សមត្ថកិច្ចនគរបាលខេត្តសៀមរាប បានឲ្យដឹងថា នៅថ្ងៃទី០៥ ខែកុម្ភៈ ឆ្នាំ២០១៩ម្សិលមិញ នេះ កម្លាំងសមត្ថកិច្ចនគរបាលខេត្តសៀមរាប បានឃាត់ខ្លួនជនសង្ស័យចំនួន០២នាក់ រួមមាន ៖ ១. ឈ្មោះ វិន សុជា ហៅហេង ភេទស្រី អាយុ១៦ឆ្នាំ មុខរបរមិនពិតប្រាកដ និង ២. ឈ្មោះ វិន ស្រីលាភ ភេទស្រី អាយុ១៥ឆ្នាំ មុខរបរមិនពិតប្រាកដ ដែលទាំងពីរនាក់នេះ មានទីលំនៅបច្ចុប្បន្ន នៅភូមិកំពង់ថ្កូវ ឃុំមានជ័យ ស្រុកប្រាសាទបាគង ខេត្តសៀមរាប ដែលជាប់ពាក់ព័ន្ធនឹងករណីលួចយកម៉ូតូ ។
សមត្ថកិច្ចបានឲ្យដឹងទៀតថា កាលពីថ្ងៃទី០៤ ខែកុម្ភ: ឆ្នាំ២០១៩ វេលាម៉ោង ១០:២៥នាទី ជនរងគ្រោះឈ្មោះ ហង់សុភាត់ ភេទប្រុស អាយុ២៧ឆ្នាំ មុខរបរជាបុគ្គលិកសណ្ឋាគារ មានទីលំនៅបច្ចុប្បន្ននៅក្រុមទី១០ ភូមិកសិកម្ម សង្កាត់ស្រង៉ែ ក្រុងសៀមរាប បានទុកម៉ូតូមួយគ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០០៨ ពណ៌ខ្មៅ ពាក់ស្លាកលេខ សៀមរាប ១E . ៤០៥២ លេខតួនិងលេខម៉ាស៊ីន ៨៣០១៧៣៨ នៅក្រោមផ្ទះ ដោយកូនសោរម៉ូតូនៅជាប់នឹងម៉ូតូស្រាប់ពេលនោះ ត្រូវបានជនសង្ស័យ ឈ្មោះ វិន សុជា និងឈ្មោះ វិន ស្រីលាភ បានធ្វើសកម្មភាពលួចយកម៉ូតូជិះចេញទៅបាត់ ។
សមត្ថកិច្ចបានឲ្យដឹងទៀតថា បន្ទាប់ពីបាត់ម៉ូតូ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ស្រង៉ែ ហើយក្រោយពីទទួលបានពាក្យបណ្តឹង នៅថ្ងៃទី០៥ ខែកុម្ភ: ឆ្នាំ២០១៩ វេលាម៉ោង១១ព្រឹក សមត្ថកិច្ច បានទទួលព័ត៌មានថា ជនសង្ស័យទាំងពីរនាក់ខាងលើ ជិះម៉ូតូដែលលួចបានទៅអ៊ុតសក់នៅហាងអ៊ុតសក់មួយកន្លែង នៅតាមបណ្តោយផ្លូវទៅភ្នំក្រោម ស្ថិតនៅភូមិអារញ្ញ សង្កាត់សៀមរាប ក្រុងសៀមរាប បន្ទាប់មកសមត្ថកិច្ចបានចុះទៅធ្វើការនាំខ្លួនជនសង្ស័យទាំងពីរនាក់ខាងលើ រួមទាំងវត្ថុតាងម៉ូតូមួយគ្រឿងដែលធ្វើសកម្មភាពលួចបាន យកមកធ្វើការសាកសួរ ហើយក្រោយពីការសាកសួរ ជនសង្ស័យទាំងពីរនាក់បានឆ្លើយសារភាពថា ខ្លួនពិតជាបានធ្វើសកម្មលួចយកម៉ូតូរបស់ជនរងគ្រោះខាងលើពិតប្រាកដមែន ។
បច្ចុប្បន្ន កម្លាំងនគរបាលជំនាញខេត្តសៀមរាប កំពុងរៀបចំសំណុំរឿងបញ្ជូនខ្លួនជនសង្ស័យ តាមនីតិវិធី រីឯវត្ថុតាងជាម៉ូតូមួយគ្រឿង កម្លាំងសមត្ថកិច្ចបានប្រគល់ជូនម្ចាស់ដើមវិញ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
