងការតែងតាំង លោកជំទាវ ឈឹម ពៅសុកាន់ឌី ជា អគ្គ នាយិកា នៃអគ្គនាយកដ្ឋានវិទ្យុជាតិ កម្ពុជា និង ឯកឧត្តម ទន់ សារ៉ាត ជារដ្ឋលេខាធិការ ក្រសួង ព័ត៌មាន ។
បន្ទាប់ពីបានចូលកាន់តំណែងជាផ្លូវការ ជាអគ្គនាយិកា វិទ្យុជាតិកម្ពុជា លោកជំទាវ ឈឹម ពៅសុកាន់ឌី បានឡើងធ្វើការប្តេជ្ញាចិត្ត ខិតខំជម្រុញអោយ ថ្នាក់ដឹកនាំគ្រប់នាយកដ្ឋាន និងការិយាល័យ ចំណុះអោយ អគ្គនាយកដ្ឋាន វិទ្យុជាតិកម្ពុជាទាំងមូល ពង្រឹងបន្ថែមលើ ការងារគ្រប់ផ្នែក ទាំងពេលវេលា បំពេញការងារ ទាំងការងារផ្សព្វផ្សាយព័ត៌មាន ទាំង កម្មវិធី ផ្សាយ ហើយត្រូវបាន ពង្រីកបន្ថែមនូវចំណុចខ្លាំង ដែលជាគុណប្រយោជន៏ ក្នុងការ ផ្សព្វ ផ្សាយ បំរើ ប្រជារាស្ត្រ និងសង្គមជាតិ ពិសេសអនុវត្តន៏តាមអនុសាសន៏របស់ប្រមុខនៃ រាជរដ្ឋា ភិបាលកម្ពុជា ដោយយកចិត្តទុកដាក់ ទប់ស្កាត់និង ប្រឆាំង ព័ត៌មានក្លែងក្លាយ ដែលបំពុល សង្គម ដើម្បីឈានទៅ អនុវត្តន៏អោយបានសម្រេច តាមទិស ដៅរបស់ក្រសួង ដែលបាន កំណត់ ពិសសរួមចំណែកអនុវត្តន៏ អោយបាន ជោគជ័យ នូវយុទ្ធសាស្ត្រ ចតុកោណដំណាក់ កាលទី ៤ របស់រាជរដ្ឋាភិបាល កម្ពុជាអាណិត្ត ទី ៦ ។
លោកជំទាវ ឈឹម ពៅសុកាន់ឌី បានធ្វើការបញ្ជាក់ថា ដើម្បីអោយការងារ វិទ្យុជាតិ កម្ពុជាទាំងមូល សម្រេចបាន ជោគជ័យ គឺមិនអាស្រ័យតែលើរូបលោក ជំទាវម្នាក់ឯង នោះទេ ចាំបាច់ណាស់ត្រូវមានការចូលរួម ពីគ្រប់មជ្ឍដ្ឋាន នៃថ្នាក់ដឹកនាំអគ្គនាយកដ្ឋាន វិទ្យុជាតិ កម្ពុជា ទាំងមូលដែលក្នុងនោះរាប់បញ្ជូល ទាំងបុគ្គលិក ថ្នាក់ក្រោមផងដែរ។
ឯកឧត្តម ទន់ សារ៉ាត អតីតអគ្គនាយក ទូរទស្សន៏ជាតិកម្ពុជា បានឡើងធ្វើ របាយការណ៏ ជម្រាបជូនពីលទ្ធផលការងារសំខាន់ៗ ដែលរូបលោកសម្រេច អនុវត្តន៏បានក្នុងអាណិត្ត ជា អគ្គនាយកវិទ្យុជាតិ រយះពេលជាង ៣ ឆ្នាំ ៨ ខែ មក នេះ ទាំងលើការបង្កើត ជាកម្មវីធីថ្មីៗ ជាច្រើន រួមជាមួយការផ្សាយម៉ាស៊ីនថ្មី កំលាំង ខ្លាំង ទាំង AM និង FM ។
ជាមួយនេះក៏បង្កើត បានឡើងវិញ នូវសិល្បះករ សិល្បះការិនី ជាស្រករ ទី ២ នៃក្រុមសិល្បះបូរាណ និងសម័យ ធ្វើអោយកម្មវិធី សិល្បះបូរាណ ផលិតបាននូវទម្រង់សិល្បះល្អៗ ហើយមានការពេញនិយម ពីអ្នកស្តាប់។ ទន្ទឹមជាមួយគ្នានេះដែរ វិទ្យុជាតិក៏សម្រេចបាននូវ កិច្ចការងារនានាជា ច្រើន ផ្សេងទៀត ពិសេសការងារ បំពងសំលេង នូវពិធីបុណ្យជាតិ ធំៗ ដោយ ធានាបាននូវ គុណភាព សំលេង និងខ្លឹមសារផ្សាយ។ ឯកឧត្តម ទន់ សារ៉ាត បាន បញ្ជាក់ថា ការងារដែល សម្រេចបានកន្លងមកនេះ អាស្រ័យដោយមានការយក ចិត្តទុកដាក់ ជាប្រចាំ និងជួយ ទំនុក បំរុង ទាំងស្មារតី សំភារះ ថវិកា ពី ឯកឧត្តម រមន្ត្រី ខៀវ កាញារីទ្ធ ។
