នាព្រឹកថ្ងៃទី០៧ ខែកុម្ភៈ ឆ្នាំ២០១៩ព្រឹកមិញនេះ ក្រុមប្រឹក្សាខេត្តសៀមរាប បើកកិច្ចប្រជុំសាមញ្ញលើកទី៥៧ អាណត្តិទី២ របស់ខ្លួន ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប ដោយមានការចូលរួមពីឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត , តំណាងអាជ្ញាធរជាតិអប្សារា មន្ត្រីសាលាខេត្ត ថ្នាក់ដឹកនាំ មន្ទីរ អង្គភាព និង អភិបាលក្រុងសៀមរាប ។
កិច្ចប្រជុំនេះ ផ្តោតលើរបៀបវារៈ ចំនួន៤គឺ ៖ ១-ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៥៦ របស់ក្រុមប្រឹក្សាខេត្ត អាណត្តិទី២ កាលពីថ្ងៃទី១១ ខែ មករា ឆ្នាំ២០១៩ , ២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែមករា ឆ្នាំ២០១៩ ស្តីពីការអនុវត្តការងាររបស់រដ្ឋបាលខេត្តសៀមរាប , ៣- ពិនិត្យ ពិភាក្សា និងផ្តល់យោល់លើការរៀបចំសន្និបាត បូកសរុបលទ្ធផលអនុវត្តការងារប្រចាំឆ្នាំ២០១៨ និងលើកទិសដៅការងារសម្រាប់អនុវត្តឆ្នាំ២០១៩ របស់រដ្ឋបាលខេត្តសៀមរាប និង ៤- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ស្តីពីលទ្ធផល នៃការរៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តសៀមរាប អាណត្តិទី២ ឆ្នាំ២០១៨ ។
ក្នុងដំណើរការនៃកិច្ចប្រជុំនេះ ក៏បានពិភាក្សាលើចំណុចមួយចំនួនដូចជា អំពីគម្រោងធ្វើផ្លូវ របស់មន្ទីរអភិវឌ្ឍន៍ជនបទ ខេត្ត , អំពីរបបរាយការណ៍របាយការណ៍របស់មន្ទីរ អង្គភាព , បញ្ហាការងារចរាចរណ៍ , សណ្តាប់ធ្នាប់សាធារណៈ សំខាន់គំនូសសញ្ញាចរាចរណ៍នៅតាមដងផ្លូវ , បញ្ហាភ្លើងស្តុប , បញ្ហារថយន្តដឹកដី ដឹកខ្សាច់ ចូលក្នុងក្រុង , បញ្ហាការដ្ឋានសំណង់ និង ភាពអណាធិបតេយ្យតូបលក់ដូរនៅជុំវិញរបងមន្ទីរពេទ្យបង្អែកខេត្តសៀមរាប និង ផ្សាររាត្រីនៅតំបន់អង្គរឃ្យុងយូរ ។
ពាក់ព័ន្ធនឹងបញ្ហាទាំងអស់នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត បានជំរុញឲ្យថ្នាក់ដឹកនាំខេត្ត , មន្ទីរ អង្គភាព និង ក្រុង ស្រុក ត្រូវសំដៅឆ្ពោះទៅរកមូលដ្ឋានបម្រើប្រជាពលរដ្ឋឲ្យបានល្អបំផុត , កែលម្អភាពអសកម្មនានា និងដោះស្រាយបញ្ហាប្រឈមដែលនៅសេសសល់ ហើយត្រូវយកចិត្តទុកដាក់ខ្ពស់ ចំពោះបញ្ហាការរំលោភយកដីចំណីផ្លូវ និងដីចិញ្ចើមផ្លូវនៅក្នុងក្រុង និងបញ្ហាផ្សាររាត្រីតំបន់អង្គរឃ្យុងយូរ ៕
អត្ថបទ និង រូបភាព ៖ រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
