នៅថ្ងៃទី០៥ ខែកុម្ភៈ ឆ្នាំ២០១៩ម្សិលមិញនេះ ប្រជាជនក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប បានរៀបចំពិធីរកត្រីរួមក្នុងបឹងអភិរក្ស ជាបឹងមួយ ដែលអ្នកភូមិតែងតែអភិរក្សទុក មិនអនុញ្ញាតឱ្យនេសាទផ្តេសផ្តាសចាប់ពីខែមិថុនាមក ដើម្បីរក្សាត្រីទុកសម្រាប់ប្រារព្ធពិធីត្រៀមឡើងមាឃ ឬឡើងអ្នកតា ដែលជាទំនៀមធ្វើជារៀងរាល់ឆ្នាំមិនខាន ប៉ុន្តែពេលវេលាមិនអាចកំណត់យកថ្ងៃណាមួយជាក់លាស់បានទេ ដោយអាស្រ័យលើទឹកបឹង បើសិនទឹកបឹងនៅច្រើនក៏ពន្យាពេលរង់ចាំទឹកបឹងរីង ដើម្បីអាចចាប់ត្រីបានច្រើន តែឆ្នាំនេះទឹកសមល្មមអាចឱ្យប្រជាជននេសាទត្រីបាន និងចំពេលវេលាល្មម ដូច្នេះពិធីនេះ នឹងធ្វើឡើងនៅថ្ងៃ៣កើត ស្អែកនេះ ។
លោក ពេជ្រ ឃិន មេភូមិបង្កោង បានឱ្យដឹងថា ពិធីរកត្រីនេះធ្វើឡើងមួយឆ្នាំម្តងជារៀងរាល់ខែមាឃ បន្ទាប់ពីឯកភាពពីចាស់ព្រឹទ្ធាចារ្យក្នុងភូមិ និងបានប្រកាសកំណត់ថ្ងៃរកត្រី ដើម្បីយកត្រីទៅធ្វើទឹកនំបញ្ចុក និងធ្វើអាហាររួមសម្រាប់ពិធីឡើងមាឃ ឬឡើងអ្នកតាតាមទំនៀម ហើយនៅក្នុងផ្ទៃបឹងទាំងមូល បានដាក់សម្រាស់ចំនួន២កន្លែង ហើយត្រីដែលចាប់បាននៅបរិវេណខាងក្រៅដាក់សម្រាស់ ប្រជាជនអាចយកទៅធ្វើម្ហូបហូបជាលក្ខណៈគ្រួសារ រីឯត្រីចាប់ក្នុងសម្រាស់ត្រូវទុករួមសម្រាប់ធ្វើទឹកនំបញ្ចុក ។ ចំណែក
លោក ពេជ្រ ឃិន បានបញ្ជាក់ថា ក្រោយពីប្រកួកប្រកាសឱ្យនេសាទ អ្នកភូមិបានត្រៀមនូវឧបករណ៍សម្រាប់នេសាទបែបបុរាណ មានសំណាញ់ ឈ្នាង អង្រុត មកចាំកុះករនៅមាត់បឹង ហើយប្រជាជនមួយចំនួនមកតាំងពីម៉ោង១២យប់ អ្នកខ្លះក្រោកមកតាំងពីម៉ោង៣ ម៉ោង៤មកម្ល៉េះ ហើយនៅឆ្នាំនេះ កម្មវិធីនេសាទត្រីចាប់ផ្តើមនៅវេលាម៉ោង៧ ដោយមានគណៈកម្មការចាំប្រកាសមេក្រូ និងបាញ់កាំជ្រួញជាសញ្ញា ប៉ុន្តែអ្នកភូមិដែលមកនេសាទទាំងអស់នោះ មិនផ្តោតតែលើរកត្រីមួយមុខនោះដែរ គឺមកជួបជុំ សប្បាយរីករាយ និងមានសាមគ្គីភាពកាន់តែស្និទ្ធិស្នាលរវាងប្រជាជននៅក្នុងភូមិថែមទៀតផង ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
