លោក ភឿន សុឃីម អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរា បានឱ្យដឹងថា ចាប់ពីថ្ងៃទី០៣ ខែកុម្ភៈឆ្នាំ២០១៩នេះមក ក្រុមការងារនាយកដ្ឋានគ្រប់គ្រងទឹក កំពុងបូមទឹកពីកសិន្ធុប្រាសាទអង្គរវត្ត បញ្ចូលទៅក្នុងស្រះខាងត្បូង ឬស្រះប្រុស ដែលពេលនេះការបញ្ចូលទឹកសម្រេចបានប្រមាណ ៣០ភាគរយ ស្មើនឹង ១៥០០ម៉ែត្រគូប ខណៈពេលដែលកម្ដៅថ្ងៃហួតហែងខ្លាំងនារដូវប្រាំង បានធ្វើឱ្យទឹកនៅក្នុងស្រះស្រកលឿន និងបាត់សោភ័ណភាពមួយផ្នែក ព្រោះស្រះទឹកនៅប្រាសាទអង្គរវត្ត គឺជាផ្នែកមួយដ៏សំខាន់សម្រាប់ភ្ញៀវទេសចរដែលនិយមផ្តិតយករូបភាពកំពូលប្រាសាទអង្គរវត្តឆ្លុះជាមួយនឹងទឹក។
លោក ភឿន សុឃីម បានបញ្ជាក់ទៀតថា ស្រះប្រុសនៃប្រាសាទអង្គរវត្តនេះ មានទំហំ ៥០ម៉ែត្រគុណនឹង៨០ម៉ែត្រ ដែលអាចផ្ទុកទឹកបានចំនួន ៥ពាន់ម៉ែត្រគូប ហើយការងារនេះត្រូវប្រើពេលមួយសប្ដាហ៍ទៀត ដើម្បីបញ្ចូលទឹកឱ្យគ្រប់ទៅតាមបរិមាណត្រឹមត្រូវ ប៉ុន្តែសម្រាប់ស្រះខាងជើង ឬស្រះស្រី ដែលជាចំណុចទាក់ទាញភ្ញៀវទេសចរផងដែរនោះ អាជ្ញាធរជាតិអប្សរាមិនបានបញ្ចូលទេ ដោយទុកឱកាសឱ្យនាយកដ្ឋានអភិរក្សប្រាសាទក្នុងឧទ្យាន និងបុរាណវិទ្យាបង្ការ ធ្វើកំណាយបន្តទៀតក្នុងគម្រោងស្ដារឡើងវិញនៃរចនាសម្ព័ន្ធស្រះនេះ ។
អត្ថបទ និង រូបភាព ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
