បន្ទាប់ពីសិល្បៈបុរាណខ្មែរ ត្រូវបានថែរក្សា ការពារ និងអភិរក្ស ហើយមួយចំនួនត្រូវបានដាក់ចូលជាសម្បត្តិអរូបិយនៃមនុស្សជាតិ លើសពីនោះ វាក៏ជាមូលដ្ឋាន សម្រាប់សិក្សាស្រាវជ្រាវ បង្កើតនូវទម្រង់សិល្បៈថ្មី ដែលគួរឲ្យចាប់អារម្មណ៍ផងដែរ។ អង្គការសិល្បៈខ្មែរអមតៈ បាននាំយកការសម្ដែងសិល្បៈសហសម័យមួយបែប ដែលជាការបង្កើតថ្មី នូវក្បាច់រាំ និងចង្វាក់ភ្លេង ដោយនារី វ័យក្មេងក្រុម ផ្អែកតាមទម្រង់សិល្បៈបុរាណខ្មែរ។
ក្រុមស្គរនារី ដែលមានសមាជិក ៧នាក់ នេះមានឈ្មោះថា មេធា ពួកគេមិនត្រឹមតែមានសមត្ថភាពអាចប្រគំឧបករណ៍ភ្លេងចម្រុះ តែសិល្បការិនីទាំងអស់នេះ ក៏បានចូលរួមច្នៃប្រឌិត ក្បាច់របាំ និពន្ធចម្រៀងដែលជាស្នាដៃថ្មី រួមនិងសម្លេងអន្ទងនៃស្គរបុរាណខ្មែរផងដែរ។
បើតាមការឲ្យដឹង ពីនាយកផ្នែកសិល្បៈ លោក ភូ ស្សង់បាទីស្ដ៍ (Jean-Baptiste PHOU) បានឲ្យដឹងថា ក្រុមស្គរនារីមេធា បានបង្កើតឡើងនៅខែមករាឆ្នាំ ២០១៥ ក្នុងខេត្តសៀមរាប។
លោកបានបញ្ជាក់ថា ការបង្កើតស្នាដៃថ្មីនៃរបាំសហសម័យនេះ គឺតម្រូវឲ្យសិល្បការិនី វាយស្គរដ៏ធំ ដែលពីមុនមានតែបុរសមានកំលាំងប៉ុណ្ណោះ ទើបអាចវាយលឺសម្លេងខ្លាំង។ គិតមកទល់ពេលនេះ ក្រុមស្គរដៃស្ត្រីមួយនេះ បានសម្ដែងនៅអង្គការស្ត្រីនៅក្នុងស្រុកមួយ និងមួយទៀតក្នុងកម្មវិធីជាលក្ខណៈអន្តរជាតិ REPfest ដែលដឹកនាំសម្ដែងដោយអង្គការសិល្បៈខ្មែរអមតៈ។ ដោយទទួលបានភាពជោគជ័យ និងការគាំទ្រ ពីសាធារណៈជន ក្រុមសិល្បករ-សិល្បៈការិនីបានសម្រេចចិត្តរួមគ្នា បន្តបង្កើតស្នាដៃតន្ត្រីថ្មីៗនេះ បន្ថែមទៀត ដើម្បីចូលរួមផ្លាស់ប្តូរទស្សនៈយល់ខុសមួយចំនួន របស់មហាជនចំពោះស្ត្រីក្នុងវិស័យសិល្បៈ។
សូមជម្រាបថា ចំពោះភ្ញៀវជាតិ និងអន្តរជាតិ នឹងត្រូវទិញសំបុត្រ សម្រាប់ចូលមើលការសម្ដែង នៅរៀងរាល់ថ្ងៃពុធ សុក្រ និងអាទិត្យ ម៉ោង ៨ ល្ងាច ក្នុងបរិវេណ បាំប៊ូស្តេក ស្ថិតនៅភូមិវត្តដំណាក់ សង្កាត់សាលាកំរើក ក្រុងសៀមរាប ហើយថវិកា ដែលបានពីការលក់សំបុត្រ សហគ្រាសវប្បធម៌ ពិសោធសិល្បៈខ្មែរអមតៈ ដែលជាកម្មវិធីមួយ របស់អង្គការមិនរកប្រាក់ចំណូល របស់អង្គការសិល្បៈខ្មែរអមតៈ និងរក្សាទុកសម្រាប់ជួយដល់សិល្បករ សិល្បការិនីខ្មែរក្នុងព្រះរាជាណាចក្រកម្ពុជា។ ក្នុងនោះដែរ ពិសោធសិល្បៈខ្មែរអមតៈ បច្ចុប្បន្នកំពុងដំណើរការការសម្តែងរបាំដោយជោគជ័យនៅក្នុងរាជធានីភ្នំពេញ នៅឯឆាកសម្តែង ក្នុងបរិវេណសារមន្ទីរជាតិហើយក៏មានរៀបចំសិក្ខាសាលារបាំ ដែលមានការរៀបចំសម្តែងជាលក្ខណៈឯកជន និងរៀបចំដំណើរទេសចរណ៍វប្បធម៌ផងដែរ។
អត្ថបទដោយ៖ សេង ផល្លី
រូបភាព វីដេអូ៖ ខេង ឧត្តម