ប្រធានមន្ទីរទេសចរណ៍ខេត្តសៀមរាប រំពឹងថា តាមរយៈដំណើរទស្សនកិច្ចរបស់រដ្ឋមន្ត្រីក្រសួងវប្បធម៌ និងទេសចរណ៍ចិនមកកាន់ខេត្តសៀមរាបនាចុងមករាឆ្នាំ២០១៩នេះ នឹងធ្វើឲ្យភ្ញៀវទេសចរជនជាតិចិនកាន់តែមានកំណើនឡើង ខណៈឆ្នាំ២០១៨ ភ្ញៀវទេសចរជនជាតិចិនស្ថិតនៅក្នុងលំដាប់ថ្នាក់លេខ១ ក្នុងចំណោមភ្ញៀវទេសចរណ៍បរទេសមកកំសាន្តនៅខេត្តសៀមរាប
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឲ្យដឹងថា តាមរយៈដំណើរទស្សនកិច្ចរបស់រដ្ឋមន្ត្រីក្រសួងវប្បធម៌ និងទេសចរណ៍ចិននៅខេត្តសៀមរាប រយៈពេលពីរថ្ងៃនាចុងមករាឆ្នាំ២០១៩នេះ លោករំពឹងថា ភ្ញៀវទេសចរចិន នឹងមកកាន់ខេត្តសៀមរាបកាន់តែច្រើនបន្ថែមទៀត ហើយអ្វីដែលមន្ទីរទេសចរណ៍ ក៏ដូចជាអាជ្ញាធរខេត្តកំពុងតែធ្វើ គឺការរៀបចំក្រុងទេសចរណ៍មួយនេះឲ្យមានសណ្ឋាប់ធ្នាប់ សោភ័ណភាពល្អ ជាពិសេសគឺការផ្តល់សេវាកម្មទេសចរណ៍ប្រកបដោយគុណភាព និងប្រសិទ្ធភាព ទាំងការធ្វើបដិសណ្ឋាកិច្ច ការផ្តល់នូវអាហារមានគុណភាព និងសុវត្ថិភាព សម្រាប់ភ្ញៀវទេសចរទាំងអស់។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឲ្យដឹងថា បច្ចុប្បន្ននេះក្រុមហ៊ុនចិនមួយឈ្មោះ Yunnan Cultural Industry Investment Holding Group k ក៏បានបណ្ដាក់ទុនជាង ៧០លានដុល្លារ ដើម្បីសាងសង់ឧទ្យានច្នៃប្រឌិតវប្បធម៌កម្ពុជា-ចិន នៅខេត្តសៀមរាប លើផ្ទៃដីសរុបប្រមាណ ៣,៣ ហិកតា ហើយក្រោយពេលសាងសង់រួច ឧទ្យាននេះនឹងក្លាយជាបណ្ដុំនៃតំបន់ទេសចរណ៍បែបវប្បធម៌ សម្រាប់បង្ហាញវប្បធម៌កម្ពុជា-ចិន ជាពិសេសការបង្ហាញពីវប្បធម៌ខ្មែរព្រោះនៅក្នុងឧទ្យានច្នៃប្រឌិតវប្បធម៌កម្ពុជា-ចិន មានសម្តែងពីវប្បធម៌ខ្មែរ ដូចជាការកសាងអង្គរ ការចម្បាំងរបស់កងទ័ពខ្មែរពីសម័យបុរាណ និងការបង្ហាញពីទំនៀមទំលាប់ប្រពៃណ៍ខ្មែរជាច្រើនទៀត ហើយក៏ជាចំណែកមួយក្នុងការទាក់ទាញភ្ញៀវទេសចរអោយមកទស្សនាខេត្តសៀមរាបកាន់តែច្រើនផងដែរ ។
យោងតាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថា នៅក្នុងឆ្នាំ២០១៨កន្លងមកនេះ ខេត្តសៀមរាបទទួលបានភ្ញៀវទេសសរុបចំនួន ៥.៨៤០.៥៦២ នាក់ កើនឡើង៥,៣៦ភាគរយ បើធៀបទៅនឹងឆ្នាំ២០១៧ ក្នុងនោះភ្ញៀវទេសចរបរទេសមានចំនួន២.៥៩០.៨១៥នាក់ កើនឡើង៥,៤៣ភាគរយ ហើយភ្ញៀវទេសចរជនជាតិចិនស្ថិតនៅក្នុងលំដាប់ថ្នាក់លេខ១ ៕
អត្ថបទ និង រូបថត ៖ លោក ទ្រា ពន្លឺ និង លោក ឃុត សៅ
កែសម្រួលអត្ថបទ ៖ លោក លីវ សាន្ត
