ឯកឧត្តម ហោ មុន្នីរ័ត្ន រដ្ឋលេខាធិការក្រសួងទេសចរណ៍ នៃកម្ពុជា បានឲ្យដឹងថា ៖ ក្នុងឱកាសដែលឯកឧត្តម ឡ ស៊ូកាង រដ្ឋមន្ត្រីក្រសួងវប្បធម៌ និងទេសចរណ៍ នៃសាធារណរដ្ឋប្រជាមានិតចិន បានដឹកនាំគណៈប្រតិភូមកបំពេញទស្សនកិច្ចនៅកម្ពុជា រយៈពេល៥ថ្ងៃ ចាប់ពីថ្ងៃទី២៧ ដល់ ថ្ងៃទី៣១ ខែមករា ឆ្នាំ២០១៩នេះ គឺដើម្បីពង្រឹងកិច្ចសហប្រតិបត្តិការក្នុងវិស័យវប្បធម៌ និងវិស័យទេសចរណ៍រវាងកម្ពុជា-ចិន ឲ្យកាន់តែប្រសើរឡើង ពិសេសរួមទាំងការអបអរសាទរ ទិវាឆ្នាំទេសចរណ៍ និង វប្បធម៌ ចិន-កម្ពុជា ដែលនឹងត្រូវប្រារព្ធឡើង នៅសាលមហោស្រពចតុមុខ រាជធានីភ្នំពេញ ថ្ងៃទី៣០ ខែមករា ឆ្នាំ២០១៩ ខាងមុខនេះ ។
យោងតាមកម្មវិធី ដែលបានគ្រោងទុក ក្នុងដំណើទស្សនកិច្ចនៅខេត្តសៀមរាប សម្រាប់ថ្ងៃទី២៨ ខែមករានេះ ឯកឧត្ដម ឡ ស៊ូកាង ត្រូវបានអញ្ជើញទស្សនកិច្ចប្រាង្គប្រាសាទនានា នៅរមណីយដ្ឋានប្រវត្តិសាស្ត្រឧទ្យានអង្គរ ដែលជាសម្បត្តិវប្បធម៌បេតិភណ្ឌពិភពលោក ដែលក្នុងនោះ ជាគោលដៅសំខាន់ផងដែរ គឺប្រាសាទចៅសាយទេវតា និងប្រាសាទតាកែវ ដែលបានទទួលការជួលជុល និងថែទាំ ក្រោមការឧបត្ថម្ភរបស់ភាគីចិន ។
គួររំលឹកដែរថា ទស្សនកិច្ចរបស់រដ្ឋមន្ត្រីក្រសួងវប្បធម៌ និងទេសចរណ៍ចិន គឺប្រព្រឹត្តទៅបន្ទាប់ពីមានដំណើរទស្សនកិច្ចផ្លូវការ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅសាធារណរដ្ឋប្រជាមានិតចិន កាលពីថ្ងៃទី២០ ដល់ថ្ងៃទី២៣ ខែមករា ឆ្នាំ២០១៩ កន្លងទៅថ្មីៗនេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
