ក្នុងឱកាសដែលឯកឧត្តម ឡ ស៊ូកាង រដ្ឋមន្ត្រីក្រសួងវប្បធម៌និងទេសចរណ៍ នៃសាធារណរដ្ឋប្រជាមានិតចិន បានចុះទៅពិនិត្យមើលការដ្ឋានសាងសង់ឧទ្យានច្នៃប្រឌិតវប្បធម៌កម្ពុជា-ចិនដ៏ធំមួយ ដែលស្ថិតនៅក្នុងបរិវេណសណ្ឋាគារសុខាសៀមរាប ក្នុងក្រុងសៀមរាប កាលពីរសៀលថ្ងៃទី២៧ ខែមករា ឆ្នាំ២០១៩ម្សិលមិញនេះ លោក Liu Zhijie ប្រធានការិយាល័យកុងស៊ុលចិនប្រចាំនៅខេត្តសៀមរាប បានឲ្យដឹងថា ឧទ្យានច្នៃប្រឌិតវប្បធម៌កម្ពុជា-ចិននេះ ត្រូវបានក្រុមហ៊ុនចិន Yunnan Cultural Industry Investment Holding Group បានបណ្ដាក់ទុនជាង ៧០ លានដុល្លារ សម្រាប់ការសាងសង់ ដោយបាននឹងកំពុងសាងសង់លើផ្ទៃដីសរុបប្រមាណ ៣,៣ ហិកតា ខណៈដែលគម្រោងនេះ បានបើកការដ្ឋានសាងសង់ជាផ្លូវការ កាលក្នុងអំឡុងខែកក្កដា ឆ្នាំ២០១៨កន្លងទៅ ហើយគ្រោងនឹងសាងសង់ឲ្យរួចរាល់នៅត្រឹមឆ្នាំ២០២០ និងបើកឲ្យភ្ញៀវទេសចរចូលទស្សនាឈ្វែងយល់ពីវប្បធម៌ខ្មែរនិងចិន ។
លោក Liu Zhijie បានបញ្ជាក់ទៀតថា ឧទ្យាននេះនឹងក្លាយជាបណ្ដុំនៃតំបន់ទេសចរណ៍បែបវប្បធម៌ រួមមាន រោងមហោស្រពញញឹមអង្គរ ១៥០០-កៅអី , សារមន្ទីរ Zhou Daguan , មជ្ឈមណ្ឌលវប្បធម៌សម័យចេនឡា ,មជ្ឈមណ្ឌលផ្លាស់ប្តូរវប្បធម៌កម្ពុជា-ចិន , មជ្ឈមណ្ឌលពិព័រណ៍ផលិតផលវប្បធម៌ និងភោជនីយដ្ឋាន ជាដើម ។
លោក ង៉ូវ សេងកាត់ ប្រធានមន្ទីរទេសចរណ៍ខេត្តសៀមរាបបានឲ្យដឹងថា ឧទ្យានច្នៃប្រឌិតវប្បធម៌កម្ពុជា-ចិន គឺមានសារៈសំខាន់ណាស់សម្រាប់បង្ហាញវប្បធម៌កម្ពុជា-ចិន ជាពិសេសការបង្ហាញពីវប្បធម៌ខ្មែរព្រោះនៅក្នុងឧទ្យានច្នៃប្រឌិតវប្បធម៌កម្ពុជា-ចិន មានសម្តែងពីវប្បធម៌ខ្មែរ ដូចជាការ កសាងអង្គរ ការចំម្បាំងរបស់កងទ័ពខ្មែរពីសម័យបុរាណ និងការបង្ហាញពីទំនៀមទំលាប់ប្រពៃណ៍ខ្មែរជាច្រើនទៀត ហើយតាមរយៈនៃឧទ្យានច្នៃប្រឌិតវប្បធម៌កម្ពុជា-ចិន នឹងធ្វើឲ្យទំនាក់ទំនងផ្នែកវប្បធម៌កម្ពុជា-ចិនកាន់តែរឹងមាំ ជាពិសេសនឹងទាក់ទាញភ្ញៀវទេសចរណ៍ចិនឲ្យមកទស្សនាកម្ពុជាកាន់តែច្រើនបន្ថែមទៀត ព្រោះបច្ចុប្បន្ននេះ ចិនគឺជាទីផ្សារទេសចរដ៍សំខាន់របស់កម្ពុជា ៕
អត្ថបទ ៖ លោក ឃុត សៅ
រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
