សមត្ថកិច្ចនគរបាលខេត្តសៀមរាប បានឲ្យដឹងថា ជនសង្ស័យចំនួន០៣នាក់ ដែលជាប់ពាក់ព័ន្ធនឹងករណីគ្រឿងញៀន គឺ ១. ឈ្មោះ ព្រេម ប្រុស ភេទប្រុស ឆ្នាំកំណើត២០០៤ មុខរបរគ្មាន មានទីលំនៅភូមិត្រពាំងសេះ សង្កាត់គោកចក ក្រុងសៀមរាប ជាប់ពាក់ព័ន្ធនឹងករណីរក្សាទុកជួញដូរនិងចាត់ចែង ហើយមានសារធាតុញៀនក្នុងខ្លួន , ២. ឈ្មោះ សូរ វ៉ច ភេទប្រុស ឆ្នាំកំណើត១៩៩៩ មុខរបរគ្មាន មានទីលំនៅភូមិត្រពាំងសេះ សង្កាត់គោកចក ជាប់ពាក់ព័ន្ធនឹងករណីសម្រួលចាត់ចែងនិងប្រើប្រាស់ ហើយមានសារធាតុញៀនក្នុងខ្លួន និង ០៣. ឈ្មោះ រិទ្ធ ពន្លក ភេទប្រុស ឆ្នាំកំណើត១៩៩២ មុខរបរគ្មាន មានទីលំនៅភូមិគោកតាចាន់ សង្កាត់គោកចក ជាប់ពាក់ព័ន្ធនឹងករណីចាត់ចែងនិងប្រើប្រាស់ ហើយមានសារធាតុញៀនក្នុងខ្លួន រួមនឹងវត្ថុតាងដែលសមត្ថកិច្ចដកហូតបាន មានម្សៅមេតំហ្វេតាមីន ប្រភេទទឹកកកចំនួន០២កញ្ចប់ ស្មើនឹងទំងន់០,៨ក្រាម(ទាំងសំបក) និង ទូរស័ព្ទដៃចំនួន ០៣គ្រឿង ត្រូវបានអង្គភាពនគរបាលជំនាញ រៀបចំកសាងសំណុំរឿងបញ្ចូនខ្លួនទៅសាលាដំបូងខេត្ត នៅថ្ងៃទី០៥ ខែកុម្ភៈ ឆ្នាំ២០១៩នេះ ដើម្បីចាត់ការតាមនីតិវិធីបន្ត ។
សមត្ថកិច្ចនគរបាលខេត្តសៀមរាប បានឲ្យដឹងទៀតថា ជនសង្ស័យទាំង០៣នាក់នេះ ត្រូវសមត្ថកិច្ចឃាត់ខ្លួនបាន ក្នុងប្រតិបត្តិការមួយរបស់កម្លាំងការិយាល័យប្រឆាំងគ្រឿងញៀន ដែលបានចុះបង្ក្រាបករណីរក្សាទុកជួញដូរ និងចាត់ចែងឲ្យប្រើប្រាស់ដោយខុសច្បាប់នូវសារធាតុញៀន នៅលំនៅដ្ឋានស្ថិតនៅភូមិត្រពាំងសេះ សង្កាត់គោកចក ក្រុងសៀមរាប
កាលពីវេលាម៉ោង១២និង២០នាទី នាថ្ងៃទី០៤ ខែកុម្ភៈ ឆ្នាំ២០១៩ម្សិលមិញនេះ ។
សមត្ថកិច្ចនគរបាលខេត្តសៀមរាប បានឲ្យដឹងបន្ថែមទៀតថា បើទោះបីជា មានការយកចិត្តទុកដាក់ និងខិតខំប្រឹងប្រែង ក្នុងការបង្ក្រាបពីសំណាក់កងកម្លាំងមានសមត្ថកិច្ចយ៉ាងណាក្ដី ក៏ការធ្វើចរាចរ និង ការប្រើប្រាស់គ្រឿងញៀនដោយខុសច្បាប់នៅតែកើតមានឡើង ទាំងជនជាតិខ្មែរ និង ជនជាតិបរទេស ក្នុងនោះក៏មានស្រទាប់យុវវ័យមួយចំនួនផងដែរ តែទោះជាយ៉ាងនេះក្ដី ក៏សមត្ថកិច្ចនៅតែបន្តការបង្ក្រាបជាប់ជាប្រចាំ និង គ្រប់ពេលវេលា ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
