លោកឧត្តមសេនីយ៍ត្រី ភឹង ចន្តារ៉េត ស្នងការរង នៃស្នងការដ្ឋាននគរបាលខេត្តសៀមរាប ទទួលផែនកណ្តាលព្រហ្មទណ្ឌ បានឲ្យដឹងថា កាលពីវេលាម៉ោង ២១ នាថ្ងៃទី០៤ ខែកុម្ភៈ ឆ្នាំ២0១៩កន្លងទៅថ្មីៗនេះ កម្លាំងនគរបាលខេត្តសៀមរាប បានចាប់ឃាត់ខ្លួនជនសង្ស័យម្នាក់ឈ្មោះ លាង សាលី ហៅ វុធ ភេទប្រុស អាយុ ៣៤ឆ្នាំ មុខរបរមិនពិតប្រាកដ ទីលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល បន្ទាប់ពីសមត្ថកិច្ចនគរបាលខេត្ត ធ្វើការស្រាវនិងស៊ើបអង្កេតរហូតកំណត់បានមុខសញ្ញា ដែលជាប់ពាក់ព័ន្ធនឹងករណីលួចគាស់ទូរដែក ក្នុងបណ្ណាគារព្រះវិហារ ក្នុងក្រុងសៀមរាប យកប្រាក់និងទ្រព្យសម្បត្តិ ដែលមានតម្លៃសរុបជិត០១ម៉ឺនដុល្លារអាម៉េរិក ។
លោក ភឹង ចន្តារ៉េត មានប្រសាសន៍ទៀតថា បើតាមដំណើររឿងនេះគឺ នៅវេលាម៉ោង២៣ ថ្ងៃទី០១ ខែកុម្ភៈ ឆ្នាំ២០១៩នេះ មានករណីអំពើលួចមានទម្ងន់ទោស ដោយគាស់ទូរដែក ដែលបង្កឡើងដោយជនសង្ស័យមិនស្គាល់អត្តសញ្ញាណ បានធ្វើសកម្មភាព លួចចូលគាស់ទូរដែក របស់ជនរងគ្រោះ ឈ្មោះ ជា រ័ត្នមុន្នី ភេទប្រុសអាយុ ៤៣ឆ្នាំ ត្រង់ចំណុច ក្នុងបណ្ណាគារព្រះវិហារ ស្ថិតក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប និង ក្រោយពេលធ្វើសកម្មភាពរួច ជនសង្ស័យបានគេចខ្លួនបាត់ ហើយបើយោងតាមពាក្យបណ្តឹងជនរងគ្រោះ ជនសង្ស័យបានគាស់ទូរដែកយកអស់ប្រាក់ដុល្លារចំនួន ៥ពាន់ដុល្លារអាម៉េរិក , នាឡិកាដៃចំនូន ៤០គ្រឿង និង ទូរស័ព្ទដៃចំនួន០១គ្រឿង ម៉ាក IPhone 6 pluse ពណ៌មាស ។
លោកស្នងការរង មានប្រសាសន៍បន្ថែមទៀតថា នៅការិយាល័យនគរបាល ជនសង្ស័យបានឆ្លើយសារភាពថា នៅថ្ងៃទី ០១ ខែកុម្ភៈ ឆ្នាំ២០១៩នេះ រូបគេធ្វើដំណើរពីភ្នំពេញ មកលេងខេត្តសៀមរាប ដោយស្នាក់នៅផ្ទះសំណាក់មិនស្គាល់ឈ្មោះ នៅម្តុំផ្សារលើ លុះយប់ឡើងរូបគេបានទៅផឹកម្នាក់ឯងនៅម្តុំស្តាតចាស់ ពេលនោះក៏បានឃើញកន្លែងលក់សៀវភៅមួយកន្លែង យីហោបណ្ណាគារព្រះវិហារ ចំហរទ្វារបង្អួចខាងក្រោយ ហើយរហូតដល់វេលាម៉ោង០២យប់ ឈានចូលថ្ងៃទី០២ ខែកុម្ភៈ ឆ្នាំ២០១៩ ខ្លួនក៏បានលួចឡើងតាមបង្អួចទ្វារខាងក្រោយ ចូលទៅក្នុងបណ្ណាគារព្រះវិហារ ដោយយកញញួរ១ និងទុណឺវីស១ ដែលជារបស់ជាងសំណង់នៅក្បែរកន្លែងកើតហេតុ បន្ទាប់មករូបគេបានធ្វើសកម្ម ភាពគាស់ទូរដែក យកប្រាក់ដុល្លារចំនួន ១ពាន់ដុល្លារអាម៉េរិក , ប្រាក់ខ្មែរចំនួន១លានរៀល , នាឡិការដៃចំនួន ៧គ្រឿង និងទូរស័ព្ទដៃម៉ាក IPhone 6pluse ចំនួន ០១គ្រឿង រួចគេចខ្លួនរហូតដល់ថ្ងៃទី០៤ ខែកុម្ភៈ ឆ្នាំ២០១៩នេះ ត្រូវបានសម្ថកិច្ចឃាត់ខ្លួនតែម្តង។
លោក ភឹង ចិន្តារ៉េត ឲ្យដឹងទៀតថា បន្ទាប់ពីឃាត់ខ្លួនជនជាប់សង្ស័យ សមត្ថកិច្ច ដកហូតវត្ថុតាងបាន រួមមាន ៖ ទូរស័ព្ទដៃចំនួន០១គ្រឿង ម៉ាក IPhone 6pluse ដែលជារបស់ជនរងគ្រោះ , ខ្សែដៃចំនួន០១ខ្សែ និង ប្រាក់ដុល្លារចំនួន៥០០ដុល្លារ ប៉ុន្តែពិនិត្យមើលឃើញថា ប្រាក់ដុល្លារទាំងនោះ មានជាប្រាក់សុទ្ធចំនួន២០០ដុល្លារ និង ប្រាក់សម្រាប់សែនចំនួន៣០០ដុល្លារ , ប្រាក់ខ្មែរចំនួន៣០ម៉ឺនរៀល និងនាឡិកាដៃចំនួន៧ គ្រឿង ។
បច្ចុប្បន្ន កម្លាំងនគរបាលជំនាញខេត្តសៀមរាប កំពុងរៀបចំសំណុំរឿងបញ្ជូនខ្លួនជនសង្ស័យទៅកាន់តុលាការខេត្តសៀមរាប ដើម្បីផ្តន្ទាទោសទៅតាមផ្លូវច្បាប់ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត