បន្ទាប់ពីប្រើអំពើលើហឹង្សាលើមន្ត្រីបរិស្ថាន និងជាអនុប្រធានសមាគមអ្នកសារព័ត៌មានកម្ពុជា កាលពីថ្ងៃសៅរ៏កន្លងទៅនេះ ប្រធានសហគមន៍ និងសមាជិក នៃ សមាគមទេសចរណ៍ វប្បធម៌ ធម្មជាតិបឹងពារាំង ត្រូវបានជនរងគ្រោះប្ដឹងពីបទមនុស្សឃាដគិតទុកជាមុន និងទាមទារជំងឺចិត្ត១លានដុលា្ល។
លោក ស៊ីម ឈីវឈានពិសិដ្ឋ អតីតអនុប្រធានមន្ទីរបរិស្ថានខេត្តសៀមរាប បច្ចុប្បន្នជាមន្ត្រីនៅក្រសួងបរិស្ថាន និងជាអនុប្រធាននៅសមាគមអ្នកសារព័ត៌មានកម្ពុជា ដែលជាជនរងគ្រោះ និងជាដើមបណ្តឹង លោកបានរៀបរាប់ប្រាប់អ្នកកាសែតនៅមុខប៉ុស្តិ៍នគរបាលរដ្ឋបាលសង្កាត់ជ្រាវ កាលពីព្រឹកថ្ងៃទី២៧ ខែមករា ឆ្នាំ២០១៩នេះថា កាលពីព្រលប់ថ្ងៃសៅរ៏ ទី២៦ ខែមករា ឆ្នាំ២០១៩ លោកបានចុះទៅយកព័ត៌មាននៅក្នុងតំបន់អភិរក្សបឹងពារាំង បន្ទាប់ពីទទួលព័ត៌មានថា មានសកម្មភាពបទល្មើស ស្ថិតនៅក្នុងសហគមន៍ សមាគមទេសចរណ៍ វប្បធម៌ ធម្មជាតិបឹងពារាំង។
លោកបន្តថា យោងតាមសេចក្តីជូនដំណឹងលេខ១១៨ របស់រដ្ឋបាលជលផល បានហាមឃាត់មិនឲ្យសហគមន៍ធម្មជាតិបឹងពារាំងនេះ ធ្វើអាជីវកម្មណាមួយនៅក្នុងតំបន់បឹងពារាំងនោះទេ និងថា ការចូលទៅកាន់កាប់តំបន់បឹងពារាំងពេលកន្លងមករបស់លោកគង់ មង្គល គឺធ្វើឡើងដោយខុសច្បាប់។
លោក ពិសិដ្ឋ បានបញ្ជាក់ថា ខណៈលោកចុះទៅថតយករូបភាពមួយចំនួន ដែលបង្ហាញពីសកម្មភាពល្មើសច្បាប់នៅទីនោះ មនុស្សរបស់លោកគង់ មង្គល បានប្រើអំពើហឹង្សាលើរូបលោក រហូតដល់សន្លប់ លែងដឹងខ្លួន មុនពេលដែលកម្លាំងនគរបាលសង្កាត់ជ្រាវចុះទៅសង្គ្រោះរូបលោក។
ឆ្លើយតបការចោទប្រកាន់នេះ លោក គង់ មង្គល ប្រធានសហគមន៍ និងសមាជិក នៃ សមាគមទេសចរណ៍ វប្បធម៌ ធម្មជាតិបឹងពារាំង បានឲ្យដឹងថា ការចូលទៅគ្រប់គ្រង់ក្នុងតំបន់បឹងពារាំង របស់សហគមន៍បឹងពារាំង គឺធ្វើឡើងត្រឹមត្រូវតាមច្បាប់របស់ក្រសួងមហាផ្ទៃ ដែលអនុញ្ញាតឲ្យលោកចូលទៅគ្រប់គ្រង អភិរក្សបឹងត្រីមេពូជមួយនេះ ដែលនៅក្នុងដែនរដ្ឋបាលសង្កាត់ជ្រាវ។
លោក មង្គល បានបន្ថែមថា ចំពោះមូលហេតុដែលនាំឲ្យមានហឹង្សានេះ ដោយសារតែសមាជិកសហគមន៍របស់លោកមានការមិនពេញចិត្ត នៅពេលដែលលោកស៊ីម ឈីវឈានពិសិដ្ឋ បានទៅថតចានឆ្នាំង របស់កម្លាំងល្បាត និងប្រាប់ទៅពួកគេថា គាត់ចុះមកនេះដើម្បីប្រកាសរំសាយ សហគមន៍បឹងពារាំងនេះចោល និងប្រើពាក្យសម្តីមិនសមរម្យមួយចំនួនលើកម្លាំងសហគមន៍បឹងពារាំង។ លោកថា បន្ទាប់ពីកើតហេតុភ្លាមៗ លោកបានហាមឃាត់កម្លាំងប្រជាសហគមន៍កុំឲ្យប្រព្រឹត្តិបែបនេះ និងបានរាយការណ៍ទៅលោកមេប៉ុស្តិ៍នគរបាលសង្កាត់ជ្រាវ ពីករណីនេះ។
មកទល់នឹងថ្ងៃទី២៨ ខែមករា ឆ្នាំ២០១៩ សហគមន៍ សមាគមទេសចរណ៍ វប្បធម៌ ធម្មជាតិបឹងពារាំង នៅមិនទាន់មានការសម្រេចរំសាយណាមួយនៅឡើយទេ រីឯពាក្យបណ្ដឹង របស់លោក ស៊ីម ឈីវឈានពិសិដ្ឋ កំពុងស្ថិតនៅក្នុងដៃរបស់ ប៉ុស្តិ៍នគរបាលរដ្ឋបាលសង្កាត់ជ្រាវ នៅឡើយទេ ចំពោះនីតិវិធីបន្តបន្ទាប់សមត្ថកិច្ចកំពុងធ្វើការស៊ើបអង្កេតបន្ថែមទៀត។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
