អគារសិក្សាថ្មីមួយខ្នង មាន ០៦បន្ទប់ សង់ឡើងអំពីឥដ្ឋថ្ម ប្រក់ក្បឿង និងរបងព័ទ្ធដោយលួសបន្លាប្រវែង២៦៥ម៉ែត្រ ដែលបានចំណាយថវិកាសាងសង់សរុបជាង៧ម៉ឺនដុល្លារអាមេរិក ជាអំណោយរបស់មូលនិធិត្រែលប្លេសឺស-សហរដ្ឋអាមេរិក តាមរយៈអង្គការអ្នកត្រួសត្រាយអង្គរ ស្ថិតនៅក្នុងបរិវេណសាលាបឋម សិក្សាបេង ស្ថិតក្នុងភូមិបេង ឃុំដូនពេង ស្រុកអង្គរជុំ ត្រូវបានសម្ពោធដាក់ឲ្យប្រើប្រាស់ជាផ្លូវការហើយ កាលពីព្រឹកថ្ងៃទី៣០ ខែមករា ឆ្នាំ២០១៩ ព្រឹកមិញនេះ ក្រោមអធិបតីភាពឯកឧត្តម ទៀ សីហា អភិបាលខេត្តសៀមរាប , លោកស្រី គ្រីស ខូតស៍ (Chris Coats) និងលោក ឃីត ស្ព្រូល (Keith Sproul) តំណាងមូលនិធិត្រែលប្លេសឺសហរដ្ឋអាមេរិក ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានសម្ដែងនូវការកោតសរសើរ និងវាយតម្លៃខ្ពស់ចំពោះមូលនិធិត្រែលប្លេសឺសហរដ្ឋអាមេរិក ដែលបានផ្តល់អំណោយជាអគារសិក្សា ដល់សាលាបឋមសិក្សាបេង តាមរយៈអង្គការអ្នកត្រួសត្រាយអង្គរ ដែលសកម្មភាពទាំងនេះ គឺពិតជាបានរួមចំណែកយ៉ាងសកម្ម ជាមួយរាជរដ្ឋាភិបាលកម្ពុជា ក្នុងការស្ដារ និងអភិវឌ្ឍសង្គមជាតិ តាមរយៈបណ្ដុះបណ្ដាលធនធានមនុស្ស ជួយដល់កុមារនៅមូលដ្ឋានជនបទ មានលទ្ធភាពទទួលបានការអប់រំដូចៗគ្នា ទៅនឹងកុមារនៅទីក្រុងផងដែរ សំដៅលើកកម្ពស់សិទ្ធិកុមារ សីលធម៌សង្គម និងការជួយគ្នាទៅវិញទៅមក ដើម្បីអនាគតដ៏ប្រពៃនៃកុមារ ។
ឯកឧត្តម ទៀ សីហា មានប្រសាសន៍ទៀតថា វិស័យអប់រំ ត្រូវបានរាជរដ្ឋាភិបាលកម្ពុជា ចាត់ទុកថា ជាវិស័យអាទិភាព ដែលថ្នាក់ដឹកនាំគ្រប់ថ្នាក់ បានយកចិត្តទុកដាក់ក្នុងការបង្កើនលទ្ធភាពឲ្យកុមារ និង យុវជនគ្រប់រូប ទទួលបានសេវាអប់រំប្រកបដោយសមធម៌ តាមរយៈការបន្ដជម្រុញកសាងសាលាបឋមសិក្សាឲ្យបានដល់ភូមិ និង អនុវិទ្យាល័យឲ្យបានយ៉ាងតិចចំនួនមួយនៅក្នុងឃុំនីមួយៗ សាលាវិទ្យាល័យនៅគ្រប់បណ្តាស្រុក ព្រមទាំងបានជំរុញឲ្យមានសាកលវិទ្យាល័យ ឬសាខាសាកលវិទ្យាល័យ នៅតាមខេត្តក្រុងទាំងអស់ទូទាំងប្រទេស ពិសេស បានវិភាជថវិកាជាតិដ៏គំហុកក្នុងមួយឆ្នាំៗ ក្នុងការពង្រីកក្របខ័ណ្ឌគ្រូបង្រៀន ដោយផ្ដល់អាទិភាពជ្រើសរើសគ្រូបង្រៀនក្នុងបរិមាណច្រើន ដើម្បីបម្រើដល់យុទ្ធសាស្ដ្រ ពង្រាយគ្រូ និងបំពេញបន្ថែមក្របខណ្ឌជំនួសគ្រូដែលត្រូវចូលនិវត្តន៍ ព្រមទាំងបានគិតគូរអំពីការដំឡើងប្រាក់បៀវត្ស និងប្រាក់ឧបត្ថម្ភផ្សេងៗទៀតជូនដល់គ្រូបង្រៀន និងបុគ្គលិកសិក្សាជាបន្ដបន្ទាប់ ។
ឯកឧត្តមអភិបាលខេត្តសៀមរាប ក៏បានជំរុញដល់កុមារកុមារីឱ្យខិតខំរៀនសូត្រ ស្តាប់ការទូន្មានប្រៀនប្រដៅរបស់ឪពុកម្តាយ និងប្រឹងប្រែងយកចិត្តទុកដាក់រៀនសូត្រ ស្តាប់ការពន្យល់របស់លោកគ្រូអ្នកគ្រូ ដើម្បីប្រែក្លាយខ្លួនជាទំពាំងស្នងឫស្សីដ៏រឹងមាំនាថ្ងៃអនាគត សម្រាប់ជាធនធានមនុស្សប្រកបដោយសក្តានុពល និងមានសមត្ថភាព ជាពិសេស ក្មួយៗ ត្រូវចៀសឆ្ងាយពីគ្រឿងញៀន និងអំពើមិនគប្បីទាំងឡាយណាដែលសង្គមស្អប់ខ្ពើម ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
