ចាប់ពីខែសីហា ឆ្នាំ២០១៨កន្លងមក រដ្ឋបាលខេត្តសៀមរាប សហការជាមួយមន្ទីរប្រៃសណីយ៍ និងទូរគមនាគមន៍ខេត្ត បានចុះអនុវត្តគម្រោងកាត់ខ្សែភ្លើង ខ្សែកាបលើអាកាស និងបង្កប់ក្រោមដីនៅតាមបង្គោលខ្សែភ្លើងដែលមានភាពរញ៉េរញ៉ៃគ្មានរបៀបរៀបរយដូចសំណាញ់ពីងពាង ក្នុងក្រុងសៀមរាប គឺបានជាង៥០ភាគរយហើយ ។ គិតមកដល់ដើមខែ កុម្ភៈ ឆ្នាំ២០១៩នេះ អាជ្ញាធរបានកាត់ទម្លាក់ខ្សែភ្លើង ខ្សែកាបអាកាស បង្កប់ក្រោមដីបានចំនួន ៦ផ្លូវ ក្នុងចំណោមផ្លូវទាំង១១ សម្រាប់ក្នុងគម្រោងទី១នេះ ។
ប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប លោកសុខ សីហា បានឱ្យដឹងថា ចំនួនផ្លូវទាំង៦ខ្សែ ដែលអាជ្ញាធរបានចុះអនុត្តនោះ សរុបប្រវែងមានជាង ២៤គីឡូម៉ែត្រ ក្នុងនោះមានដូចជាផ្លូវ លោកតាណឺយ, តំបន់ជុំវិញផាប់ស្ទ្រីត, កំណាត់ផ្លូវហ្សាដឺហ្គោល ចាប់ពីចំណុចសួនច្បារព្រះរាជដំណាក់ រហូតដល់បុរីប្រិមប្រិយ, កំណាត់ផ្លូវ ៦០ម៉ែត្រ រហូតដល់កែងផ្លូវហ្សាដឺហ្គោល, កំណាត់ផ្លូវកូម៉ៃ ចាប់ពីចំណុចផ្លូវបំបែក អ៩០ រហូតដល់វត្តថ្មី, និងកំណាត់ផ្លូវ ៧មករា ចាប់ពីផ្លូវក្រវ៉ាត់ក្រុង រហូតដល់រង្វង់មូលព្រះរាជដំណាក់ខេត្តសៀមរាប ។
តាមការលើកឡើងរបស់ប្រធានមន្ទីរប្រៃសណីយ៍ និងទូរគមនាគមន៍ថា ផ្លូវ៥ខ្សែទៀត ដែលគម្រោងនឹងចុះអនវុត្តន៍បន្ទាប់ រួមមានៈ ផ្លូវជាតិលេខ៦ ចាប់ពីព្រំប្រទល់រដ្ឋបាលក្រុង ស្រុកពួក និងស្រុកប្រាសាទបាគង, ផ្លូវស៊ីវុត្ថា ចាប់ពីចំណុចផ្លូវ អ៩០ រហូតដល់រង្វង់មូលនាគបាញ់ទឹក, ផ្លូវផ្សារញ៉ែ ចាប់ពីចំណុចភោជនីយ៍ម្លប់ស្បូវ រហូតដល់ស្ដុបផ្សារញ៉ែ ,ស្ដុបផ្សារកណ្ដាល, ផ្លូវអមសងខាងស្ទឹងចាប់ពីចំណុចស្ពាននាគ រហូតដល់ស្ពានក្រវ៉ាត់ក្រុង, និងផ្លូវទៅផ្សារក្រោម ចាប់ពីចំណុចរង្វង់មូលនាគបាញ់ទឹក រហូតដល់ផ្លូវក្រវ៉ាត់ក្រុង។
នាថ្ងៃទី០៦ ខែកុម្ភៈ ឆ្នាំ២០១៩នេះ លោក សុខ សីហា ស្នើដល់ពលរដ្ឋដែលរស់នៅតាមបណ្ដោយផ្លូវក្នុងគម្រោងខាងលើ សុំមានការអត់ធ្មត់ និងយោគយល់ខ្ពស់បំផុត ដ្បិតថាការរៀបចំនេះអាចនឹងមានការដាច់ចរន្តអគ្គីសនីមួយរយៈពេលខ្លី ប៉ុន្តែការរៀបចំសោភ័ណ្ឌភាពក្រុងគឺជារឿងសំខាន់ ពីព្រោះថា ជាទីក្រុងទេសចរណ៍ដ៏ល្បីល្បាញ ក្នុងការទាញយកប្រាក់ចំណូលសម្រាប់បង្កើនជីវភាពរបស់ប្រជាពលរដ្ឋនៅខេត្តនេះផងដែរ ។
គួររម្លឹកថា ការងារចុះកាត់ខ្សែភ្លើង ខ្សែកាបអាកាសលើបង្គោលភ្លើងក្នុងក្រុងនេះ ធ្វើឡើងក្នុងបំណងបន្ទាប់ពីពិនិត្យឃើញភាពមិនប្រក្រតីមួយចំនួន ការខូចសោភណ្ឌភាព សន្ដិសុខ និងសុវត្ថិភាព ដល់ពលរដ្ឋ ពិសេសអ្នករស់នៅជាប់បង្គោលភ្លើងទាំងនោះអាចនឹងកើតហានិភ័យជាយថាហេតុដែលបង្កឡើងដោយការឆ្លងចរន្តអគ្គិសនីជាដើម។
អត្ថបទ និងរូបភាពលោកម៉ាត់ អារីហ្វីន
កែសម្រួលដោយលីវ សុខុន !!!
