អគារសិក្សាថ្មី១ខ្នង មាន ៤បន្ទប់ ធ្វើអំពីថ្ម ប្រក់ក្បឿង ដែលជាអំណោយរបស់អង្គការសម្រចសុបិនកុមារកម្ពុជា ជូនដល់សាលាអនុវិទ្យាល័យជប់រំដេង ស្ថិតនៅភូមិជប់រំដេង ឃុំកន្ទួត ស្រុកស្វាយលើ ត្រូវបានសម្ពោធដាក់ឲ្យប្រើប្រាស់ជាផ្លូវការ នៅព្រឹកថ្ងៃទី០៧ ខែកុម្ភៈ ឆ្នាំ២០១៩នេះ ក្រោមអធិបតីភាពលោក ពៅ ពិសិដ្ឋ អភិបាលរងខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប ។
មានប្រសាសន៍ក្នុងឱកាសនោះ លោកពៅ ពិសិដ្ឋ បានថ្លែងនូវអំណរគុណ ដល់តំណាងអង្គការសម្រេចសុបិនកុមារកម្ពុជា ដែលបានចូលរួមក្នុងកិច្ចអភិវឌ្ឍន៍លើវិស័យអប់រំនៅកម្ពុជា ពិសេសនៅតាមបណ្តាមូលដ្ឋានស្រុកដាច់ស្រយ៉ាលក្នុងខេត្តសៀមរាប ហើយតាមរយៈនៃការកសាងអគារសិក្សាថ្មីនេះ គឺពិតជាបានរួមចំណែកយ៉ាងសកម្ម ជាមួយរាជរដ្ឋាភិបាលកម្ពុជា ក្នុងការស្ដារ និងអភិវឌ្ឍសង្គមជាតិ តាមរយៈបណ្ដុះបណ្ដាលធនធានមនុស្ស ជួយដល់កុមារនៅមូលដ្ឋានជនបទ មានលទ្ធភាពទទួលបានការអប់រំដូចៗគ្នា ទៅនឹងកុមារនៅទីក្រុងផងដែរ សំដៅលើកកម្ពស់សិទ្ធិកុមារ សីលធម៌សង្គម និងការជួយគ្នាទៅវិញទៅមក ដើម្បីអនាគតដ៏ប្រពៃនៃកុមារ ។
លោកពៅ ពិសិដ្ឋ មានប្រសាសន៍ទៀតថា ក្នុងនាមថ្នាក់ដឹកនាំខេត្ត សូមឲ្យលោកគ្រូ អ្នកគ្រូ ត្រូវថែរក្សាអគារសិក្សានេះឲ្យបានគង់វង្ស ដោយមានការចូលរួមពីបងប្អូនប្រជាពលរដ្ឋក្នុង មូលដ្ឋានផងដែរ ខណៈបច្ចុប្បន្ន យើងកសាងប្រព័ន្ធអប់រំមួយមានលក្ខណៈពេញលេញ ដែលអាចឆ្លើយតបបាននឹងតម្រូវការ នៃទីផ្សារនគរូបនីយកម្ម ដែលជាលទ្ធផលកើតចេញពីការគិតគូរត្រូវ លើគោលនយោបាយបើកទូលាយ ការស្វាគមន៍ចំពោះការវិនិយោគ នៃវិស័យឯកជន ដើម្បីបំពេញបន្ថែមក្នុងការអភិវឌ្ឍវិស័យអប់រំនេះ ហើយក៏មានសង្ឃឹមជឿជាក់ថា តំណាងអង្គការសម្រចសុបិនកុមារកម្ពុជានឹងនៅតែបន្តក្នុងការចូលរួមអភិវឌ្ឍន៍នូវហេដ្ឋារចនាសម្ព័ន្ធលើវិស័យអប់រំនៅខេត្តសៀមរាបបន្តទៀត ៕
អត្ថបទ និង រូបភាព ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
