នៅព្រឹកថ្ងៃទី០១ ខែកុម្ភៈ ឆ្នាំ២០១៨នេះ នៅបញ្ជាការដ្ឋានកងរាជអាវុធហត្ថខេត្តសៀមរាប បានធ្វើការ ផ្សព្វផ្សាយអនុសាសន៍១០ ចំណុច របស់សម្តេច អគ្គមហាសេនាបតីតេជោ ហ៊ុន សែន ដែលបានថ្លែងក្នុងថ្ងៃប្រារព្ធពិធីខួប២០ឆ្នាំ ថ្ងៃកំណើតកងទ័ពជើងគោក កាលពីថ្ងៃទី២៤ ខែមករា ឆ្នាំ២០១៩កន្លងទៅនេះ។
ក្នុងឱកាសនោះដែរ ក៏មានការផ្សព្វផ្សាយញ្ញត្តិថ្កោលទោសរបស់ ឯកឧត្តម នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ចំពោះ ទណ្ឌិត សម រង្សី ទៅដល់នាយទាហាន នាយទាហានរង នៃបញ្ជាការដ្ឋានកងរាជអាវុធហត្ថខេត្តសៀមរាប សំដៅលើកកម្ពស់ ឆន្ទៈ ស្មារតីរបស់កងកម្លាំងកងរាជអាវុធហត្ថ ក្នុងការប្ដេជ្ញាដាច់ខាត ការពាររាជរដ្ឋាភិបាលកម្ពុជាស្របច្បាប់ ដែលមានសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្ដេជ្ញាការពារបូរណភាពទឹកដី ការពារ និងរក្សាសន្តិសុខ សុវត្ថិភាព ស្ថេរភាព នយោបាយ និងការអភិវឌ្ឍនៅកម្ពុជា។ ព្រមជាមួយគ្នានោះ កងកម្លាំងកងរាជអាវុធហត្ថខេត្ត ក៏បានប្ដេជ្ញាប្រឆាំងដាច់ខាត នូវរាល់ការញុះញង់បំបែកបំបាក់ អំពើក្បត់ជាតិ ក្បត់ប្រជាជនឯង របស់ទណ្ឌិត សម រង្សី ផងដែរ។
សូមជម្រាបដែរថា អនុសាសន៍១០ ចំណុច របស់សម្តេច អគ្គមហាសេនាបតីតេជោ ហ៊ុន សែន ក្នុងពិធីខួប២០ឆ្នាំ ថ្ងៃកំណើតកងទ័ពជើងគោកនោះ រួមមាន៖
ទី១-ត្រូវអនុវត្តឲ្យខ្ជាប់ខ្ជួននូវខឿន ការពារជាតិរបស់ប្រជាជន ព្រោះកងទ័ពកើតចេញពីប្រជាជន និងដើម្បីប្រជាជន។
ទី២-ត្រូវចូលរួមជាមួយកម្លាំងផ្សេងៗទៀត ដើម្បីរក្សាសន្តិភាព ទប់ស្កាត់អំពើរអសកម្ម គ្រឿងញៀន ចោរកម្ម ការពារសុវត្ថិភាពភូមិឃុំ ដើម្បីឲ្យប្រទេសជាតិមានសេចក្តីសុខ ជាពិសេសរួមគ្នារក្សាសន្តិភាព។
ទី៣-ខិតខំប្រយុទ្ធប្រឆាំងអំពើរភេវរកម្ម ទប់ស្កាត់អំពើរប៉ុនប៉ង ផ្តួលរំលំរាជរដ្ឋាភិបាលស្របច្បាប់ ទប់ស្កាត់មិនឲ្យមានការធ្វើបដិវត្តន៍ពណ៌ តាមរូបភាពណាក៏ដោយ បើឃើញថា ខុសច្បាប់រដ្ឋធម្មនុញ្ញ នៃព្រះរាជាណាចក្រកម្ពុជាហើយ គឺត្រូវតែបង្ក្រាបឲ្យទាន់ពេលវេលា។
ទី៤-កងទ័ពទាំងអស់មិនថានៅក្នុង ឬនៅក្រៅប្រទេសទេ គឺត្រូវចូលរួមជាមួយប្រជាពលរដ្ឋ ដែលជួបការលំបាក ក្រីក្រខ្វះខាត កុំធ្វើឲ្យប្រជាជនស្រក់ទឹកភ្នែក ដោយសារទង្វើអាក្រក់អ្វីមួយពីកងទ័ព។
ទី៥-កងទ័ពត្រូវគាំទ្រដល់ផ្នែកច្បាប់ ដូចជាចូលរួមការពារថែរក្សាព្រៃឈើ រក្សាធនធានធម្មជាតិផ្សេងៗ និងចូលរួមទប់ស្កាត់បទល្មើសនានា។
ទី៦-គាំទ្រការប្រមូលចំណូលថិវការជាតិ ទាំងនៅថ្នាក់ជាតិ និងថ្នាក់ក្រោមជាតិ ទប់ស្កាត់អំពើរពុករលួយ ដើម្បីជាប្រយោជន៍ជាតិ និងប្រទេសរីកចម្រើន ព្រមទាំងចូលរួមបង់ពន្ធបង្កើនដល់ចំណូលជាតិ។
ទី៧-ខិតខំបង្កើនវិន័យកងទ័ព ឲ្យបានខ្ជាប់ខ្ជួន ជាពិសេសពេលដែលកម្ពុជា មានឧបករណ៍សម្ភារគ្រប់គ្រាន់ហើយ តែបែរជាយើងមិនចេះប្រើប្រាស់ ត្រូវអនុវត្តតាមបទបញ្ជា និងត្រូវបង្កើនការហ្វឹកហាត់ ទាំងតាមក្បួនខ្នាតទ័ពត្រឹមត្រូវ និងហាត់ប្រាណដើម្បីរក្សាសុខភាព។
ទី៨-ត្រូវយកចិត្តទុកដាក់ថែទាំសម្ភារៈ ដែលកម្ពុជាមាន ដើម្បីធានាថាអាវុធរបស់កម្ពុជា នៅតែអាចប្រើប្រាស់ បាននៅពេលដែលត្រូវការបន្ទាន់។
ទី៩-យកចិត្តទុកដាក់ដល់ជីវភាពកងទ័ព ដូចជាជំរកស្នាក់នៅ ចំណីអាហារ សម្ភារៈ ត្រូវផ្គត់ផ្គង់សព្វបែបយ៉ាងសម្រាប់កងទ័ព ជាពិសេសត្រូវបង្កើនការសាងសង់ផ្ទះ ដល់កងទ័ពដែលកំពុងឈរជើងតាមព្រំដែន។
និងទី១០-កងទ័ពត្រូវដើរតួនាទី ជាអ្នកការទូតយ៉ាងសំខាន់ ជាមួយប្រទេសជិតខាង គឺរក្សាទំណាក់ទំនងជាមួយមិត្តចាស់ និងបង្កើនទំនាក់ទង និងសហប្រតិបត្តិការល្អជាមួយដៃគូថ្មីៗ ជាមួយអង្គភាពប្រទេជិតខាង តាមរយៈការផ្លាស់ប្តូរ ទស្សនកិច្ចគ្នាទៅវិញទៅមក និងតាមរយៈការផ្លាស់ប្តូរចំណេះដឹង និងយុទ្ធវិធីផ្សេងៗជាមួយយកងទ័ព នៃបណ្រាលប្រទេសនានា៕
អត្ថបទ ៖ លោក សេង ផល្លី
រូបភាព ៖ កងរាជអាវុធហត្ថខេត្តសៀមរាប
