មន្ត្រីនគរបាលការិយាល័យប្រឆាំងគ្រឿងញៀនខេត្តសៀមរាប បានឲ្យដឹងថា កាលពីវេលាម៉ោង៩និង៥៥នាទីព្រឹកថ្ងៃទី០៦ ខែកុម្ភៈ ឆ្នាំ២០១៩ ម្សិលមិញនេះ សមត្ថកិច្ចនគរបាលជំនាញការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តសៀមរាប បានឃាត់ខ្លួនជនជាតិរ៉ូម៉ានីម្នាក់ ឈ្មោះ អូឡារូ ណាកស៊ីស ម៉ានូអែល បន្ទាប់ពីបានរកឃើញលាក់ថ្នាំញៀនមេតំហ្វេតាមីន ក្នុងកញ្ចប់ធំចំនួន៤ ផ្សេងៗគ្នា ដែលមានទម្ងន់សរុប៥គីឡូក្រាម២០មីលីក្រាម ក្នុងកាបូបស្ពាយ ខណៈដែលជនសង្ស័យកំពុងរង់ចាំយន្តហោះធ្វើដំណើរទៅក្រុងហុងកុង តាមជើងយន្តហោះ KA-249 ។
សមត្ថកិច្ចបានឲ្យដឹងទៀតថា ក្នុងចំណោមកញ្ចប់ទាំង៤ ដែលលាក់ថ្នាំញៀននោះ គឺកញ្ចប់ទី១ មានទម្ងន់១.២១០ក្រាម , កញ្ចប់ទី២ មានទម្ងន់១.៣៥០ក្រាម , កញ្ចប់ទី៣ មានទម្ងន់១.២១០ក្រាម និងកញ្ចប់ទី៤ មានទម្ងន់១.២៥០ក្រាម ហើយជនសង្ស័យ និងវត្ថុតាង ត្រូវបានប្រគល់ជូនកម្លាំងស្នងការដ្ឋាននគរបាលខេត្តសៀមរាប ដើម្បីចាត់ការទៅតាមនីតិវិធី៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