មានប្រសាសន៏ក្នុងឱកាសនោះ ឯកឧត្តម រដ្ឋមន្ត្រី ខៀវ កាញារីទ្ធ បានលើក ឡើងថា ការតែងតាំង នារីដែលមានសមត្ថភាព ជាអគ្គនាយិកា វិទ្យុជាតិកម្ពុជា នាឱកាសនេះ គឺជាការ រួមចំណែកលើកកម្ពស់តូនាទី នារីនៅក្នុងសង្គមជាតិ និង ដោយឡែកនៅក្នុង ប្រពន្ធ័ផ្សព្វ ផ្សាយ។ ទាក់ទងទៅនិងការងារព័ត៌មាន ឯកឧត្តម បានធ្វើការបញ្ជាក់ថា បច្ចុប្បន្ននៅ កម្ពុជា ព័ត៌មាន កំពុងតែជាសង្គ្រាមក្តៅគគុក ពិសេស គឺ ព័ត៌មានក្លែងក្លាយ Fake News កើតមានយ៉ាង ច្រើនដែលគេធ្វើឡើង ដើម្បីផ្តូលរដ្ឋាភិបាល ដែលជាអ្នកទទួលខុសត្រូវទាំងអស់ អោយ ដូលរលំ នៅថ្ងៃខាងមុខ ប្រៀបដូចជាសត្វ កណ្តៀរ វា ស៊ី ខាងក្នុងបន្តិចម្តងៗ រហូតដល់ រលំឈើ នោះតែម្តង។ ដូចនេះគឺគេធ្វើសង្គ្រាមព័ត៌មាន ក្លែងបន្លំ ដើម្បីអោយប្រជាជន បាត់ការ ទុកចឹត្ត មកលើរាជរដ្ឋាភិបាល ក្រោមការដឹកនាំ របស់សម្តេច តេជោ នាយករដ្ឋមន្ត្រី ហ៊ុន សែន ។
ទាំងនេះគឺទាមទារអោយ មន្ត្រីព័ត៌មាន នៅគ្រប់ ជាន់ថ្នាក់ទាំងអស់ នៃក្រសួងព័ត៌មាន មិនត្រូវមានការធ្វេសប្រហេសនោះទេ ព្រោះព័ត៌មាន ក្លែងបន្លំមានច្រើន ខណះប្រជាជន ចេះយល់ពីដំណឹង តែដំណឹង ខ្លះវាក្តៅ ហើយចាប់យកភ្លាម ដោយពេលខ្លះមិនបានពិចារណា និងរកប្រភព ច្បាស់លាស់នោះទេ គឺទទួលយកតែម្តង ។ ដូច្នេះមន្ត្រី ព័ត៌មាន ត្រូវបង្ហាញ អោយគេដឹងថា រឿងអ្វីៗទាំងអស់តែងមាន មុខ ២ យ៉ាងតិច ហើយមន្ត្រីព័ត៌មាន ត្រូវបង្ហាញ មុខអីដែលពិតប្រាកដ។
អ្វីដែលសំខាន់ជាងនេះ គឺមន្ត្រីព័ត៌មាន តាម មន្ទីរព័ត៌មាន ខេត្ត ក្រុង ទាំងអស់ត្រូវសកម្មក្នុងការងារ នៅពេលមាន រឿងអ្វីមួយ កើតឡើងក្នុងខេត្តរបស់ខ្លួន ត្រូវរក ប្រភពព័ត៌មាន ដែលពិតមកផ្សាយ ត្រឡប់ទៅ វិញអោយបានលឿនបំផុត ជៀសវាង ការយល់ ច្រឡំពីសាធារណះជន។នៅក្នុងឱកាសនោះដែរ ឯកឧត្តម រដ្ឋមន្ត្រី ខៀវ កាញារីទ្ធ បានធ្វើការផ្តាំផ្ញើ ដល់ លោកជំទាវ អគ្គនាយិកាថ្មី វិទ្យុជាតិកម្ពុជា ត្រូវបន្តពង្រឹងស្មារតី សាមគ្គីភាពផ្ទៃក្នុង អោយបានរឹងមាំ សហការគ្នា ដើម្បីជោគេជ័យការងារ ព្រោះការងារព័ត៌មាន មិនអាចអ្នក ណា ម្នាក់ធ្វើតែម្នាក់ ឯងនោះទេ គឺត្រូវការរួមគ្នាទើបបានល្អ និងគ្រប់ ជ្រុងជ្រោយ៕
អត្ថបទ និង រូបថត ៖ ទទក
