លោក នួន ពុទ្ធារ៉ា អភិបាលក្រុងសៀមរាប បានឲ្យដឹងថា ដើម្បីដោះស្រាយបញ្ហាសំរាមនៅក្នុងក្រុងសៀមរាប ឲ្យ កាន់តែមានប្រសិទ្ធភាពខ្ពស់ អាជ្ញាធរក្រុងសៀមរាបកំពុងតែរៀបចំគម្រោងផែនការថ្មី ដោយចាប់ពីឆ្នាំ២០១៩នេះតទៅអាជ្ញាធរគ្រោងដាក់ឲ្យក្រុមហ៊ុនចំនួនបីធ្វើការប្រមូល និងដឹកសំរាមចេញពីក្រុង និងមានការរៀបចំប្រព័ន្ធគ្រប់គ្រងទីលានចាក់សំរាមឲ្យបានល្អ។
ហើយក្រុមហ៊ុនទាំងនោះ នឹងមានការបែងចែកតំបន់គ្នាប្រមូល និងដឹកជញ្ជូនសំរាមចេញ ដូចជា ក្រុមហ៊ុនមួយធ្វើការប្រមូលសំរាមនៅផ្នែកខាងលិចស្ទឹង , មួយធ្វើការប្រមូលផ្នែកខាងកើតស្ទឹង និងមួយទៀតធ្វើការប្រមូលតាមទីសាធារណៈ ដោយធ្វើយ៉ាងណាឲ្យការប្រមូលសំរាមចេញពីក្រុងសៀមរាប ឲ្យបានលឿន ពិសេសអាជ្ញាធរក្រុង នឹងធ្វើការពិភាក្សាជាមួយស្ថាប័នពាក់ព័ន្ធ ដែលមានមន្ទីរសេដ្ឋកិច្ចនិងហិរញ្ញវត្ថខេត្ត , មន្ទីរបរិស្ថានខេត្ត ក្នុងការរៀបចំសៀវភៅបន្ទុកថ្មី និងធ្វើកិច្ចសន្យាថ្មី ជាមួយក្រុមហ៊ុន សម្រាប់អនុវត្តចាប់ពីឆ្នាំ២០១៩នេះទៅ ។
លោកអភិបាលក្រុង បានបញ្ជាក់ទៀតថា ក្រៅពីការរៀបចំផែនការថ្មីសម្រាប់ឲ្យក្រុមហ៊ុនអនុវត្តទៅទទួលបានជោគជ័យ អាជ្ញាធរក្រុងសៀមរាប ក៏បានសាកល្បងប្រតិភូកម្មថវិកាមួយចំនួនដល់សង្កាត់សម្រាប់ធ្វើការគ្រប់គ្រង និងទទួលខុសត្រូវលើកបរិស្ថានអនាម័យដោយខ្លួនឯង ដែលសម្រាប់ជំហានសាកល្បងដំបូងនេះ គឺក្រុងបានជ្រើសរើសយកសង្កាត់សាលាកំរើមួយសិន សម្រាប់ធ្វើការអនុវត្តសាកល្បងក្នុងរយៈពេល១ឆ្នាំ ហើយបើការសាកល្បងនេះទទួលបានជោគជ័យ សាលាក្រុងនឹងប្រតិភូកម្មថវិកាទៅគ្រប់សង្កាត់ទាំងអស់របស់ក្រុង។
ព័ត៌មានជាតិ ថ្មីៗ
លោក នួន ពុទ្ធារ៉ា បានបញ្ជាក់បន្ថែមទៀតថា អាជ្ញាធរទទួលស្គាល់ថា នៅមានសំរាមសេសសល់នៅតាមបណ្តាផ្លូវមួយចំនួននៅជាយៗក្រុង ដែលធ្វើឲ្យប៉ះពាល់ដល់សោភ័ណ្ឌភាពរបស់ក្រុងសៀមរាប ហើយអាជ្ញាធរក្រុងក៏កំពុងតែខិតខំដោះស្រាយបញ្ហានេះយ៉ាងសកម្មបំផុត ព្រោះថា កាលពី២០ឆ្នាំមុន អាជ្ញាធរបានធ្វើកិច្ចសន្យាឲ្យក្រុមហ៊ុនប្រមូលសំរាមតែនៅតាមផ្លូវធំៗ ប៉ុន្តែរហូតមកបច្ចុប្បន្ន យើងមានការរីកចម្រើនមានផ្លូវធំៗច្រើនជាងមុន ហើយចំនួនសំរាមក៏ចេះតែមានការកើនឡើងខ្ពស់ ឯកក្រុមហ៊ុនប្រមូល និងដឹងជញ្ជូនសំរាមចេញមានតែមួយ ដែលធ្វើឲ្យការប្រមូលសំរាមនេះ មានការយឺតយ៉ាវ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
